Éx 17 - Biblia Wichi

Inät tälho chenaj

¹ Israel lhayis yikch'oye ts'anis tä lhey Sin wet lhamel tujlhache len'äyij. Lhamel yikpej wet takasitpej, mälhyej tä Lhawuk ne'tek lhamel iwoye. Wet lhamel nichäte p'ante lhip tä lhey Refidim, wet iwo kasthawetahi. Mat inät ihihit'a lhiptso yämthilek wichi iyäyej.

² Tä mälhyejtso, wichi iwoyeje lhämtes häp Moisés wet yok: –¡W'en n'ohohen inät! Moisés nichulho lhamel wet yok: –¿Chipte tä let'änayej n'o'pe täjtso? ¿Chipte tä lhelhtaye Lhawuk?

³ Israel lhayis yok: –¡Ochimhen! Wet lhamel wuj tä tatayhlä Moisés wet yok: –¿Chipte tä letonphä olhamel tä oihi Egipto wet lelän n'oyejen neheläp, lhäy'e oles, lhäy'e oläy?

⁴ Tä mälhyejtso, Moisés t'änch'oye Lhawuk wet yok: –¿Atsi m'ak tä owoyeje wichina? ¡Tatäy lhimphaj wet lhamel ithathilhila n'oyej tuntey!

⁵ Lhawuk nichulho wet yok: –Äne iyhäj hin'ol tä thänhäy wet achunlä wichi. Wet chäj atsutnaj let'ajeji tewok Nilo tä ihi Egipto wet mähen.

⁶ Hoye Horeb, wet olham oihla'pe chenaj tä ihi wet onihihla ahilä. Wet chik let'aj chenajna, inät tälhihola häpkhilek wichi iyäyej. Moisés iwoye t'at m'ak tä Lhawuk ne'tek iwoye, wet hin'ol tä thänhäy tä yikche hiw'en t'at.

⁷ Wet lham yen lheya honhattso Masah wok Meriba. Masah häpe n'olhämet tä õyok, n'olhelhtshayaj, wet Meriba häpe n'olhämet tä õyok, õt'änejpe. Tsi Israel lhayis iwoye lhämtes tä t'änejpe Moisés. Wet tä äp õyen lheya Masah, häp tä lhamel iwoye lhämtes tä hätet iwoyek lhelhtshayaj tä itiyej Lhawuk tä lhamel yok, “¿Hä Lhawuk in'oyejen, wok newa n'oyejen p'iya?”

Israel lhayis iwo ka'tshayajayej Amalek lhayis

⁸ Amalek lhayis ihoye Refidim yämthilek iwo ka'tshayajayej Israel lhayis.

⁹ Wet Moisés tahuyej Josué wet yok: –Ähi hin'ol tä takhajayhen wet mäh, tayhlä Amalek lhayis. Chik nech'e fwala olham oihla'pe chenaj tä atojphä l'ini, wet otsut tä Dios ne'tek ochäj ihihila otkwey.

¹⁰ Josué iwoye Moisés lhämet wet yik tä tatayhlä Amalek lhayis. Wet Moisés, Aarón lhäy'e Hur, lhamel iho'pe chenaj tä atojphä.

¹¹ Tä Moisés itiphäpej takwey, Israel lhayis takhajayhen. Mat tä nitiyaphä takwey, nemhit takhajayhen Israel lhayis.

¹² Wet tä Moisés takweyey y'ilchehen, Aarón lhäy'e Hur tachuma tunte wet Moisés tatayphä'pe. Wet Aarón tumej lhip elh wet Hur tumej lhip elh, wet lhamel ineyhatphä Moisés takweyey. Wet Moisés itiphä t'at takweyey pajtha ifwala y'uy.

¹³ Wet Josué ikalhi letayhfwas Amalek lhayis wet ilänhen lhamel.

¹⁴ Wet Lhawuk tahuyej Moisés wet yok: –Lesayen täjtso wet tihi lehi häpkhilek wichi tek hip'ethatlä. Wet fwenho Josué tä otäyhthila Amalek lhayis wet nemla iche.

¹⁵ Wet Moisés yenlhi altar wet yen lheya tä yok, “Lhawuk häpe oka Bandera.”

¹⁶ Wet äp yok: –Tä Amalek lhayis tatayhlä Lhawuk niyatyaj, Lhawuk iwohla laka'tshayajayej lhamel pajla'tha nichäte leles tä lepes lheley.