Ester 5 - Biblia Wichi

Ester ihoye rey

¹ Tä tajyäme tres ifwalas, Ester taw'uyhi lew'uyis tä reina lew'uy. Wet tiyäjo rey lewukwe ka'alho tä ilech'oye, wet takasit tä ihi tä rey lewukwech'o elh tatache. Wet rey ichufwi t'at, tatayphä tä ihi leniyatyaj, ihi tä lepe yiwethi.

² Tä hiw'en reina Ester tä takasit tä ihi laka alho, wuj tä lakäjyaj ihi, wet ipiyne chinaj tä oro tä ihi takwey. Wet Ester ihowhäye wet itsok chinaj lepes.

³ Wet rey tay'ätshane wet yok: –Reina Ester, ¿atsi m'ak tä lewoye? ¿Atsi m'ak tä lewatlä? ¡Tej chik let'alhe oniyatyaj lechowej, ow'enlat amho!

⁴ Ester nichulho wet yok: –Ika niyat, olhaip'altsen ame. Chik lehuminche, ot'uhläk lehoye okäjyaj tä oyenlhi tä oaiwujyen ifwalana, wet is chik lelhäy'e Amán. Tä mälhyejtso, rey tahuyej lakawos wet yok:

⁵ –Ukwe'thahya Amán, is chik iwoye reina Ester lenech'ethayaj. Wet rey lhäy'e Amán lhamel ihoye reina lakäjyaj tä yenlhi.

⁶ Wet tä rey iyäyej hat'es, tahuyej Ester wet yok: –¿Atsi m'ak tä let'alhej n'oye? Ow'enla amho. Mälhyej täjmat ofwel amho, ¡tej chik let'alhe oniyatyaj lechowej, ow'enlat amho!

⁷ Ester nichulho wet yok: –Ika niyat, m'ak tä ot'alhej ame häp täja:

⁸ Chik matche tä a'akäjlhi n'oyej wet lehuminche chik lew'en n'oho m'ak tä ot'alhe, ot'uhläk äp lehoye elh okäjyaj tä oyenhilhilak ifwala tä oaiwujyen. Häte Amán äp ot'uhläk äp lham ihoye. Chik mälhyejtso, owohiyela, ot'alhiyeja ame m'ak tä owatlä.

Amán ne'tek õyenlhi hal'ä yämthilek õ'fwuhatlhi Mardoqueo

⁹ Ifwalatso tä Amán yäpil, wuj tä lakäjyaj ihi. Mat tä hiw'en Mardoqueo tä ihi rey lewukwe lepe tä nineyaphä tä hiw'enlä yämthilek n'okwiyej, wuj tä lewäk ihi.

¹⁰ Mat tek hin'älit tä tawäkwäylhi. Mat tä nichäte lew'et, t'äne lakalay'is lhäy'e lech'efwa Zeres

¹¹ wet ifwenho tä yok: –Wuj m'ayek tä ow'en, wet wujpe oles, wet rey hiw'en n'oho on'ohyaj tä inu'pe niyatey iyhäj.

¹² Häte tajlhamat olham tä reina Ester tis n'ohi lakäjyaj tä iwo lakäjyajayej rey. Wet äp ne'tek ohoye lakäjyaj tä yenhilhilak ifwala.

¹³ Mat nilhokej tähesna tek tach'ot n'oye. Tä ow'enpej Judío Mardoqueo tä tatayphäwhäye rey lewukwe lepe, okäjyaj ihihit'a.

¹⁴ Tä lech'efwa iläte, lhäy'e lakalay'is tä iyej, lhamel yok: –Fwenho akawos, is chik yenlhi hal'ä yämthilek lefwuhthilhi Mardoqueo. Tihi veintidós metros tä atojphä. Wet chik nech'e fwala alhela rey, is chik ne'tek õ'fwuhthilhi, häpkhilek nem iche m'ak chik lhen atichunhayaja chik lehoye n'okäjyaj, lhäy'e rey. Wet Amán ihuminche lhamel lhämet, wet ne'tek lakawos yenlhi hal'ä yämthilek õ'fwuhthilhi Mardoqueo.