Ef 5 - Biblia Wichi

Woyayepej m'ak tä t'uhawetej wichi tä häpehen isi leles

¹ Tenay Dios, tä ahäpehen leles tä lehumnhay.

² Wopej ahumnhayaja, mälhyej tä Cristo n'aihumnhen wet lhayachaje t'ilek lhatapehen, tä hätet iwoye m'ak tä õyachaje Dios tä õyen n'okhayajayej tä ikänitlhi t'at häp lham.

³ Mat n'okain'oyaj wok m'ak at chik häpe chik kok'aye, wok n'otkänyaj tä ni'isa, oyok, yej woyaye tähesna, wet yej lhenay ämeta, tsi ahäpehen Dios laka wichi.

⁴ Yej woye ämet chik len'äfwlhatejwethä aiyhäj, wok ämtes tä amukwehyaj wok ektshanyaj, tsi m'ayhaytso t'uhawethit'a amejen. Mat wopej graciasayej Dios.

⁵ Tsi lehanej t'at, elh chik iwo lakain'oyaja, wok iwoye m'ak tä kok'aye, wok alhaknhatsaj, lew'et ihihit'ala Cristo lhäy'e Dios Leniyatyaj. Tsi häp elh tä alhaknhatsaj, hätet iwoye chik yen häpeya laka dios m'ak tä nilhak'alch'oye.

⁶ Yej tach'ahuye elh chik häpe chik fwetaj ikänitlhi amejen lhämtes tä kamatachehen. Tsi häp m'ayhay tä oyämene, häp tä itone Dios lewäk wichi tä niwoyaye lham lhämtes.

⁷ Tä mälhyejtso, yej aletan'istej lhamel.

⁸ Ifwalas tä pajche amel ahusey ihi t'at honataj, mat athana tä lheyayej Lhawuk, ahusey ihi t'at isi. Wet häp tä oyok, Woyayepej m'ak tä t'uhawetej wichi tä häpehen isi leles,

⁹ tsi lhay tä wuj tä tälhe isi häpe n'o'isyaj, lhäy'e m'ak tä is alhoho, lhäy'e m'ak tä matche.

¹⁰ Ämay letäfwelej m'ak tä Lhawuk ihuminche.

¹¹ Yej alet'aje wichi lakeyes tä najit lahaya tä tälhe honataj, mat n'älitpe.

¹² Tek ot'uhläk oyäme m'ak tä lhamel weskatej tä iwoye, oyämhiyet'a, tsi on'äfwelhpe.

¹³ Mat nilhokej m'ak tä isi hin'älit, isiche t'at.

¹⁴ Wet häp tä õyok: “Yahinphä, am tä lemä, nephä tä lhehi n'op'itseyhay, wet Cristo ihutunla atape.”

¹⁵ Tä mälhyejtso, uyayhlä wet tetshanay m'ak tä lewoye. Yej alhen isukisa mat äm ahusey ihi.

¹⁶ Wo kotsayej lewhäyna wet äm is m'ak tä lewoye, tsi ifwalasna isit'a.

¹⁷ Yej woye m'ak tä najit lahaya, mat äm matche tä let'uhläk letäfwelej Lhawuk lenech'ethayaj.

¹⁸ Yej alhen w'oknhasayej hat'es, tsi häp tä iwasthi wichi, mat ämpej tapokwe ahusey Espíritu tä Dios T'amajchet.

¹⁹ Ämejwethä amhomche salmos lhäy'e n'otenkay tä isen. Choywethä wet is chik ahusey iwunit Lhawuk.

²⁰ Wopej graciasayej Dios Lhajcha nilhokej m'ayhay, häp tä isej Lhawuk Jesucristo.

²¹ Tä ahäpehen wichi tä itiyej lewujyaj Cristo, oyok, Is chik elh weihalhapej hätet iwoyek yen at lewuka häp elh.

Häpet atsinhay tä lech'efwas ihi

²² Atsinhay tä hach'efwas ihi, en awuhuya hach'efwas, tech'aynej tä lhen at awuka häp Lhawuk.

²³ Tsi atsinha lhetek t'at häp lech'efwa, mälhyet iwoye Cristo tä Dios leles lhetek. Häte Dios leles Lefwayhthi, tsi häpe lham t'isan t'at.

²⁴ Tä mälhyejtso tä Dios leles yen Lewuka Cristo, häte atsinhay, m'ak at chik häpe chik iwoye, is tä yen at lewukayej lech'efwa.

Häpet hin'ol tä lech'efwas ihi

²⁵ Wet amel tä hin'ol tä hach'efwas ihi, humin hach'efwas, mälhyej tä Cristo ihumin Dios leles wet lhayachaje'pe t'ilek.

²⁶ Häp täjtso tä iwoye yämthilek yen t'amajchetesa, häp tä isej Dios lhämet, wet ilejej inät tä ibautisaynej,

²⁷ häpkhilek häpehen Dios leles tä isis chik lham itihi tä itayche, wet laj lech'ohleya, newache m'ak chik iyej, mat t'amajchetes t'at wet tek kok'ayehen.

²⁸ Häte hin'o elhpej tä lech'efwa ihi, is chik ihumin lech'efwa, mälhyej tä ihumin lham t'isan. Tsi elh tä ihumin lech'efwa, lhaihumin t'at.

²⁹ Ihichet'a elh chik häpe chik y'ulhan lham t'isan, mat ichunhan wet t'uye. Mälhyejtso tä Cristo iwoyeje Dios leles,

³⁰ tsi häpe lham t'isan t'at, wet n'amel n'ahäpehen lhipey häp t'isantso.

³¹ Mälhyej tä Dios lhämet tä ihi Lehi yok, “Häp hin'o yikch'oye lajcha lhäy'e lako wet lhaip'ajtej lech'efwa, wet lhamel täkwfwasna hätet iwoyek hätefwajni.”

³² Mat lhek tetshan täja, oyok, iche m'ak tä tumchä tä ihi Dios lhämettso, wet olham otichunhayaj yok, yäme häp Cristo lhäy'e Dios leles.

³³ Mat amel häte, is chik hin'o elh weihalhapej ihumin lech'efwa, mälhyej tä lhaihumin, wet atsinha is chik tek yen w'et m'ayeka lech'efwa.