Ef 4 - Biblia Wichi

Y'alhaip'ajtejwek Dios laka Espíritu

¹ Tä mälhyejtso, olham tä Lhawuk tamen n'oyej tä õhp'o n'ohi, olhaip'altsen amehen tä oyok, Tä Lhawuk t'än amehen, woyayepej m'ak tä t'uhawetej.

² Yej alechäjwethä, yej afwitses, yej lhak'alwethä, mat teläytej t'at aelh che häpe wet humnhen lhamel.

³ Äm matche yämlek atamsek ayäyitwek, häpkhilek nittäya amejen tä alep'ajtejwek Espíritu tä Dios T'amajchet.

⁴ Dios leles hätet iwoye t'isan weihalha, wet iche weihalha Espíritu tä Dios T'amajchet, mälhyej tä weihalha t'at aniwhayaj tä Dios t'änej amehen.

⁵ Iche weihalha Lhawuk, weihalha lhat'ekhahyaj, weihalha bautismo.

⁶ Iche weihalha Dios Lhajcha wet lhaka Niyat, wet äp tachumhilhi nilhokej n'amel wet in'amejen.

⁷ Mat Cristo hip'altseneje elh weihalhapej n'amel häp t'awayhat tä häpe lakhajyhayaj, yämlek hich'otyeneje Lhawuk lechumet.

⁸ Häp täjtso tä tamenej tä Dios lhämet tä ihi Lehi yok: “Iho'pe lhip tä tojphä, wet ichäj lhamche iyhäj tä pajche yäythen, wet hiw'enhomche t'awayhtes häp wichi.”

⁹ Wet ¿atsi tä tamenej lhämet tä yok, “Iho'pe lhip tä tojphä”? Tä mälhyejtso, n'äl tä ichunkat tä inuhchä honhatena.

¹⁰ Wet häp elh tä inuhchä häpe t'at lham tä äp yäpil w'echehi pule, yämlek nilhokej m'ayhay tapoyej tä lham ihi.

¹¹ Wet lham t'at tä hiw'enhomche wichi häp t'awayhtes tä häpe lakhajyhayajay. Iyhäjfwas yen häpeya apóstoles, wet iyhäj yen häpeya profetas, wet iyhäj yen Lesilätyajwosa, wet iyhäj yen häpeya pastores tä ichufwenhen wichi.

¹² Häp täjtso m'ak tä iwoye, yämlek nilhokej lakawosna iwaklhat Dios leles iyhäj häpkhilek iwoye lham lechumet. Wet tälhe täja, y'alhokej n'amel tä n'ahäpe Cristo t'isan y'alhaichihelit,

¹³ pajla'tha y'alhaip'ajtejwek lhachayaj wet y'atäfwelej häp lham tä häpe Dios Lhäs, wet n'ahäpehen iyhäj tä thänhäyej Dios lhämet wet lhahusey w'awulhi Cristo.

¹⁴ Che mälhyejtso, nemla n'ahäte iwoye nä'tshas, iwopej elha m'ak tä fwetaj iwoye, wet nemla y'alhayachaje hin'ol tä akantses tä fwetaj n'aiwetahatejen lechufwenyajay tä ni'isahen, tä hätet iwoye yafwthitas tä ichäj m'ak at che häpe.

¹⁵ Mat n'anukwepej m'ak tä matche wet n'ahumnhen n'aiyhäj, häpkhilek y'alhaichihelit wet matche tä y'alhaip'ajtej Cristo. Lham häpe Dios leles lhetek,

¹⁶ wet t'isan imälhewek t'uneji t'at häp lham, wet t'isan isej nilhokej lhipey tä y'uy lhamhomche wet lhaip'ajtitwek. Wet lhip elh weihalhapej, che iwoye m'ak tä t'uhawetej che iwoye, t'isan imälhewek lhaichihelit t'at wet yiklhayejphä lehumnhayaj.

N'äyij tä nech'ayek tä Dios leles inukwe

¹⁷ Tä mälhyejtso, olham tä Lhawuk lhämet n'oyej, ofwel amhohen tä onityen amejen, oyok, Yej tujlhache tä lenukwe wichi tä nitäfwelayej Dios tä matche len'äyij. Lhamel iwoye t'at letichunhayajay tä najit lahaya,

¹⁸ wet honatsi i'pe lehusey. Häp n'ow'atshancheyaj tä Dios hiw'enho laka wichi, y'ajiyet'a lhamel, tsi tek nitäfwelej Dios, häp lehusey tä t'unhen tä tamenej.

¹⁹ Lhayachaje lemukwehyajay wet y'ayhtejen tä iwoye lesukyajay tä w'enhahiche tä kok'aye, wet ihichet'a len'äfwlhi che häpe.

²⁰ Mat amel tä let'ekhayaye Cristo, häpkhit'a m'ayhaytso che alechufwenejen.

²¹ Tä lelätaye tä õyen lhämeta, wet che matche tä lewoyaye, lehanej t'at tä lham häpe t'at tä m'ak tä matche tälhe.

²² Tä mälhyejtso, leyache akeyes tä pajche, lanayhi achowej wumek tä ihanej wasi lhäy'e tä aikänchiyej lenech'ethayajay.

²³ Anech'aynejichepej ahusey lhäy'e atichunhayajay,

²⁴ wet en haw'uya achowej elh tä nech'ayek tä häpe Dios lhenek. Tsi lham t'uhläk aitech'ayen lhamej, wet ayen häpeya iyhäj tä ische alhoho wet t'amajchetes, wet lewoyayepej m'ak tä matche.

²⁵ Tä mälhyejtso, leyayej tä w'et lhämwethä, mat elh weihalhapej woyeje ämet tä matche aelh, tsi nilhokej n'ahäpehen lhipey t'isan weihalha.

²⁶ Che letawäkwäy, yej ch'anlhaye che awäk iton ame hach'isukyaj, mat nofwatphä'thahya,

²⁷ wet yej wo lew'eta ahättaj.

²⁸ Elh tä t'etan, is che ileyej tä t'etan, mat tachumlhi. Is che iwoye lechumet tä is, häpkhilek iche m'ak tä hich'otyeneje wichi tä iwatlä m'ayek.

²⁹ Isit'a che ämtes tä ni'isachehen tälhche ayhi, mat is che häpepej ämet tä is, wet tach'ote aiyhäj tä iläte yämlek isej, wet ichätyenpe Dios lakäpfwayaj.

³⁰ Yej wo lefwitajayaja Dios laka Espíritu tä T'amajchet, häp lham tä n'otetnek amejen tä kalelhäj tä Awukay t'at Dios wet aisej che nichäte ifwala tä afwayhyaj.

³¹ Tiyayej kanhi nilhokej m'ak tä tapay tä ihi ahusey, lhäy'e afwitseyaj, lhäy'e awäk, lhäy'e tä let'änejpe ämet tä ni'isa aelh, lhäy'e tä lesitäyen aelh, lhäy'e nilhokej han'äyihyajay.

³² Is che ahäpehen iyhäj tä lehusey ihi. P'altsenhen aiyhäj wet täyhtejen letes, mälhyej tä Dios itäyhat amejen ates tä isej Cristo.