Ecles 3 - Biblia Wichi

Nilhokej m'ayhay kalelhäjen lewhäy

¹ Nilhokej m'ayhay tä lewhäy iche tä ihonhatena:

² Lewhäy tä nech'e iche hin'o, wet äp lewhäy tä äp y'il. Lewhäy tä hin'o itihchä, wet lewhäy tä äp itonhiche tä tälho lewhay.

³ Lewhäy tä hin'o ilän elh, wet lewhäy tä ichesat. Lewhäy tä hin'o iwasthi m'ak, wet lewhäy tä yenlhi.

⁴ Lewhäy tä hin'o tafwlhi, wet lewhäy tä t'ischeylhi. Lewhäy tä hin'o y'äyin, wet lewhäy tä takatinlhi.

⁵ Lewhäy tä hin'o ifwtsatkathi tuntey, wet lewhäy tä t'äkwe tuntey. Lewhäy tä hin'o tatsufwelej elh, wet lewhäy tä ileyej tä tatsufwelej.

⁶ Lewhäy tä hin'o t'ukwe m'ak, wet lewhäy tä ileyej tä t'ukwe. Lewhäy tä hin'o t'amajej m'ak, wet lewhäy tä iwom.

⁷ Lewhäy tä hin'o hich'esajche m'ak, wet lewhäy tä itsekche. Lewhäy tä hin'o nitahuya, wet lewhäy tä yämlhi.

⁸ Lewhäy tä hin'o ihumin elh, wet lewhäy tä y'ulhan. Lewhäy tä hin'o iwo laka'tshayaja, wet lewhäy tä laka'tshayaj nofwi.

Hin'o ihanhiyejt'a m'ak tä Dios iwoye

⁹ ¿Atsi m'ak tä teskanej hin'o tä chumaj tä lhailänej lechumet?

¹⁰ Ow'en tä Dios yäm äyteschehen lechumtes tä itiyej wichi, häpkhilek lhay'ayhatchehchä.

¹¹ Nilhokej m'ak tä Dios yen isa lewhäy at che ichepej, wet äp itihi wichi lehusek yämthilek t'uhläk ihanej m'ak tä tamenej m'ayhay tä iche tälhe tä nech'enyaya pajla'tha tiyäj'attsiy. Mat tej tä wichi wuj tä yen tichunhayaja, tha ihanhiyejt'a m'ak tä Dios iwoye tälhe täjp'ante iwo tesa pajtha taj lepes.

¹² Ontäfwelej tä ihichet'a m'ak che is che iyej hin'o, tajlhame t'at lakäjyaj wet äp t'ukwe m'ak tä is tä kamaj iläyhi.

¹³ Wet Dios hiw'enho hin'o yämthilek t'ek wet iyä wet akäjejlhi m'ak tä is tä tälhe lechumtes.

¹⁴ Ontäfwelej tä nilhokej Dios lhenhay häpkhila m'ak tä t'un. Isit'ak õy'isej lhip wok õ'soyej lhip. Dios iwoynejetso tsi häpkhilek wichi ihumin wet iwoye lhämtes.

¹⁵ M'ak tä tafwaytshi äp häpe t'at, wet m'ak tä äp häpkhila häpen'aj t'at. Dios inech'aynhipej m'ak tä pajche.

N'och'atkanyaj tä ihonhatena

¹⁶ Ow'en m'ak elh tä ihonhatena. Tsi ohoye n'okalelhthayajw'et tä ot'ukwe m'ak tä is alhoho, tha ow'en m'ak tä ni'isa lhäy'e n'och'atkanyaj.

¹⁷ Otahuy lhamej wet oyok, Oelh tä is alhoho lhäy'e elh tä ni'isa alhoho Dios itihiyeja lakalelhthayaj lhamel. Tsi iwo lewhäya nilhokej m'ak tä õyenlhi.

¹⁸ Äpte oyok, Dios yelhtepej wichi häpkhilek lhaiw'enhen tä tet iwoye itshätäy.

¹⁹ Tsi häp m'ak tä iyej wichi wet m'ak tä iyej itshätäy w'enhahit'a lhamej. Y'inhen tha w'awulh'atchä. Tä t'iyalhiche, tha w'awulh'atchä. Wichi tafwayhit'a'pe itshätäy. Täjtso häpe t'at m'ak tä m'ak nitälhaye.

²⁰ Wichi lhäy'e itshätäy tefwaji lhip tä tiyäje. Nilhokej tä õyenejlhi honhat mok wet äp yäpnho honhat mok.

²¹ ¿Atsi tä ihanej tä hin'o lehusek tiyäjla kaphä wet itshätäy lehusey tiyäjchufwi honhat? Ihichet'a.

²² Tä mälhyejtso, ow'en tä ts'ilak lechumet tä hin'o isej wet is che akäjejlhi t'at. Häp täjtso tä len'äyij. ¿Tsi atsi m'ak che n'änhila che tajyäme lham? Ihanhiyejt'a.