Ecles 11 - Biblia Wichi

¹ Yej ahan'äyhtsaj, häpkhilek paj wet lew'enla m'ayek.

² W'enhomche wichi m'ak tä i'amej, yej n'äyej, tsi lehanhiyejt'a m'ak tä ni'isa che nämhiyela honhat.

³ Che pules inät tapoyej, nitsäype t'at honhat. Wet che hal'ä nichät katsi, che itapinhiye wok itefwojhiye, lhip tä ihi wet ihi t'at.

⁴ Elh tä itetshan leyalh lhayis, nitutcheya t'at. Elh tä itetshan pule lhayis, m'ak nilanahi t'at.

⁵ Tet iwoye tä kahanayej chi tälhche leyalh tä tiyäjo n'olhiley, lhäy'e tä lhaichiyhelit nulis tä ihi atsinha kachowej tä hich'otshan, tettso tä kahanayej Dios lechumet tä yenlhi nilhokej m'ayhay.

⁶ Tutchey tä nech'e fwala, wet yej leyej tä letachumlhi pajtha honaj. Tsi lehanhiyejt'a atsi lhoy che iwohla lhaya, che iyhäj tä letihchä tä nech'e fwala, wok äp iyhäj tä honaj, wok w'awulhchä tä lhaichiyhelthen.

⁷ Akäj isi, lakäjyaj ihi n'ottey tä hiw'ene ifwala tä isi.

⁸ Tsi häp tä tej che thaläkw hin'o, wet äp nilhokej nekchäm tä lakäjyaj ihi, is che nitichunlä tä wujla ifwalas tä ihihila honataj. Nilhokej m'ak tä tatay alhoho, m'ak tälhiyet'a.

N'otäyijlhayaj tä õ'fwenho wichi tä nech'e thänhäy

⁹ Is che akäjlhi amej tä nech'e athaläkw, tä lheklhayejphä tä alechiyhelit. Is che wuj tä aisej ifwalas tä lhehi wet woye m'ak tä lehuminche. Tha lehanej tä Dios aikalelhthiyeja nilhokej m'ak tä lewoye.

¹⁰ Lhek soyej achowej alhakli wet tiyej kanhihlä asan häp m'ak tä ni'isa. Tsi n'omamseyaj m'ak tälhiyet'a.