Deut 9 - Biblia Wichi

Dios itäyhthila wichi tä ihi Canaán

¹ Ch'ahuyaye, Israel lhayis. Nichäte lewhäy tä lhistho tewok Jordán häpkhilek letatayhlä wichi tä wujpe wet äp takhajayhen, inu'pe amel. Wet lhamel lew'etes häpe hupuy tä wus, wet n'olafwey tä lep'ot hupuy wuj tä atoschephä.

² Wet hin'ol häpehen hin'ol tä wus wet äp pites, hätet iwoye gigante Anak leles. Amel lehanej n'olhämet tä yok, “¿Atsihilak ikalhi chik tatayhlä Anak leles?”

³ Tä mälhyejtso, is chik amel lehanej tä Lhawuk Dios häp tä ichun hach'oyehen, hätet iwoye itäj tä iwunhomche m'ayhay, wet ilhaklit wichi wet ikalhi lhamel. Wet amel lhokwesila wet yofwajkwet letäyhat, mälhyej tä Lhawuk ifwel amhohen tä mälhhiyejattso m'ak chik lewoye.

⁴ Wet chik lew'enay tä Lhawuk Dios ithatej kanhi wichi, yej lhoyaylak, “Tä n'ahäpehen wichi tä isen, häp tä tamenej tä Lhawuk hiw'en n'amhohen honhatna wet n'alewuhuy t'at.” Tek mälhyejtso. Tä wichi iwoye m'ak tä ni'isa, häp tä tamenej tä Lhawuk ithatej kanhi lhamel.

⁵ Häpkhit'a chik Dios yok, “Häp tä isen Israel lhayis, häp tä tamenej tä ow'enho honhat.” Wok häp tä Dios hiw'en tä achowhal ihi wet tamenej tä hiw'en amhohen honhat. Kha, tek mälhyejtso. M'ak tä ni'isa tä wichi iwoye, häp tä tamenej tä Lhawuk ithatej kanhi lhamel, yämthilek matche lhämet p'ante iwoyeje Abraham, Isaac, Jacob, häp amel atetsel.

⁶ Tä mälhyejtso, is chik lehanayej tä häpkhit'a chik aisen wet tamenej tä Lhawuk Dios hiw'en amhohen honhat tä is. Mat ahäpehen t'at wichi tä lehusey t'unhen.

Israel lhayis tatayhlä p'ante Lhawuk tä lhamel ihi Horeb

⁷ Yej p'ethatayhlä tä amel lewäkyhayenay Lhawuk Dios tä amel lhehihte ts'anis. Tälhe täjte ajchalis yikch'oye honhat tä Egipto, wet tälhe täjtso y'aj amehen tä lhehi ifwalasna, letataypejlä Lhawuk.

⁸ Tä lhamel ihi honhat tä chenaj Horeb ihi, iwäkyhayen Lhawuk wet wuj tä itiyejen lewäk, wet tatäy lhimphaj wet Lhawuk itäyhthen lhamel.

⁹ Häp ifwalastso olham ohohte'pe chenaj yämthilek otchuma tunte lhipey tä Lhawuk lhämtes i'pe tä lham iwoyeje wichi. Wet cuarenta ifwalas wet cuarenta honatsis tä oi'pe chenaj, wet niwohit m'ak chik otufw wok oyäyej.

^10-11 Wet tä tajyäme lewhäytso, Lhawuk hiw'en n'oho tunte lhipeytso tä ilesaynej lefwuj nilhokej lhämtes tä wichi iläte tä i'pe chenaj tä tumho itätaj häp ifwala tä olhamel olhaihute chenaj.

¹² Wet ifwel n'oho wet yok, “¡Mäh nuhchä! Wichinaj letonphä tä tälho Egipto nemhit is m'ak tä iwoye. Yofwajkwet lhamel ileyej m'ak tä one'tek lhamel iwoye. Lhamel yenlhi lhamhohen lecheyä tä chinaj.”

¹³ Häte ifwel n'oho wet yok, “Ow'en tä wichina lehusey t'unhen.

¹⁴ Ch'anlha n'oye wet otäyhat lhamel, wet nemla i'pe honhatna. Mat am otälhthila ame wichi tä oyäm wujpey wet äp takhajayhen, inuhla'pe wichina.”

¹⁵ Wet onuhchä tä otälhpe chenaj tä y'uho. Ochäjlhi häp tunte lhipey tä Lhawuk lhämtes i'pe.

¹⁶ Wet ow'en tä wichi iwoye m'ak tä ni'isa wet tatayhlä Lhawuk, wet yenlhi lhamhohen w'asetaj tä chinaj, wet ileyej tä iwoye Lhawuk lhämtes tä ne'tek iwoye.

¹⁷ Wet häp tä othathi honhat häp tunte lhipey tä ochäjlhi, wet wichi hiw'en tä wasiche.

¹⁸ Wet otkhos katsi tä oihi tä Lhawuk tatache, wet ifwalas tä cuarenta wet cuarenta honatsis tä niwohit m'ak chik otufw wok oyäyej, mälhyej tä pajche owoyehte. Häp m'ak tä tamenej tä owoye täjtso, häpe t'at m'ak tä ni'isa tä wichi iwoye wet iwäkyhayen häp Lhawuk.

¹⁹ Wet olham wuj tä onoway tä oläte Lhawuk tä itiyejen lewäk wet t'uhläk yäm nofwej. Wet häp tä olhaip'altsene, wet yachajo tä iteläyit n'oyej wet tach'ahu n'oye.

²⁰ Häte Aarón wuj tä Lhawuk itiyej lewäk wet t'uhläk ilän. Mat häte owo ot'alhyaja'pe.

²¹ Wet otsoklhi häp w'asetaj tä wichi yenlhi tä yen lech'isukyaja, wet othatho itäj. Wet owo lemoka wet otsäyho tewok lhäsaj tä tälho chenaj.

²² Wet ts'ilakhit'a tä wichi ihi Horeb tä iwäkyhayen Lhawuk. Mat häte iwoye tä ihihte Tabera, lhäy'e Masah, lhäy'e Kibrot-hataava.

²³ Wet Lhawuk ne'tek yikhen tä ihi Kadés-barnea wet yok, “Mähen, enay haw'eta honhat tä ow'en amhohen.” Mat lhamel ikachu, iwohiyet'a Lhawuk lhämet tä ofwenho lhamel.

²⁴ Tälhe ifwala tä owo tesa tä oiyejen lhamel, tatay'atlä häp Lhawuk.

²⁵ Wet häp tä otkhoschufwi Lhawuk cuarenta ifwalas wet cuarenta honatsis, tsi lham yok, “Otäyhthila wichina.”

²⁶ Wet ot'alhe Lhawuk wet oyok, “Iwuk Dios, yej täyhat aka wichi tä häpe akäywet tä Alewuk, wet lefwayhthen tä isej akhajyhayaj tä wuj wet letonphä lhamel tä tälho Egipto.

²⁷ Tichunche akawos p'ante Abraham, Isaac, Jacob. Yej tetshan lech'isukyajay wichina, lehusey t'unhen wet tek hap'altsentses.

²⁸ Tsi chik letäyhthen lhamel, wet wichi tä lew'et honhatnaj letälhtho, lhamel yohlak, Häp lhamel Lewuk Dios tä nikalhahi tä fwetaj ihäne honhat p'ante ifwenho. Wet äp n'äyihomche, wet häp tä itonphä wet yikchufwi. Tä nichäte ts'anis, wet ilänhen.”

²⁹ Wet olhaip'altsenehte Lhawuk wet oyok, “Iwuk Dios, aka wichi t'at lhamel wet Alewuk. Wet letonphä tä ihi Egipto häp tä isej akhajyhayaj tä wuj.”