Deut 8 - Biblia Wichi

Ts'ilakhit'a pan tä iläyit hin'o

¹ Achufwenayej wet enay achumyaja nilhokej häp Lhawuk lhämtes tä ofwel amhohen ifwalana, häpkhilek kat'ilahen, wet ahäpkhila wichi tä wujpey, wet letiyäjo honhat tä Lhawuk ifwenho p'ante atetsel, wet alhen lewuhuya.

² En atichunhayaja häp m'ak tä Lhawuk Dios iwoye tä ihän amchehen han'äyij tä lenukwe ts'anis cuarenta nekchämis, wet yelhtej amehen alhaklis tä t'uhläk hiw'en wet kalelhäj m'ak tä ihiche ahusey, chik lewoye lhämtes wok kawoyaye.

³ Tej tä iti amejen alhakli wet lechuyuhen, mat hiw'en amhohen äk tä lhey maná, häp äk tä katäfwelayej lhäy'e tä achätilis nitäfwelayej, häpkhilek lehanayej tä ts'ilakhit'a pan tä iläyit hin'o, mat häte nilhokej Lhawuk lhämet häp tä iläyit hin'o.

⁴ Wet cuarenta nekchämis tek wasiche häp haw'uyis wet äp tek t'ukwahen apach'ol.

⁵ Is chik lehanej tä Lhawuk Dios ihanej tä aifwon wet aitasin, hätet iwoye hin'o tä ifwon lhäs. Chik lhäs iwoye m'ak tä ni'isa, itasin t'at yämthilek ileche.

⁶ Tä mälhyejtso, woyaye lhämtes häp Lhawuk Dios. Humin häp lham wet nukwe len'äyij.

⁷ Tsi lham ihänla amehen honhat tä is, häp honhat tä wuj tewok lhayis tä ihi lhäy'e ts'ifwik lhayis, wet inätw'etes tapokwe, häp inät lhayis tä iche chenhas lhäy'e ts'ifwik lhayis tä ihiche lakawayhil.

⁸ Häpe honhat tä wuj yachuyaj tä w'enhahiche, lhäy'e hal'ä lhay tä n'olhäk, lhäy'e akäyek.

⁹ Häpe honhat tä ihichet'a m'ak chik tatäy, wok häp m'ak tä letufw. Iche tuntey tä ihi yämthilek lhen chinaja, häte letachumhiyela chinaj tä ichät tä lhey cobre tä ihiche chenhas.

¹⁰ Wet chik let'ekhen wet lhipsen, wunitay Lhawuk Dios tä lham hiw'en amhohen honhat tä wuj tä is.

Moisés tahuyej Israel lhayis yämthilek nip'ethatahlä Dios

¹¹ Uyayhlä, isit'a chik lep'ethatayhlä Lhawuk Dios. Yej leyej tä lewoye lhämtes tä one'tek lewoye ifwalana.

¹² Wet chik lhipsejen äk, wet awukwey isis tä lhenwethä,

¹³ wet lew'en aläy w'asetas, tson'atas, tä lhäy'epej lhip tä wujpey, wet t'aylhatshi akäywet tä i'amejen,

¹⁴ yej alechäjwethä wet yej p'ethatlä Lhawuk Dios tä itonphähte ajchalis tä ihi Egipto tä yen kwenkaya.

¹⁵ Ihän amchehen ts'anis tä wuj tä ni'isa, wuj amlhäs tä n'ot'ilek ihiche, lhäy'e alhupäsetas, wet äp häpe honhat tä inät newache. Mat Lhawuk hiw'en amhohen inät tä tälho chenaj tä t'un wet leyäyej.

¹⁶ Wet tä lhehi ts'anis hiw'en amhohen äk tä lhey maná, häp n'olhäk tä achätilis nitäfwelayej p'ante. Wet Lhawuk yelhtej amehen alhaklis, yämthilek lepese ale'isyene.

¹⁷ Tä mälhyej'attso, yej wo atichunhayaja wet lhok, “Ow'en m'ayek, häp tä otkhajay wet otchumlhi, wet häp tä okalhi.”

¹⁸ Mat en atichunhayaja Lhawuk Dios, tsi lham tä hiw'en amhohen akhajyhayaj yämthilek lekalhi akäywet, häp tä lham imatitche lhämet p'ante iwoyeje atetsel.

¹⁹ Mat chik amel lep'ethatlä Lhawuk Dios, wet lhen awuhuya dios lhayis tä w'enha lhamej, chik mälhyejtso, ifwalana oyok, kalelhäj tä nilhokej amel anofwiyeja.

²⁰ Wet tä Lhawuk itäyhthenpej wichi tä lechätayepej, mälhhiyejattso amel chik kawoyaye häp lham lhämtes.