Deut 6 - Biblia Wichi

Dios lhämet tä lhamya

¹ Häp tähesna lhämtes Lhawuk Dios tä ne'tek ochufwen amejen yämthilek lhenay achumyaja tä lewoyaye chik lhehihila honhat chik lhenayhla aka honhata.

² Chik lewoye täjtso, n'änhila tä lewunit t'at Lhawuk Dios, wet lewohiyela nilhokej lhämtes häp ifwalas tä kamaj leläy, häp lhämtes tä one'tek lewoyaye, lhäy'e ales, lhäy'e achetsos, häpkhilek wujpe nekchämis chik lheyayhi honhat.

³ Tä mälhyejtso, Israel lhayis, achufwenejen tä lewoyaye wet en achumyaja, häpkhilek newache awit'äyhyaj wet ahäpkhila wichi tä wujpey chik ihihila honhat tä t'os lhäy'e akäyek tet iwoye inät, iläfwelchehen tä ihi, mälhyej tä Lhawuk, atetsel laka Dios, ifwel amhohen.

⁴ Ch'ahuyaye, Israel lhayis. Lhawuk Dios, tajlhamat lham tä lhawuk.

⁵ Humin Awuk Dios, mälhewek ahusek, lhäy'e mälhewek atichunhayaj, lhäy'e mälhewek akhajyhayaj.

⁶ Tihi ahusek nilhokej lhämtes tä ofwel amho ifwalana,

⁷ wet yej leyej, tujlhache tä lechufwenejen ales. En ämeta chik lhehi haw'et, wok lenukwe n'äyij, wok häp lewhäy tä lemä wok lenephä.

⁸ Äytej akwey häp Lhawuk lhämtesna, wet atacho, häpkhilek lhenpej atichunhayaja.

⁹ Häte tiyej aka ch'utey tä lelesayen, lhäy'e aka hupuy lepelis.

Moisés ne'tek Israel lhayis tach'ahuye Lhawuk

¹⁰ Lhawuk Dios ihänla amhohen honhat p'ante hit'untejche lhämet tä ifwenho atetsel Abraham, Isaac, lhäy'e Jacob, wet yok, “Ow'enhihola ales tä lepes lheley.” Häpe honhat tä wujpey hupuy tä ihi wet äp isis tä ka'amelak enhay,

¹¹ wet n'okäywetes tapokwe tä ihiche, häp m'ayhay tä nitälha amehen. Wet iche n'opek lhayis tä ihi tä ka'amelak enhay, wet uvas lhäy'e olivos, tek amel chik letihchä, mat letufwayhla wet lhipsiyejena.

¹² Wet chik mälhhiyejatso, amaj amejen wet yej p'ethatahlä Lhawuk tä lham tä itonphä amel tä lhehi Egipto tä ayen kwenkaya.

¹³ Humin Lhawuk Dios wet woye lhämtes, wet ts'ilkat lham tä lhen Awuka. Wet chik let'uhläk let'unhatche ämet, unhatche t'at häp tä isej Lhawuk lhey.

¹⁴ Yej lhen awuhuya häp wichi tä lhehi lechowej laka dios lhayis.

¹⁵ Tsi Lhawuk Dios tä i'amejen häpe Dios tä nhumina chik õhp'ajtejlhi m'ak chik häpe. Wet ihanej chik iti amejen lewäk wet aitäyhthen nilhokej.

¹⁶ Yej lhelhte Awuk Dios, mälhyej tä lewoyayehte tä lheyayhi Masah.

¹⁷ Yej leyej tä lewoyepej nilhokej Awuk Dios lhämtes tä ne'tek lewoyayepej.

¹⁸ Woyayepej m'ak tä is alhoho, häpkhilek Lhawuk akäjejlhi wet newache awit'äyhyaj. Mat letachumhiyela honhat tä is, häp honhat tä Lhawuk hit'untejche lhämet tä ifwenho p'ante atetsel wet yok, “Ow'enhihola ales tä lepes lheley.”

¹⁹ Chik lewoyayepej m'ak tä Lhawuk akäjejlhi, lhamlak yokwes nilhokej atayhfwas, mälhyej lhämet tä pajche ifwel.

²⁰ Wet ifwala chik häpe chik ales tay'ätshan amehen wet yok, “¿Atsi m'ak tä häpe nilhokej Lhawuk Dios lhämtesna tä ne'tek lewoye?”,

²¹ is chik lechulho lhamel wet lhok, “Olhamel ohäpehente wichi tä Egipto kaniyat yen lakwenkaya. Wet Lhawuk itonphähte olhamel, oisej lakhajyhayaj tä wuj.

²² Wet olhamel ow'ente m'ayhay tä äyteschehen lhäy'e m'ayhay tä wichi iseltejen tä Lhawuk iwoye tä ihi Egipto, tatayhlä niyat lhäy'e laka wichi.

²³ Wet itonphä olhamel tä oihi honhattso, wet ihän n'oyehen honhat p'ante ifwenho lhatetsel, wet hiw'en n'ohohen.

²⁴ Wet Lhawuk Dios ne'tek ohumin häp lham wet owoye nilhokej lhämtes, häpkhilek newache owit'äyhyaj chik häpe wet n'am t'inhen pajtha nämena.

²⁵ Wet chik Lhawuk Dios hiw'en tä ot'amajej lhämtes wet oyen chumyaja, mälhyej tä ne'tek olhamel owoye, häpkhilek takäpfway n'oyejen le'isyaj.”