Deut 5 - Biblia Wichi

Dios lhämtes letetsel tä ihi diez

¹ Moisés ihutwek nilhokej Israel lhayis wet tahuyej tä yok: Israel lhayis, ch'ahuyaye Lhawuk lhämtes lhäy'e lechufwenyajay tä ofwel amhohen ifwalana. Is chik wuj tä alechufwenejen wet woye m'ak tä ne'tek lewoyaye.

² Lhawuk Dios iwoyejehte ajchalis häp lhämet tä hit'unhatche tä lham i'pe chenaj Horeb.

³ Ts'ilakhit'a lhamel tä iwoyeje lhämet, mat häte y'aj amehen tä lhekana ifwalana.

⁴ Lhawuk tahuyejte lhamel tä lham i'pe chenaj, wet tatey hiw'en t'at lewujyaj, wet lech'otey iläte t'at tä yämlhi tä tumho itätaj.

⁵ Wet olham tä otumejlä Lhawuk yämthilek ofwenho lhämet lhamel, tsi nowaye itätaj, häte ihit'a'pe chenaj. Wet Lhawuk yok:

⁶ “Ohäpe Awuk Dios tä aitonphä tä lhehi honhat tä Egipto tä ayen lakwenkaya.

⁷ “Yej len'okwiyej dios lhayis iyhäj. Ts'ilak olham tä ohäpe aka Dios.

⁸ “Yej lhenlhi amho acheyä tä akwey lhenek tä lhen häpeya aka dios. Wet yej lhenlhi amho lepeyak tä letech'aynej m'ak tä ipuleye, wok m'ak tä i'pe honhat, wok m'ak tä ihi inätes tä ichufwi honhat.

⁹ Yej let'upiyejchä tähestso wet yej len'okwiyej. Tsi olham ohäpe Awuk Dios wet n'am humin chik õhp'ajtitlhi n'oyej m'ak chik häpe. Wet otasin lhamel tä n'äyi n'oho wet iwoye m'ak tä ni'isa, lhäy'e leles, lhäy'e lechetsos.

¹⁰ Mat op'altsenhen wet otiyej ohumnhayaj lhamel tä ihuminn'o wet iwoye olhämtes, pajla'tha nichäte leles tä lepes lheley.

¹¹ “Yej w'et lewo olheya tä ohäpe Awuk Dios. Tsi elh chik häpe chik w'et iwo olheya, oyenla tesayej.

¹² “Yej lep'ethatlä ifwala tä n'ot'elakw'et wet en amajcheta n'oyej, mälhyej tä olham tä ohäpe Awuk Dios one'tek lewoye.

¹³ Chumlhi seis ifwalas, enlhi nilhokej achumet.

¹⁴ Mat ifwala siete häp ifwala tä lhen elakw'eta n'oyej tä ohäpe Awuk Dios. Chik lechätepej ifwalatso, leyej achumet. Yej chumyenlhi äs, wok äse, wok akawo tä hin'o wok atsinha, wok alä w'asetaj wok asno, wok alä chik häpe, wok hin'o tä w'enha lhamej tä ihi haw'et. Tsi is chik akawos iwo t'elakw'eta, mälhyej tä am lewo elakw'eta.

¹⁵ Tichunche tä am ahäpehte Egipto lakwenek, wet olham oaitonphä tä lhehi häp tä isej okhajyhayaj tä wuj. Häp tä tamenej tä one'tek lhen amajcheta ifwala tä n'ot'elakw'et.

¹⁶ “Humin ajcha lhäy'e ako, mälhyej tä olham tä ohäpe Awuk Dios one'tek lewoye, häpkhilek ais alhoho wet pitaj ifwalas tä lhehi honhat tä ow'en amho.

¹⁷ “Yej lelän aelh.

¹⁸ “Yej lewo akain'oyaja.

¹⁹ “Yej let'etan.

²⁰ “Yej lesufwkane aelh.

²¹ “Yej lekäne atsinha tä aelh lech'efwa. Yej lekäne aelh lew'et, wok laka honhat, wok lakawo tä hin'o wok atsinha, wok lelä w'asetaj wok asno. Yej lekäne m'ak at chik häpe tä lewuk aelh.”

Wichi lenowayhyaj ihi

²² Wet Moisés äp tahuyej wichi wet yok: Tä ajchalis lhaihute chenaj, äytaji lepak häp Lhawuk tä ifwenhomche lhamel häp lhämtestso tä tumho itätaj lhäy'e pule tä wuj tä ichalaj. Tä ileyej, wet ilesayen lhämtestso tä i'pe tunte lhipey wet hiw'ente n'oho.

²³ Mat tä lhamel ilätehte lepak tä tumho honataj, wet äp hiw'en itäj tä y'uho tä i'pe chenaj, wet nilhokej laka niyatey lhäy'e hin'ol tä thänhäy iho n'oye

²⁴ wet yok, “Matche tä Lhawuk Dios hin'älit n'oyejen lewujyaj tä isi lhäy'e lakhajyhayaj, wet olhamel oläte t'at lepak tä tumho itätaj. Ifwalana olhamel ow'en t'at tä y'inhit'a elh chik Dios tahuyej.

²⁵ Mat athana tek ot'uhläk itätaj hip'ohen olhamel wet oy'inhen. Tsi kalelhäj chik äp yachajok oläte lepak häp Lhawuk Dios, nech'e oy'inhihena.

²⁶ Tsi ihichet'a hin'o chik iläte lepak häp Dios tä iläy chik tumho itätaj, mälhyej tä y'aläte, wet iläy.

²⁷ Is chik am t'at tä lehoye wet ch'ahuye nilhokej m'ak chik Lhawuk Dios ifwenla amho. Wet lefwenla n'ohohen yämthilek olhamel owoye.”

²⁸ Wet tä niyateytso yämlhi n'oho, Lhawuk iläte t'at lhämtes. Wet häp tä tahuy n'oyej wet yok, “Oläte nilhokej lhämtes häp wichi, wet is t'at.

²⁹ Is chik mälhyejpejtso letichunhayajay wet nileyache, wet iwunitn'o wet nilhokej ifwalas iwoye t'at olhämtes, häpkhilek lhamel lhäy'e leles isej yämthilek tiyäj'attsiy.

³⁰ Mäh fwenho lhamel, is chik yäple lewukwey tä tsänt'ähes.

³¹ Mat am yej lhek, en'oyej tä oikana, ofwenla amho nilhokej olhämtes. Is chik lechufwenejen lhamel yämthilek iwoye chik lhamel ihi honhat tä lewuhuy tä ow'enhihola.”

³² Tä mälhyejtso, achufwenejen wet en achumyaja m'ak tä Lhawuk Dios ne'tek lewoyaye, wet yej leyej.

³³ Tujlhache nilhokej m'ak tä Lhawuk ipäyen amehen, häpkhilek atamsekis ihi wet pitaj nekchämis chik lhehihila honhat tä lham hiw'enla amhohen yämthilek alewuhuy.