Deut 30 - Biblia Wichi

Chik wichi iwo lehusey iyhäja, Dios itihiyeja kanhi m'ayhay tä ni'isachehen tä nichätpe lhamel

¹ Chik nichät atapehen nilhokej m'ayhay tä oyämetso, häp Lhawuk Dios lakäpfwayajay tä isen lhäy'e lakäpfwayajay tä ni'isachehen tä ofwel amhohentso, wet chik lhehiche honhates tä lham aithatehen, wuj tä lewo atichunhayaja,

² wet lewoyay ahusey iyhäja wet lewoyaye lhämtes, mälhewek achowhal lhäy'e mälhewek atichunhayajay, häp amel lhäy'e ales, mälhyej tä one'tek lewoyaye ifwalana,

³ chik lewoyaye täjtso, Lhawuk Dios iwohla elha han'äyij wet itihla amejen lep'altsenyaj. Wet yachajiholak ihutwek amel tä letälhehen honhates tä lham aithatehen.

⁴ Tej chik lhehiche honhates tä wuj tä atosehen, mat Lhawuk Dios t'uhla amchehen wet ainachajiyela aka honhat.

⁵ Aichätyenhihola honhat tä atetsel yen lew'eta, wet alewuhuyla. Wet takäpfwayhiyeja amehen m'ak tä is, wet lhäy'ehila lhip chik wujpe ales, inuhla'pe atetsel.

⁶ Wet iwohla letetnekayeji ahusek häp lhämet, lhäy'e ales, achetsos, häpkhilek mälhewek achowhal lhäy'e mälhewek atichunhayajay tä lehumin Lhawuk Dios, yämthilek kat'ilahen.

⁷ Wet ichätyenla'pe nilhokej lakäpfwayajay tä ni'isachehen häp atayhfwas lhäy'e wichi tä n'äyi amhomche.

⁸ Wet amel lhäpnhiyeja Lhawuk Dios wet lewohiyela lham lenech'ethayaj, wet alechufwenejen nilhokej lhämtes tä one'tek lewoye tälhe ifwalana.

⁹ Wet chik mälhyejtso, lham takäpfwayhiyejela m'ak tä is nilhokej m'ak at chik häpek lhenlhi, wet wujla'pe ales, lhäy'e aläy, wet wujla akäs yachuyaj. Oyok matche, Lhawuk Dios akäjiyejlhila m'ak tä is chik iwoyej amehen, mälhyej tä akäjejlhi m'ak tä is tä iwoyeje amel atetsel,

¹⁰ chik amel letach'ahuye wet lewoye nilhokej lhämtes tä õ'lesayen tä ihi Lehina, wet lemälhtejwek achowhal lhäy'e atichunhayajay tä lewo ahusek elha.

Dios lhämet tek atofwe ahilä

¹¹ Häp Lhawuk lhämet tä ofwel amhohen ifwalana athahit'a amhohen, wet häpkhit'a m'ak chik kasakanayej.

¹² Ihit'a puleye wet tamenej chik lhok, “¿Atsihilak tiyäj puleye wet ichäj n'amehen wet itäfwnhat n'amejen yämthilek y'alhaichufwenejen?”

¹³ Häte tek iw'echehi lewomekitaj wet tamenej chik lhok, “¿Atsihilak tiyäj w'echehi lewomekitaj wet ichäj n'amehen wet itäfwnhat n'amejen yämthilek y'alhaichufwenejen?”

¹⁴ Tek mälhyejtso. Lhawuk lhämet tek atofwe ahilähen, ihi t'at apästey wet ihi t'at atichunhayaj yämthilek lewoye.

Tshupyenaye n'ow'atshancheyaj

¹⁵ Lhek yahin, ifwalana ofwel amhohen m'ak tä häpe n'ow'atshancheyaj, lhäy'e m'ak tä is, lhäy'e n'ot'ilek, lhäy'e m'ak tä ni'isa. Wet tshupyene m'ak tä lehumin.

¹⁶ Chik lewoye m'ak tä ofwel amhohen ifwalana, wet lehumin Lhawuk Dios wet lenukwe len'äyij, wet lewoye nilhokej lhämtes lhäy'e lechufwenyajay, wet tek let'inhihena. Mat wujla'pe ales, wet Lhawuk Dios takäpfwayhla amehen chik lhehi honhat tä haw'et.

¹⁷ Matlak kawoyaye m'ak tä ofwel amhohenna, wet leleyej Lhawuk wet alewetahatej dios lhayis tä w'enha lhamej, wet letakhoschufwi tä len'okwiyej wet lhen awuhuya,

¹⁸ chik lewoye täjtso, ofwel amhohen athana tä let'inhihena, kalelhäj t'at. Wet pitajit'ala ifwalas chik lhehi honhat tä lechäthihola tä tumej tewok Jordán lhip elh.

¹⁹ Ifwalana one'tek pule lhäy'e honhat ifwenla ates, tsi one'tek letshupyene m'ak tä lehumin: n'ow'atshancheyaj wok n'ot'ilek, n'okäpfwayajay tä is wok n'okäpfwayajay tä ni'isa. Oyok, tshupyenaye n'ow'atshancheyaj häpkhilek kat'ilahen, lhäy'e ales, lhäy'e iyhäj tä lepes lheley.

²⁰ Huminay Lhawuk Dios, yej leyej. Woye m'ak tä ifwel amhohen. Tsi tähestso häp tä haw'atshancheyaj tälhe, wet pitajla nekchämis chik lhehi honhat tä lham hit'untejche p'ante lhämet tä ifwenho atetsel Abraham, Isaac, Jacob, tä yok, “Ow'enhihola ales.”