Deut 28 - Biblia Wichi

Dios lakäpfwayajay tä isen iyej wichi chik iwoye lhämtes

¹ Chik matche tä lewoye m'ak tä Lhawuk Dios ne'tek lewoye, wet alechufwenej tä lhen achumyaja nilhokej lhämtes tä ofwel amhohen ifwalana yämthilek lewoye, chik mälhyejtso, Lhawuk Dios ayenla häpeya wichi tä inu'pe iyhäj tä i'pe honhat.

² Wet nilhokej lakäpfwayajay tä isenna nitsäyhla atape wet ihla amejen, tsi lewoye t'at Lhawuk Dios lhämtes:

³ Takäpfwayhiyeja amehen m'ak tä is chik lhehi hupuy wok lhehi tayhi.

⁴ Lakäpfwayaj tä is ihiyeja ales, lhäy'e akäs yachuyaj, lhäy'e aläy w'asetas les, lhäy'e aläy tson'atas les, lhäy'e aläy kayla les.

⁵ Takäpfwayhiyejela m'ak tä is häp akäs yachuyaj, häpkhilek wuj lhay chik lelanhi. Häte tek tatäyhla amejen pan.

⁶ Ahäpkhila wichi tä Lhawuk takäpfwaye nilhokej m'ak at chik häpek yenlhi.

⁷ Wet Lhawuk tach'otla amehen wet lekalhihila atayhfwas chik fwetaj inu amehen. Lhaihuthichelawek yämthilek inu amehen, mat lhokwesila wet nemhit kalelhäjchehchä. Tsi inuhikwela alhoho tä ilethan ahilähen.

⁸ Lhawuk lakäpfwayaj tä is ihiyeja akapuchehis yämthilek tapokwe, lhäy'e nilhokej m'ak tä lhenwethä. Wet iwohla akäjyaja chik lhehi honhat tä lham hiw'enla amhohen.

⁹ Chik lewoye lhämtes wet lenukwe len'äyij, wet Lhawuk kalelhäj tä ayenla häpeya laka wichi tä t'amajchet, mälhyej lhämet tä hit'unhatche tä ifwel amhohen.

¹⁰ Häpkhilek nilhokej wichi tä i'pe honhat hiw'enla tä matche tä ahäpe Lhawuk laka wichi, wet lhamel nowayhla amehen.

¹¹ Lhawuk hin'älthila amejen lakäpfwayaj, wet hiw'enla amhohen wujpey ales, wet aläy itshätäy wuj tä lhaichihelit, wet wuj akäs yachuyaj lhay tä lelanhi tä ihi honhat tä hit'untejche p'ante lhämet tä ifwenho atetsel tä yok, “Ow'enhihola ales.”

¹² Wet ifwoynhichela lehi lakäywet tä wuj tä häpe pule, yämthilek wuj pelhay tä nitsäype aka honhat chik nichätepej lewhäy, wet takäpfwayhiyela nilhokej achumtes tä lhenlhi. Wet lecheyjänthiyeja wujpe wichi tä i'pe honhat aka chinaj t'äj. Mat amel tek let'alhiyela lhamel yämthilek icheyjänhat amejen laka chinaj t'äj, tsi tek lewatlahlä.

¹³ Lhawuk ayenla häpeya wichi tä iyhäj iwujyen, ayenhit'ala w'et m'ayeka. Ahäpkhila wichi tä iyhäj lhetek, ihichet'ala wichi chik inu atapehen. Mat is chik letach'ahuye wet lewoye lhämtes häp Lhawuk Dios tä one'tek lewoye tälhe ifwalana. Achufwenejen, enay achumyaja

¹⁴ wet yej leyej. Wet yej lhen awuhuya dios lhayis iyhäj.

M'ak tä ni'isa nichätpe wichi tä niwoyaye Dios lhämet

¹⁵ Mat chik kawoyaye Lhawuk Dios lhämtes tä one'tek lewoye tälhe ifwalana, wet chik akachufwenayej yämthilek lhen achumyaja, chik mälhyejtso, nilhokej m'ayhay tä ni'isahenna nichätla atapehen wet ihla amejen:

¹⁶ Awit'äyhyaj ihla amejen chik lhehi hupuy wok lhehi tayhi.

¹⁷ Nemla lhay iche akäs yachuyaj, wet tatäyhla amejen pan.

¹⁸ Lewit'äyhyaj ihihila ales, lhäy'e akäs yachuyaj, lhäy'e aläy w'asetas les, lhäy'e aläy tson'atas les, lhäy'e aläy kayla les.

¹⁹ Nilhokej m'ayhay chik lefwetajla lhenlhi, lewit'äyhyaj ihihila.

²⁰ Lhawuk ichenla amehen m'ak tä ni'isa, pajla'tha nemhit kalelhäj m'ak tä lefwetaj lewoye. Chik lefwetaj lhenlhi m'ak chik häpe, alhakli ihi t'at, wet pitajit'ala ifwalas wet aitäyhthila m'ak tä ni'isachehen tä lewoye wet leleyej Lhawuk.

²¹ Lhawuk ichenla amehen n'otnhayaj wet let'inhenla chik lhehi honhat chik lhenla haw'eta.

²² Ichenla amehen äytes tä wuj tä ni'isa, telätaj, t'ukwatas, nahayoj tä äytaji, honhat tamchäy, wet lewos tufw akäs. Häp tähestso m'ayhay tä ailhaklitwethä pajla'tha aitäyhthen.

²³ Wet tek pelhay nitsäyhla atapehen, wet honhat tamchäy, wet akäs iwohit'a lhaya.

²⁴ Tajlhamhiyelat honhat lhäy'e holo chik Lhawuk itsäyhla atapehen, pajla'tha aitäyhthen.

²⁵ Lhawuk tach'othiyela atayhfwas yämlek ikalh amhihen. Alehuthichelawek yämthilek lenuye lhamel, mat ayokwesila wet nemhit akalelhäjchehchä. Tsi lenuhikwela alhoho tä lelethanlä lhamel. Wet nilhokej niyatey tä i'pe honhat hiw'enla m'ak tä wuj tä ni'isa chik i'amejen, wet ahäpkhila m'ak tä lhäy'e lhip tä tanhoch'ay.

²⁶ Afwenchey tä n'okotses lhäy'e itshätäy tä fwitses tufwila hap'itseyhay, wet nehit katsik yokwes.

²⁷ Wet Lhawuk ilänla amejen amostas, ahätehlat iwoye Egipto lheley p'ante amostas ilänhen. Wet t'ukwahla asanis, wet chesoylak ailänhen yämthilek afwtsaj imälhewek asanis. Wet ihichet'ala kacha yämthilek aichesat wet noj anhayaj.

²⁸ Häte aiwelanthihena, wet a'asnamisila, wet lehanhiyejt'a m'ak tä i'amejen.

²⁹ Ahätehlat iwoye asnamis tä niw'enache honhat, õ'tonlhi t'at. Nilhokej m'ak chik lefwetaj lhenlhi, niwohit elh chik isila alhoho. N'och'atkanyaj itihla amejen, wet õ'aisohlawethä, wet ihit'ala katsik tach'otla amehen.

³⁰ Letawhayeyhila, mat hin'o elh imähiyeja hach'efwa. Lhenhilhila awukwe, mat tek lhehlachufwi. Letihlahchä uvas, mat letufwit'ala lhay.

³¹ Õ'länla alä w'asetaj tä ihi tä letatache, mat letufwit'ala t'isan. Õ'sohla amej alä asno, wet õyachajit'ala ame. Atayhfwas isohla amej aläy tson'atas, wet ihit'ala katsik tach'otla ame yämthilek äp lesakanej.

³² Õhw'enyenla amej ales chik õhw'enho wichi tä w'enha lhamej, wet wuj tä letichunch'oye lhamel, wet nemla lew'en.

³³ Wet wichi tä katäfwelayej häpkhilek tufw akäs lhay tä tälho achumet tä lewoye. Wet wujla ateläythayaj chik ihla amej wet matche tä alhakli ihi.

³⁴ Wet chik lew'enla tähestso, awelanla.

³⁵ Wet Lhawuk ilänla amejen amos tä ihiche akamchetey, lhäy'e echey, lhäy'e mälhewek asanis, wet lechesihent'ala.

³⁶ Wet amel lhäy'e rey tä lhenla aka niyata, Lhawuk ayachajiyela wichi tä katäfwelayej lhäy'e tä achätilis niw'ena'pe p'ante. Wet chik lheyayej lhamel, len'okwihiyeja lhamel laka dios lhayis tä w'enha lhamej tä n'otkwe lhenhay, hal'ä wok tunte.

³⁷ Wet ahäpkhila m'ak tä tanhoch'ay chik õyenpej tichunhayaja m'ak tä i'amejen. Wet nilhokhiyeja wichi tä Lhawuk ihän amehen itihla amejen leläkwyhanyaj.

³⁸ Chik letutchey, wujla yachuyaj lhoy chik lethatchä mat lhimphajila lhay chik lelanhi, tsi chol tä ihämthila.

³⁹ Letihlahchä uvas wet let'uhiyela, mat ihichet'ala hat'es chik tälho yämthilek leyäyej. Wet niwohit akäs chik lelanhihila lhay, tsi lewos tä ihämthila.

⁴⁰ Wet olivos tapohiyeja aka honhat, mat lew'enhit'ala aceite tä tälho. Tsi tä kamaj n'oya lhay, nämche t'at.

⁴¹ Lewohla alesa, hin'ol, atsinhay, mat ihit'ala amej. Tsi õ'hänhiyela honhat elh wet õyen kwenkaya.

⁴² Wet chol ihämthila nilhokej hal'äy lhäy'e yachuyaj lhay tä ihi aka honhat.

⁴³ Wet wichi tä kahäpeya Israel lhayis tä ihi aka honhat, lhamel inuhla atapehen wet amel tek aw'awulhihila lhamel.

⁴⁴ Lhamel icheyjänthila amejen laka chinaj t'äj, wet tujlhahla amehenpe. Lhamel inuhla atapehen wet amel w'et am'ayhay t'at.

⁴⁵ Nilhokej n'owit'äyhyajayna nämla atapehen wet ihla amejen pajla'tha aitäyhthen, häp tä kach'ahuyaye Lhawuk Dios yämthilek let'amajej nilhokej lhämtes tä ne'tek lewoye.

⁴⁶ Awit'äyhyajayna häpkhila n'otetnek tä hin'älit tä Lhawuk matche tä iti amejen ates, lhäy'e ales, pajla'tha nichäte lepes lheley.

⁴⁷ Tsi tek a'käjejlhi Dios tä hiw'en amhohen akäywet tä wuj, wet tek alhachaje yämlek lhen Awuka.

⁴⁸ Wet häp atayhfwas tä Lhawuk ichenla amehen häpkhilek aichumyenwethä. Wet nehläs ailänhihena, lhäy'e neheläp, wet haw'uyis ihichet'ala, mat ap'elitseslach'oye nilhokej m'ayhay. Lhawuk itihla amejen ateläythayaj tä wuj, wet äytajichela chik õ'ayen n'okawosa pajla'tha anofwej.

⁴⁹ Lhawuk ichenla amehen wichi tä tälhe honhat tä atofwe, yämthilek tatay ahilähen. Wet nämla amehen thahya, hätehlat iwoye iyhäjkottaj tä lhaithatejchä amel. Häpe wichi tä kahanayej lhämet,

⁵⁰ wichi tä fwitses, tek hap'altsentses, wet hip'altsenhit'ala wumhay lhäy'e nä'tshas.

⁵¹ Lhamel tufwihena aläy wet tufwila yachuyaj lhay tä ihi aka honhat, pajla'tha anofwej. Wet niwohit m'ak chik imälhe amejen, tsi nofwila aka trigo, lhäy'e hat'es, aceite, lhäy'e aläy w'asetas les, lhäy'e aläy tson'atas les, lhäy'e aläy kayla les, wet nehläs ailänla.

⁵² Lhamel ilunhiyejawethä nilhokej aka hupuy lhayis yämthilek inuye, pajla'tha nichät katsi n'olafwey tä lep'otes tä atoschephä lhäy'e tä tach'opwayhen tä lefwetaj häpkhilek aisej. Matche, lhamel inuhiyela nilhokej hupuy tä ihi amel aka honhat tä Lhawuk Dios hiw'enla amhohen.

⁵³ Wet tä atayhfwas inuye haw'etes, wujla nehläs chik ailän, pajla'tha letufwen at ales tä Lhawuk Dios hiw'en amho.

⁵⁴ Wet hin'o tä lechowej ihi wet ihumnhen iyhäj, nemla hip'altsen lepuhfwa, lhäy'e lech'efwa tä lehumnek, lhäy'e leles iyhäj tä imälhehi.

⁵⁵ Tsi tek t'uhläk tisi lew'et lheley häp leles t'isan tä tufw. Ihichet'ala n'olhäk chik atayhfwas inuyehen haw'etes wet iti amejen alhakli tä wuj tä ni'isa.

⁵⁶ Wet häp atsinha tä lechowej ihi wet ihumnhen iyhäj, häp elh tä hiw'en m'ayek wet ihichet'a ifwalak niwoya lenisäja, lham nemla hip'altsen lech'efwa, lhäy'e leles.

⁵⁷ Tsi tek t'uhläk tachufwiyej lew'et lheley tä tufw leles tä nech'e nichätchehchä, lhäy'e tä tufw lakahi tä tälho lets'e. Mat weskatej t'at tä tufw, tsi matche tä niwohit m'ak chik iche yämthilek tufw häp ifwalas tä atayhfwas inuye haw'etes wet iti amejen alhakli tä wuj tä ni'isa.

⁵⁸ Chik akachufwenayej yämthilek lewoye nilhokej m'ayhay tä õ'lesayen tä ihi Lehina, wet lhen w'et m'ayeka häp Lhawuk Dios lhey tä lewujyaj ihi,

⁵⁹ lham ichenla amehen n'owit'äyhyajay tä äyteschehen, lhäy'e ales tä lepes lheley, häp n'otnhayajay tä wuj tä ni'isa, wet äp ihichet'a kacha yämthilek leches.

⁶⁰ Ichätyenla atapehen nilhokej n'otnhayajay tä ichenehte Egipto, häp m'ak tä ajchalis lhäy'e lhip tä nowayehte, wet pitajla ateläythayaj chik i'amejen.

⁶¹ Mat tajlhamhiyet'a tähestso. Nichätla amehen n'otnhayajay lhäy'e n'owit'äyhyajay tä lheyis newahi häp Lhawuk lhämet Lehina, pajla'tha let'inhen.

⁶² Wet am, Israel, tä ahäpe wichi tä wujpey, athana hätet iwoye katetsel tä ihi pule, nemla awujpe, tsi häp tä lewohiyet'a Lhawuk Dios lhämet.

⁶³ Mälhyej tä Lhawuk ihumin p'ante tä tach'ot amehen wet yäm wujpey ales, nech'e ihumnhilak nemhit lheche wet attäy. Lhawuk aitihiyeja kanhihlä häp honhat tä lhenay haw'eta,

⁶⁴ wet aifwtsatkatla'pe honhatil wet lelhahiyeja wichi tä w'enha lhamejen, pajla'tha lechäte honhat lhipey tä atosehen. Wet lhenla awuhuya dios lhayis tä n'otkwe lhenhay tä hal'ä wok tunte, häp m'ak tä amel tek letäfwelej, lhäy'e achätilis, hiw'enhit'a p'ante.

⁶⁵ Wet chik lheyayej wichitso, atamsek ihihit'ala wet elakw'et ihichet'ala. Tsi Lhawuk itihla amejen anowayhyaj, wet nemla atelhoy isiche, wet noj akhajyhayaj.

⁶⁶ Lhehihipeja awit'äyhyaj, wet tä ifwala lhäy'e tä honatsi lhenla atichunhayaja ilek tä nämla ame.

⁶⁷ Wet tä wuj anowayhyaj tä lew'en m'ayhay tä lew'en, wet tä nech'e fwala lhohlak, “Is chik honatsi”, wet tä honatsi lhohlak, “Is chik ifwala.”

⁶⁸ Wet tej tä Lhawuk ifwelte amhohen tä yok, “Ihichet'ala ifwalak lhäple Egipto”, matkat lhamlak ayachaje, lhekhichela barcos. Wet chik lechäte, amenlak alefwelwethä. Lene'tehlak atayhfwas aichäjej laka chinaj t'äj yämthilek ayen lakawosa. Mat nehit katsik iwatlahläk aichäj.