Deut 23 - Biblia Wichi

Iyhäj tä õ'näyejo chik fwetaj ihoye Dios laka wichi chik lhaihutwek

¹ Hin'o chik õ'käjiche lechänsilis t'akay, wok õ'lanhi lho, õ'näyejo chik ihoye Lhawuk laka wichi chik lhaihutwek.

² Hin'o tä lajcha nikalelhäja, õ'näyejo chik ihoye Lhawuk laka wichi chik lhaihutwek, pajla'tha nichäte wichi tä lepes lheley.

³ Häp Moab lhayis, Amón lhayis, õ'näyejo chik lhayej Lhawuk laka wichi, pajla'tha nichäte wichi tä lepes lheley.

⁴ Tsi tä amel lenukwehte lhamel laka honhat tä letälho Egipto, lhamel hiw'enhit'a amhohen inät lhäy'e äk. Mat lhamel iwo lakahaya Balaam, Beor lhäs tä lew'et Petor tä ihi Mesopotamia, tä t'uhläk profetatso takäpfwayej amehen awit'äyhyaj.

⁵ Mat Lhawuk Dios tach'anlhahiyet'a Balaam. Wet häp tä lakäpfwayaj tä ni'isa tä fwetaj iwoyej amehen häpe t'at m'ak tä is, tsi Lhawuk aihumnhen.

⁶ Tä mälhyejtso, yej ale'isyene lhamel yämthilek letamsekis ihi nilhokej ifwalas tä leläy.

⁷ Mat oyok, yej lhen w'et m'ayeka häp Edom lhayis, tsi amel aiyhäj t'at. Häte wichi tä ihi Egipto, tsi ajchalis ihihte lhamel laka honhat.

⁸ Lhamel lechetsos häpkhilek tiyäjo wet lhayenla lhipa Lhawuk laka wichi.

Lhawuk ne'tek nifwotaj t'uye lhamel lew'et

⁹ Chik amel alehuthiwek lhip tä lehoye aka'tshayaj, is chik wuj tä let'amaj amejen häpkhilek newache m'ak chik ni'isa chik i'amejen.

¹⁰ Elh chik häpe amel, chik leles nitsäy tä honatsi tä imä wet kok'ayeje, is chik yikch'oye lew'et.

¹¹ Wet chik honaj is chik ilej lhamche, wet chik fwala y'uy nech'e yäpnho lew'et.

¹² Häte is chik lhenlhi lew'et tä iw'echehi lhip tä lhehi häpkhilek lehoyepej chik let'alham.

¹³ Is chik lep'ajtej aka'tshayajchal tä letilhäjlhi m'ak chik itselhäj, häpkhilek lechunkat tä letij chowej wet häp tä let'alhamche. Wet chik leleyej, lepotejpe honhat.

¹⁴ Tsi Lhawuk Dios ilunche t'at amel tä lhehi lhip tä alehuthiwek, yämthilek t'u amehen wet tach'ot amehen yämthilek lekalhi atayhfwas. Tä mälhyejtso, is chik lhip tä lheyayhi häpe n'ot'amajchet häpkhilek Dios niw'ena m'ak chik kok'aye chik ihi. Chik nimälhyayejtso, Dios yikhila hach'oyehen.

Wo lew'eta elh chik n'okawo chik ilethanlä lewuk

¹⁵ Chik elh tä n'okwenek yikch'oye lewuk wet ilethan amehen, is chik lewo w'eta. Yej lhachaje hin'o tä lewuk tä yikch'oye.

¹⁶ Ch'anlhaye t'at tä i'amejen tä ihi hupuy chik häpe tä amel haw'et. Wet isit'ak iche elh chik ilhaklit.

Lhawuk n'äyejo laka wichi chik yen n'okhayajayej lakain'oyaj

¹⁷ Amel tä ahäpehen Israel lhayis, hin'ol lhäy'e atsinhay, iwohiyet'ak leten iyhäj wichi tä w'enha lhamejen lakeyis. Tsi lhamel iwoye lakey tä hich'atej tä ni'isa tä lhamel iwo lakain'oyajahi len'okhayajw'etes tä fwetaj ikäjyenlhi laka dios lhayis.

¹⁸ Aelh chik häpe chik mälhyejtso lakain'oyaj tä iwoye, yej wahnej chik ihäne Lhawuk Dios lew'et häp chinaj t'äj tä lakain'oyaj laha. Tsi tähestso häp tä iwäkyhayen häp Lhawuk Dios.

M'ak chik lecheyjäntej aelh, yej fwayhatpe laha

¹⁹ Chik lecheyjäntej aelh aka chinaj t'äj, wok n'olhäk, wok m'ak at chik häpe, yej fwayhatpe tä lene'tek tiskanpe.

²⁰ Mat häp hin'o tä kahäpeya Israel, häp tä lefwayhatpe m'ak tä let'alheje chik tiskanpe lecheyjänhat. Mat häp elh tä häpe Israel yej woyeje täjtso, häpkhilek Lhawuk Dios takäpfwayhiyeja m'ak tä isen nilhokej m'ak tä lhenwethä chik lhehi honhat tä lhen haw'eta.

Matitche t'at m'ak tä lefwenho Dios

²¹ M'ak at chik häpek lefwenho Lhawuk Dios, is chik yofwajkwet lewoye. Tsi is chik lehanej tä lham yenla tesa amej chik kamattache ämet tä pajche lefwenho.

²² Atesit'a chik newache m'ak chik lefwenho Lhawuk.

²³ Mat chik let'uhläk lefwenho ämet chik häpe, is chik lematitche t'at.

Tufw aelh lakäs mat yej chäje haw'et

²⁴ Chik letiyäjo aelh laka uvas, tufw t'at mat yej chäje haw'et.

²⁵ Wet chik letiyäjo aelh lakäs trigo, tonhiche lhay mat yej lhisthen.