Deut 22 - Biblia Wichi

W'enhahiche m'ayhay tä Dios ne'tek wichi iwoye

^1-3 Chik iche m'ak at chik häpe tä tatäy, weyis wok tson'ataj tä lewuk aelh, wet lew'en, isit'ak tet kaw'ena. Is chik lhachaje elh tä lewuk. Wet chik lewuk atofwehlä haw'et, ihi lhip elh, wet katäfwelayej hin'o tä häpe, tä mälhyejtso, is chik lechäje haw'et wet let'amajej pajla'tha lewuk t'ukwe, wet häp tä nech'e lhachaje. Häte chik asno wok n'ow'uy chik tatäy tä lewuk aelh, wet lew'en, isit'ak tet kaw'ena. Is chik letach'ote aelh wet lhachaje m'ak tä lewuk.

⁴ Wet chik lew'en aelh lelä asno wok weyis tä nichät katsi tä ihi n'äyij, isit'ak tet kaw'ena, mat ch'ote lewuk tä ineyhatphä.

⁵ Isit'ak atsinha taw'uyhi hin'o lew'uy, wet hin'o isit'ak taw'uyhi atsinha lew'uy. Elh chik häpe chik iwoye täjtso iwäkyhayen Lhawuk Dios.

⁶ Chik lelhoke afwenche lhup tä ihi hal'ä wok ihonhate tä lelesas wok lhich'ulh ihi tä lako t'upeype, isit'ak lep'ajtej lako häp leles wok lhich'ulh tä letachuma.

⁷ Ts'ilak leles wok lhich'ulh tä letachuma wet letach'anlhaye lako tä yik, häpkhilek Dios lakäpfwayaj tä is i'amej wet pitaj haw'atshancheyaj.

⁸ Wet chik lhenlhi awukwe, lafwejche lhip häp lhip tä tumphä, häpkhilek elh chik iho'pe nichätahchä. Tsi elh chik nichätchä tä tälhpe, amlak amenhat, lhäy'e haw'et lheley.

⁹ Chik letihchä uvas, yej lhahtej iyhäj yachuyaj, häpkhilek newache m'ak chik lemenyenej wet katufwa m'ak tä letihchä, lhäy'e uvas tä lelanhi lhay.

¹⁰ Chik lesaji akäsw'et, yej p'ajtej asno häp weyis tä letonyenej arado.

¹¹ Yej lhen haw'uya n'oyik tä õ'lhahtej lino häp tson'ataj w'ole.

¹² Tihi lhawol tä õ'tolnhathen häp cuatro lepesey häp haw'uy tä letaw'uyhi.

N'osufwkanyaj tä õ'tiyej atsinha

¹³ Chik hin'o yen ch'efwaya atsinha, mat tä isakanej ileyej tä ihumin,

¹⁴ wet t'isufwkane wet ifwenhomche wichi wet yok, “Oiyejnaj atsinhana wet oyen och'efwaya. Mat ow'en tä mathichet'a tä olham tä ochunej, pajche n'och'efwa t'at”,

¹⁵ tä mälhyejtso, lhutsha lajcha lhäy'e lako is chik lhamel ihäne lhäse häp hin'ol tä thänhäy tä ihi hupuy tä lhamel lew'et, wet ipäynhiyela häp m'ak tä yäm kalelhäj tä matche, häpkhit'a n'och'efwa.

¹⁶ Wet lhutsha lajcha is chik ifwenho hin'ol tä thänhäy wet yok, “Ow'enhonaj olhäse häp hin'otsi yämthilek häpe lech'efwa. Mat athana nemhit ihumin atsinha.

¹⁷ Mat nech'e ifwenhomche wichi tä yäme tä ni'isa atsinha, wet itiyej lesufwkanyaj tä hin'äfwlhatlhi tä yäme tä pajchet n'och'efwa olhäse. Mat olham tä ohäpe lajcha, olham tä ohanej, wet ow'en tä ihichet'a hin'ok lhay'ajej.” Tä lhutsha lajcha iwoyetso, is chik hich'en katsi sábana tä ihi tä tatache häp hin'ol tä thänhäy.

¹⁸ Wet is chik hin'ol tä thänhäy itsoklhi hin'o wet itasinlhi,

¹⁹ wet ne'tek tiskan letape, hiw'enho lhutsha lajcha cien chinaj t'äj mhoy tä plata, laha lesufwkanyaj tä itiyej lhutsha tä kamaj kan'och'efwaya tä iyej Israel lhayis. Wet atsinhatso is chik iyej t'at hin'o wet hin'o is chik nileyayej pajla'tha ileyej honhat.

²⁰ Mat chik matche tä lhutsha pajche n'och'efwa,

²¹ is chik õ'tonphä tä ihi lew'et wet hin'ol tä ihi hupuy ilänhiyeja tuntey, tä lham iwoye m'ak tä wuj tä ni'isa tä ihi Israel wet hin'äfwlhat lajcha. Chik amel lewoye täjtso, nofwila m'ak tä ni'isa tä i'amhihen.

Laha iche m'ak tä ni'isa tä hin'o iwoye wok atsinha iwoye

²² Chik õhw'en hin'o tä imäyej atsinha tä lech'efwa ihi, lhamel letes ihi, iwohiyet'ak õkniläna lhamel. Chik amel lewoye täjtso, nofwila m'ak tä ni'isa tä ihi Israel.

²³ Wet chik atsinha lhutsha kamaj kan'och'efwaya, mat iche hin'o tä wak'alh tä yenla lech'efwaya, wet iche elh hin'o tä nichutej tä ihi hupuy, wet itsoklhi wet imäyej,

²⁴ tä mälhyejtso, lham lhäy'e hin'o tä imäyej hän alhoye tä ihi hupuy wet länejen tuntey. Lhutsha letes tä nit'äna tä hin'o itsoklhi tä ihi hupuy. Wet elh tä hin'o letes tä yen läkwika atsinha tä pajche lewuk ihi. Chik lewoye täjtso, nofwila m'ak tä ni'isa tä i'amhihen.

²⁵ Mat chik hin'o nichutej atsinha tä ihi tayhi, häp atsinha tä pajche iche hin'o tä kalelhäj tä yenla lech'efwaya, mat häp hin'o tä nichutej itsoklhi wet inityen atsinha yämthilek imäyej, chik mälhyejtso, ts'ilakhila hin'o chik õ'län.

²⁶ Mat lhutsha niwohit m'ak chik õ'woyeje, tsi lewit'äyhyajtso tek t'uhawetej chik õ'län. Täjtso hätet iwoye hin'o chik inuye elh wet ilän.

²⁷ Tsi lham hin'otso hiw'en atsinha tä ts'ilak wet atofwehlä hupuy wet itsoklhi. Tej chik fwetaj t'än atsinha, mat tä atofwehlä hupuy, ihichet'a elh chik iläte yämthilek tach'ote.

²⁸ Wet chik hin'o nichutej atsinha tä kamaj kan'och'efwaya, wet äp newache hin'o chik wak'alh yämthilek yenla lech'efwaya, wet hin'o tä nichutej itsoklhi wet inityen atsinha yämthilek imäyej, chik mälhyejtso, chik õ'hanej,

²⁹ wet hin'otso iwohiyet'ak niw'enaho atsinha lajcha cincuenta chinaj t'äj mhoy tä plata. Wet lham yenlat lech'efwaya atsinha, tsi pajche imäyej, wet tek ikalhihilak ileyej tä lham kamaj iläy.

³⁰ Isit'ak hin'o yikejlhi atsinha tä lajcha ch'efwa. Tsi chik iwoye täjtso, itiyej leläkwyhanyaj häp lajcha.