Deut 18 - Biblia Wichi

M'ak tä õhw'enhatej Leví leles tä häpehen sacerdotes

¹ Häp Leví leles tä häpehen sacerdotes, lhäy'e nilhokej wichi tä letes Leví, ihichet'ala honhates yämthilek lewuk lhamel. Tek häte iwoye iyhäj Israel lhayis. Mat isiyejat itshätäy tä õ'länhen tä õyen n'okhayajayej Lhawuk, lhäy'e m'ayhay tä õyen Lewuka.

² Tek õhw'enhihola honhates yämthilek lewuk, mälhyej iwoye lepuhfwas. Mat m'ak tä lakäywet häpe t'at Lhawuk Dios, mälhyej tä lham yäme.

³ Wet lhipey tä tälhe w'asetas wok tson'atas tä õ'länhen yämthilek sacerdotes w'enhayej, häp tähesna: lefwapo, lhäy'e lech'alo lhile, lhäy'e lets'e.

⁴ Häte w'enhola akäs lhay tä ichun tä lelanhi, lhäy'e hat'es tä ichun, lhäy'e aceite tä ichun. W'enhola tson'ataj w'ole tä ichun tä õyisetche.

⁵ Tsi Lhawuk Dios häp tä tatshupiye lhamel tä iyej Israel lhayis tä tälhehen doce letetsel, häpkhilek tälhe lajchalis pajtha nichäte leles tä lepes lheley, lhamel tujlhache t'at lechumet tä ihi lham lew'et wet nileyayej.

⁶ Wet elh tä häpe Leví tä ihi lhip chik häpe aka honhat tä Israel, chik lham wuj tä t'uhläk ihoye honhat lhip tä Lhawuk Dios tatshupiye tä yen lew'eta,

⁷ is t'at, Dios iwahnej t'at chik iwoye lechumet, hätet iwoye iyhäj Leví lhayis tä ihi honhattso tä lhamel iwoye lechumet tä tach'ote Lhawuk Dios.

⁸ Häte is chik ikatej lhäk tä w'awulhi m'ak tä iyhäj Leví lhayis ikatej, lhäy'e m'ak tä tiyäje p'ante lajcha.

Yej ten n'okeyis tä Lhawuk y'ulhan

⁹ Chik lechätho honhat tä Lhawuk Dios hiw'enla amhohen, yej ten wichi tä ihi honhattso lakeyis tä lhäy'e lhip tä Lhawuk y'ulhan.

^10-11 Iwohiyet'ak elh amel ilän lhäs wok lhäse wet iwunho tä yen n'okhayajayej dios tä w'enha lhamej. Yej alhen hiyawuya, wok lefwetaj lehanej m'ak tä ihichela. Yej alechufwenej tä lelänej t'inhayaj häp aelh, wok alhen han'ältshantsaja, wok lehoye han'ältshantses wet letay'ätshaneje m'ak chik häpe. Yej lhämhoplhi ahät lhayis, wet yej tay'ätshane n'op'itseyhay.

¹² Tsi wuj tä iwäkyhayen Lhawuk häp iyhäj tä iwoye tähestso, wet häp tä tamenej tä lham yokwesiphäla wichi tä ihi honhat tä amel lechätho. Tsi lhäy'e lhip tä ni'isa lhamel lakeyis.

¹³ Mat amel is chik imälhewek ahusek tä alep'ajtej Lhawuk Dios.

¹⁴ Häp wichi tä lhenla haw'eta laka honhates, häpe wichi tä tach'ahuye han'ältshantses lhäy'e häp hin'ol tä fwetaj ihanej m'ak tä tatay alhoho. Mat amel Lhawuk Dios iwahnhit'a amejen chik lewoye m'ayhay tä mälhyejentso.

Profeta tä ihichela

¹⁵ Lhawuk Dios yenla profetaya elh amel, mälhyej iwoye olham, wet is chik lewoye lhämet.

¹⁶ Wet täjtso häpe t'at tä amel let'alhtech'oye tä let'alheje Lhawuk Dios tä i'pe chenaj Horeb, häp ifwalahte nilhokej amel alehutwek tä lhoyaykwe, “Tek ot'uhläk yachajo chik oläte lepak häp olhamel Owuk Dios, wet tek äp ot'uhläk äp yachajo chik ow'en itätaj, häpkhilek n'am t'inhen.”

¹⁷ Wet Lhawuk tahuy n'oyej wet yok, “Is t'at wichi lhämettso.

¹⁸ Oyenla profetaya elh lhamel, mälhyej iwoye am, häp elh tä häpe t'at Israel, häpkhilek ifwenho wichi olhämet tä one'tek ifwenho, wet iwoyepej olhämet tä one'tek iwoye.

¹⁹ Wet elh chik nitch'ahuyaye profetatso tä olhämetej, olhamlak oyen tesayej.

²⁰ Wet profeta chik tektshanejlhi tä fwetaj yen lhämeta olhämet wet yäme m'ak tä ka'olhämeta, wok yäme tä dios lhayis iyhäj tä w'enha lhamej tä lhämetej, iwohiyet'ak õkniläna.”

²¹ Wet chik amel atichunhayaj yok, “¿Chiwoyek olhamel ontäfwenhiyeja n'olhämet chik kahäpeya Lhawuk lhämet?”, tä mälhyejtso, tetshanay täja:

²² Chik elh tä yäm lhame tä profeta yok, “Lhawuk lhämet tä ne'tek ofwel amhohen”, wet chik kamatache m'ak tä yäme, kalelhäj tä häpkhit'a Lhawuk lhämet tä yäme. Lham lhämet t'at, häpe hin'o tä lhaichäjlhi. Tä mälhyejtso, yej nowaye.