Deut 14 - Biblia Wichi

Dios n'äyejo Israel lhayis chik iten iyhäj wichi lakeyis

¹ Ahäpehen Lhawuk Dios leles. Yej alesajwethä wet yej lhistho atacho w'ole chik aelh y'il.

² Tsi ahäpehen wichi tä Lhawuk Dios t'amajchet. Lham tatshupi amehen tä lhewej wichi tä i'pe honhat, yämthilek ahäpehen laka wichi wet Awuk häp lham.

Itshätäy tä lakokhayaj ihi lhäy'e iyhäj tä isen

³ Yej tufw m'ak at chik häpek lakokhayaj ihi.

⁴ Itshätäy tä is chik letufw häp tähesna lheyis: w'asetaj, tson'ataj, kayla,

⁵ tson'a, ch'iwase, tson'atak, kaylatak, lhäy'e nilhokej itshätäy tä nichätche tson'a, lhäy'e ch'unaktak.

⁶ Nilhokej itshäwet at chik häpe tä ihanej tä inachaj lhäk wet yokwaji wet äp lefwus t'ähes täkwfwas, häp tä is chik letufw.

⁷ Mat isit'ak letufw itshäwet tä ihanej tä inachaj lhäk mat tek täkwfwas lefwus t'ähes. Wet äp isit'ak letufw itshäwet tä lefwus t'ähes täkwfwas mat ihanhiyejt'ak inachaj lhäk. Yej tufw camello, mäy'ä, inätetaj, tsi itshätäytso lakokhayaj ihi. Tej tä häpe itshätäy tä inachaj lhäk, mat tek täkwfwas häp lefwus t'ähes.

⁸ Wet kutsi, tej tä lefwus t'ähes täkwfwas, mat ihanhiyejt'ak inachaj lhäk. En häpeya itshäwet tä lakokhayaj ihi. Yej tufw t'isan häp itshätäytso, wet yej tsok lep'itsek.

M'ayhay iyhäj tä ihi inät

⁹ Wet m'ayhay iyhäj tä ihi inät, m'ak at chik häpek lefwinchäs ihi wet lhafwisas ihi, häp tä is t'at chik letufw.

¹⁰ Mat iyhäj tä lefwinchäs newahi wet äp lhafwisas newahi, yej tufw. En häpeya m'ayhay tä lakokhayaj ihi.

Afwenchey

¹¹ Wet afwenchey, iyhäj tä lakokhayaj newahi häp tä is t'at chik letufw.

¹² Mat iche iyhäj tä isit'ak letufw. Häp iyhäjkottaj, istiwintaj, tsilikliktaj,

¹³ lhäy'e nilhokej afwenchey tä tufw iyhäj,

¹⁴ lhäy'e tsetwo, ahutsaj,

¹⁵ wänlhäj, amyälä, lhäy'e nilhokej iyhäj afwenchey tä häte iwoye,

¹⁶ lhäy'e wok'o, chilichuk, lhokotaj,

¹⁷ chontsolit, hat'ätaj, askan,

¹⁸ kalak, pälaj wet asus.

¹⁹ Nilhokej m'ayhay tä kahäpeya afwenchey mat lhafwis ihi, en häpeya m'ayhay tä lakokhayaj ihi, yej tufw.

²⁰ Mat afwenchey tä lakokhayaj newahi, häp tä is chik letufw.

²¹ Yej tufw itshäwet tä y'il tä kan'oläneka, tsi ahäpehen wichi tä Lhawuk Dios t'amajchet. Mat w'enho hin'o tä kahäpeya Israel tä i'amejen. Chik t'uhläk tufw, is t'at. Wok iche elh tä iwo lew'ekyaja tä kahäpeya Israel, chik t'uhläk ichäj wet iwo lahaya, is t'at. Yej penej kayla lhäs häp lako kat'os.

M'ak tä is chik elh iwoye tä iwo laka diezmoya

²² Nekchämpej iwohiyet'ak kaw'enhata aka diezmo tä tälho akäs lhay tä lelanhi.

²³ En aka diezmoya häp yachuyaj lhay, lhäy'e hat'es, aceite, lhäy'e aläy w'asetas, lhäy'e tson'atas, lhäy'e kayla lhayis leles tä lechunkatshay. Wet hoye Lhawuk Dios lew'et tä lham tatshupiye tä yen lew'eta, wet tufway tä lhehi tä lham tatache. Woyaye täjtso, yämthilek alechufwenej tä lewoye lenech'ethayaj wet lewunitpej.

²⁴ Wet chik Lhawuk Dios takäpfwayej amehen wet lekalhi akäywet tä i'amej, wet lehäne aka diezmo, mat haw'et atofwehlä häp honhat tä lham yen lew'eta,

²⁵ is chik lewom m'ayhay tä lhen aka diezmoya, wet chinaj t'äj tä laha häp tä lechäje häp honhat tä Lhawuk Dios lew'et ihi.

²⁶ Wet chik lechäte, lechäj m'ak tä lehuminche, w'asetaj, tson'ataj, kayla, vino wok hat'es chik häpe, wok m'ak at chik häpek let'uhläk lechäj, yämthilek letufw tä ihi tä Lhawuk Dios tatache wet lewo akäjyaja, lhäy'e haw'et lheley.

²⁷ Yej p'ethatlä häp wichi tä letes Leví tä i'amejen. Tsi lhamel tek häte iwoye amel tä aka honhates ihi.

²⁸ Tres nekchämispej w'enhat lhip tä lhen aka diezmoya, wet amajej tä ihi lew'et tä ihi hupuy tä amel haw'et.

²⁹ Häpkhilek nämhen Leví lhayis, häp lhamel tä laka honhates newahi, lhäy'e wichi tä kahäpeya Israel lhayis tä i'amejen, lhäy'e chipenhas, lhäy'e tesalis, wet lhamel tufw t'at wet yipsejen. Chik lewoyaye täjtso, Lhawuk Dios takäpfwayhiyela achumtes tä lhenlhi yämthilek isen.