Daniel 8 - Biblia Wichi

Dios iwo lew'eneka Daniel, häpe tson'ataj ch'unak lhäy'e kayla

¹ Häp nekchäm tres tä rey Belsasar ihi leniyatyaj, olham Daniel yachajo tä iche ow'enek.

² Wet ow'en tä oihi t'atpa hupuy tä lhamya tä lhey Susa tä ihi honhat tä Elam. Wet oiwhäyepa tewok tä lhey Ulay,

³ wet tä oyahin, ow'en tson'ataj ch'unak tä ihi tewok lhip, lech'ul pites, mat elh inu'pe elh, wet tä paj lech'u tä elh inu'pe lhaichihelit wet lhäy'e lhip tä inu'pe elh.

⁴ Wet ow'en tä ch'unakna ilänejen lech'ul häp itshätäy tä tumej tafwojyhiye, lhäy'e tä tapinhiye, lhäy'e tä ifwala y'uy. Wet niwohit elh itshäwet chik häpek ikalhi yämthilek tatayhlä, wet äp niwohit hin'o chik häpek tafwayej lakhajyhayaj. Iwoye m'ak tä iwoye wet lhäy'epej lhip lakhajyhayaj.

⁵ Wet tä ontichunejlhi t'at m'ak tä ow'en, nech'e äp ow'en kaylataj tä tälhe tä ifwala y'uy tä nekche nilhokej honhat. Inu alhoho, lhäy'e lhip tä lhaiteläfwit, hätet iwoyek wey'ätpe honhat. Wet lech'u tä lhamya ihi tatelhoy chowej.

⁶ Wet tson'ataj ch'unak tä lech'ul täkwfwas tä ow'en tä iwhäye tewok, tä kaylatajtso nichäte, imälhetwek lakhajyhayaj tä inuye tson'ataj.

⁷ Wet ichähen tson'ataj lech'ul, tumhit'ahlä kaylataj yämthilek tatayhlä. Wet kaylataj ithat katsi tson'ataj wet t'äspe, wet nehit katsik tach'ote yämthilek kaylataj ileyej.

⁸ Wet wuj tä takhajay häp kaylataj, wet tä lhäy'e lhip lakhajyhayaj, lech'u tä lhamya ichä. Wet nech'e iche cuatro lech'ul tä icheyäjo lech'u tä ichä lew'et, wet elh tatay tafwojyhiye, elh tatay tapinhiye, elh tatay tä ifwala y'uy, elh tatay tä ifwala tälhche.

⁹ Wet iche lech'u tä niwuja tä tälho elh lech'ultso, wet lhäy'epej lhip lakhajyhayaj. Wet ikalhi itshätäy tä tumej tapinhiye, lhäy'e itshätäy tä tumej tä ifwala tälhche, lhäy'e itshätäy tä ihi Honhat tä Isilataj.

¹⁰ Wet y'ayhattshi lakhajyhayaj pajtha nichäte t'at pule kanifwotaj. Wet ithat honhate lhip nifwotaj wet äp ithat honhate lhip katetsel wet t'äsche.

¹¹ Matche tä lhaikhajyen, pajtha tatayhlä pule kanifwotaj Kaniyat. Wet tamenej tä wichi ileyej tä ilänhen itshätäy tä yen n'okhayajayej, wet yen w'et m'ayeka n'on'okhayaj lew'et, yen häpeya m'ak tä kok'aye.

¹² Wet tä wuj tä ni'isa m'ak tä iwoye, ne'tek lham laka nifwotaj ihi t'at lhip tä õyachaje Dios häp itshätäy tä õyen n'okhayajayej, wet yen w'et m'ayeka Dios lhämtes. Iwoye t'at m'ak tä iwoye wet ikalhi t'at.

¹³ Wet oläte ángel tä tay'ätshane ángel elh wet yok: –¿Atsihila ifwalak noj m'ayhay tä mälhyejenna tä õhw'en? ¿Chihlahätek Dios letayhfwas ileyej m'ak tä hich'atej tä ni'isa tä iwoye? ¿Hä lajit lepesa tä t'äsichela Dios Lew'et lhäy'e laka wichi? ¿Atsihila ifwalak yachajo tä wichi iwo t'awayhtesa Dios?

¹⁴ Wet elh nichulho wet yok: –Pajla'tha mil ciento cincuenta (1.150) ifwalas. Chik tajyäme täjtso, häpkhilek õ'lejla lakokhayaj häp Dios Lew'et.

Ángel tä lhey Gabriel ifwenho Daniel m'ak tä lew'enek

¹⁵ Wet tä olham Daniel oyen tichunhayaja ow'enektso wet ot'uhläk ohanej m'ak tä häpe, wet otseltej tä ow'en m'ak tä ihi tä ottache, hätet iwoye hin'o.

¹⁶ Wet oläte hin'o lepak tä tume tewok Ulay tä yok: –Gabriel, fwenho Daniel m'ak tä häpe lew'enek.

¹⁷ Wet nech'e Gabriel iho n'oye. Wet wuj tä onuhat lhamho wet otkhos katsi pajtha otacho taji t'at honhat. Mat lham tahuy n'oyej wet yok: –Hin'o, ofwel amho m'ak tä lew'enna. Häpe t'at chik tajila lepes lewhäy.

¹⁸ Häpet tä tahuy n'oyej, wet otwelkayhen wet omät katsi. Matkat lham tachum n'o'pe wet ikasthayenn'o,

¹⁹ wet tahuy n'oyej wet yok: –Ofwenla amho häpkhilek lehanej m'ak tä ihichela chik lepes lewhäy tä Dios lewäk. Tsi m'ak tä lew'en yame t'at ifwalas tä lepesla.

²⁰ “Häp tson'ataj tä ch'unak tä lech'ul täkwfwas häpe t'at rey tä ihi honhat tä lhey Media lhäy'e elh tä Persia laka rey.

²¹ Wet kaylataj häpe t'at Grecia laka rey, wet lech'u tä lhamya tä ihi tatelhoy chowej häpe t'at rey tä ichun.

²² Wet lech'ul tä cuatro tä inuphä tä ichä lech'u tä ichun, häpe t'at honhattso tä ihichela cuatro n'oniyatyajay tä ihihila. Mat lakhajyhayaj tek hätehla iwoye rey tä ichun lakhajyhayaj.

²³ “Wet chik niyateytso eyte nofwi leniyatyajay wet lhäy'e lhip m'ayhay tä ni'isa, ihichela rey tä matche tä lehusek t'un wet akantsaj.

²⁴ Wet häpkhila rey tä takhajay, mat häpkhit'ala lham lakhajyhayaj chik isej. Iwasthihichela nilhokej m'ayhay wet ikalhihila nilhokej m'ak tä iwoye. Itäyhthila hin'ol tä takhajayhen, wet itäyhthila wujpey Dios laka wichi.

²⁵ Wet iwohiyela t'akanyaj wet ikalhihila m'ak at chik häpe. Wet lhäy'ehila lhip chik lhaichäjlhi, wet itihiyeja t'akanyaj wujpey wichi tä letamsek ihi wet ilänhen. Tatayhlahlä Dios tä häpe Niyat tä Lhamya, mat Dios ilänla.

²⁶ “Häp täjtso m'ak tä häpe haw'enek tä yäme ifwalas tä tatay alhoho tä õn'äyhiyejola Dios laka wichi chik n'okwiyej Dios, mälhyej lakey tä iwoyepej. Wet mathichela t'at m'ak tä lew'en. Mat yej fwenho elh chik häpe, tsi kamaj wuj lewhäy tä tatäy yämthilek lhayämla matche.”

²⁷ Olham Daniel olät lhame tä noj t'at okhajyhayaj. Wujpe ifwalas tä t'inhayaj ilänn'o. Tä oches, onephä wet oyachajo tä owoye ochumtes tä otch'ote rey. Mat wuj tä oyen tichunhayaja m'ak tä ow'entso, tsi ohanhiyejt'a.