Daniel 6 - Biblia Wichi

Daniel häpe elh niyatey tä t'uye gobernadores

¹ Ciento veinte hin'ol tä rey Darío yen häpeyahen p'ante gobernadores wet itihiche honhates tä lham niyatej.

² Wet itshupyene tres leniyatfwas yämthilek itetshan häp gobernadores lechumtes, häpkhilek lham leniyatyaj laj lewit'äyhyaja. Wet leniyatfwastso häp tä elh Daniel.

³ Wet lham wuj tä inu'pe iyhäj niyatey lhäy'e gobernadores, tsi matche tä lehusek ihi. Wet häp tä rey yen tichunhayaja yämthilek lham Daniel niyatej imälhewek Babilonia.

⁴ Matkat leniyatfwas lhäy'e gobernadores lhamel itetshan Daniel, t'uhläk hiw'en chik lham nit'amajayej lechumyaj tä iwoye. Mat lhamel ihanhiyejt'a iwoyneje, tsi Daniel häpe hin'o tä is alhoho wet iwohiyet'a m'ak chik häpek ni'isa.

⁵ Matkat lhamel ilehiyejt'a tä t'ukwe t'at m'ak chik yen tesayej. Wet lhamel yok: –Tek y'anlhokhiyela m'ak chik letesla Daniel, tajlhamak y'at'ukwe m'ak chik yiwete lham t'ekhahyaj tä itiyej laka dios.

⁶ Tä mälhyejtso, lhamel lhaihutwek wet ihoye rey. Tä lhamel nichäte, tahuyej wet yok: –¡Ika niyat, is chik leläy pajla'tha tiyäj'attsiy!

⁷ Nilhokej niyatey tä ihi aka honhat, lhäy'e hin'ol tä len'ohyajay ihiche, lhamel ihuminche chik lhenlhi ämet tä häpe ley wet lekhajyen. Is chik tälhe ifwala tä lhenlhi pajla'tha treinta ifwalas tä iwohiyet'ak wichi iwo t'alhyajaye dios chik häpe wok hin'o chik häpe. Tajlhamat am, ika niyat, tä is chik wichi aiwujyen. Wet elh at chik häpek niwoyaye ämet, is chik õ'thatche chowej tä t'owalhas ihi.

⁸ Tä mälhyejtso, enlhi ämet, lesayen häpkhilek õknitäyhata, mälhyej häp Medo lhayis lhäy'e Persa lhayis kaleyes tä iwohiyet'ak õ'täyhat.

⁹ Wet rey Darío yenlhi lhämet wet ilesayen.

Õ'thatche Daniel häp chowej tä t'owalhas ihi

¹⁰ Tä Daniel ihanch'oye tä rey ilesayen lhämet tä yenlhi, lham yäple lew'et, wet ifwoyenche laka ventana tä ihi hupch'o elh tä lemäwet ihi, häp laka ventana tä tataye Jerusalén, wet lakamchetey itihi honhat, wet iwo t'alhyaja wet iwujyen Dios. Wet ifwalapej iwo let'alhyaja tres veces, mälhyej tä lham iwoyepej.

¹¹ Wet häp hin'oltso tä Daniel letayhfwas tiyäjchufwi Daniel lewukwe, wet hiw'en tä lham iwo t'alhyaja wet iwujyen laka Dios.

¹² Wet lhamel yikhen tä ihoye rey, wet yäme häpet lhämet tä lham rey yenlhi naji, wet yok: –Ika niyat, pajchenaj lefwelpe wichi häp ley tä yok, “Treinta ifwalas, ihichet'ala elh at chik häpek iwo t'alhyajaye dios at chik häpe wok hin'o chik häpe. Tajlhamat rey tä is chik õ'wujyen. Elh chik niwoyaye, is chik õ'thatche chowej tä t'owalhas ihi. ¿Hä nimälhyayejnajtso?” Rey nichulho wet yok: –Matche, wet iwohiyet'ak wichi niwoyaye, mälhyej Medo lhayis lhäy'e Persa lhayis kaleyes tä iwohiyet'ak õ'täyhat.

¹³ Wet lhamel yok; –Ika niyat, iche elh häp n'okwenkay tä tälhe Judá, elh tä lhey Daniel, ayen w'et m'ayeka. Lham iwohiyet'a ämetnaj lefwelpe wichi. Olhamel ow'en tä iwopej t'alhyaja tres veces ifwalapej.

¹⁴ Tä rey iläte täjtso, wuj tä yen fwitajayaja, wet t'ukwe m'ak chik iwoye yämthilek ifwayhat Daniel pajtha ifwala imälhewek.

¹⁵ Matkat hin'oltso yachajo tä ihoye rey, wet tahuyej tä yok: –Ika niyat, am lehanej tä Medo lhayis lhäy'e Persa lhayis laka ley chik häpe tä rey iti'pe lhey, iwohiyet'ak õ'täyhat.

¹⁶ Tä mälhyejtso, rey ne'tek õyike häp Daniel yämthilek õ'thatche chowej. Mat rey tahuyej Daniel wet yok: –¡Is chik aka Dios tä kaleyayej tä letach'ote aifwayhat!

¹⁷ Wet tä Daniel ihi chowej, õ'häne tunte tä wuj wet õhp'oyeji, wet rey itiyej laka sello leniyatfwas laka sellos yämthilek newache elh chik häpek yok, “Isit'a m'ak tä y'awoyeje Daniel.”

¹⁸ Wet tä rey ileyej, yäple lew'et wet t'ekhit'a, wet tek iwatläk iläte música. Wet tej tä imä katsi, mat nahati ilänhit'a.

Daniel isej t'ekhahyaj wet Dios ifwayhat

¹⁹ Tä nech'e fwamlafwaj rey nephä wet nakeltshi tä ihoye chowej tä t'owalhas ihi.

²⁰ Tä nichäte, hätet iwoyek lhafwyhayaj t'at tä t'änch'oye Daniel tä yok: –Daniel, Dios tä n'ilataj lakawo, ¿hä aka Dios tä kaleyayej tä lhen Awuka ifwayhat amej t'owalhas?

²¹ Daniel nichulho wet yok: –¡Ika niyat, is chik leläy pajla'tha tiyäj'attsiy!

²² Oka Dios ichen n'oye laka ángel wet hip'ohiche lak'as häp t'owalhas yämthilek owit'äyhyaj newache. Tsi Dios ihanej tä otes ihit'a n'oyej wet ihichet'a m'ak chik ni'isak owoyej ame, ika niyat.

²³ Tä rey iläte, wuj tä lakäjyaj ihi, wet ne'tek õ'tonphä Daniel tä ihi chowej. Tä õ'tonphä, ihichet'a lelätsek chik häpe, tsi lham t'ekhaye laka Dios.

²⁴ Wet nech'e rey ne'tek õ'chäj alhoho häp hin'ol tä fwetaj itiyej letes Daniel, lhamel lhäy'e lech'efwas lhäy'e leles, wet õ'thatche chowej tä t'owalhas ihi. Wet t'owalhas iwo lhipeya lhamel tä kamaj nichätaye chowej lech'o.

Rey Darío ne'tek õ'wujyen Dios tä n'ilataj

²⁵ Wet rey Darío ichene lelesaynek nilhokej wichi tä ihiche honhates, lhamel tä lhayhil w'enhache lhamej, wet yok: “Is chik lhäy'e lhip atamsekis tä i'amejen.

²⁶ Ochene olhämet nilhokej wichi tä ihi oniyatyaj, one'tek lhamel nena w'et m'ayeka Daniel laka Dios, mat is chik n'okwiyej. Tsi häpe Dios tä n'ilataj wet tek tatäy pajla'tha tiyäj'attsiy. Wet nofwit'ala leniyatyaj wet lepes ihichet'ala lakhajyhayaj.

²⁷ Lham ifwayhthen wichi wet yisthen t'akay. Häpe Dios tä yenlhi letetnhay lhäy'e m'ayhay tä äyteschehen tä ipuleye lhäy'e tä ihonhatena. Lham tä ifwayhat Daniel, wet t'owalhas tek iwit'äyen.”

²⁸ Wet Daniel tujlhache t'at tä häpe p'ante hin'o tä len'ohyaj ihi tä ihi rey Darío niyatyaj, pajtha nichäte tä Ciro häpe Persa lhayis laka rey.