Apoc 8 - Biblia Wichi

Häp sello tä siete lhäy'e incienso lehi tä oro

¹ Wet Tson'ataj Lhäs hich'esaj sello tä siete tä i'pe n'olhämet lehi tä õ'käfwelche, wet nech'e imälhewek Dios Lew'et tä ihi pule tä yok tam, pajtha media hora p'iya.

² Wet ow'en siete ángeles tä takasthen tä ihi tä Dios tatache, wet õhw'enhomche elhpej lefwol trompeta.

³ Wet näm elh ángel tä ichäjlhi incienso lehi tä oro, wet takasitwhäye altar. Wet wuj incienso tä õhw'enho, wet iwunho tä i'pe altar tä oro tä ihi tä n'oniyatyaj tatache, yämthilek hap'akej nilhokej Dios laka wichi t'alhyajay.

⁴ Wet tutsaj tä tälho inciensotso tä ihi ángel takwey, lhäy'e nilhokej Dios laka wichi t'alhyajay, inuphä t'at yäk nichäte Dios.

⁵ Wet ángel tachuma itäj fwiyhol tä ihi altar, wet iskonche incienso lehi wet ithat honhate. Wet nech'e iche pelhay tä t'ajanlhi, lhäy'e n'opakas, lhäy'e lep lhayis, lhäy'e honhat w'ahu.

Elhpej ángel tä nichäte lewhäy wet yafwutche lefwol trompeta

⁶ Wet häp siete ángeles tä lefwolis trompetas pajche iyej, lhamel lhaiwaklhatwethä yämthilek elhpej chik nichäte lewhäy yafwutche.

⁷ Wet ángel tä ichun yafwutche lefwol, wet nitsäyhchä kalatu lhäy'e itäj tä w'oyis lhayej. Wet honhat lhip tä nichäthihchätso y'o t'at, lhäy'e hal'äy, lhäy'e nilhokej hup tä w'atshan tä i'pe honhat.

⁸ Wet nech'e ángel tä segundo yafwutche lefwol, wet õ'thate lewomekitaj m'ak tä y'uho, mälhyet chenaj tä wuj tä y'uho. Wet häp lewomekitaj lhip tä nichätho welan w'oyisa,

⁹ wet nilhokej m'ak tä ihi lewomekitaj lhiptso y'inhen, häte häp barcos tä ihi wasiche t'at.

¹⁰ Wet nech'e ángel tä tres yafwutche lefwol, wet nichätchä kates tä wuj tä tälh puleye, hätet iwoye phätaj, wet nichätho lhip tewok lhayis lhäy'e ts'ifwik lhayis.

¹¹ Häp kates tä phätajtso lhey Tapay, wet inät lhayis tä nichätho nech'e häpe t'at inät tä tapay, wet tamenej tä wujpey wichi tä y'inhen.

¹² Wet nech'e ángel tä cuatro yafwutche lefwol, wet lewit'äy ihi lhip häp fwala, lhäy'e wel'a lewit'äy ihi lhip, häte katetsel lewit'äy ihi lhip. Tä mälhyejtso, nemhit pitaj isi, mat honataj t'at tä i'pe honhat.

¹³ Wet nech'e oyahin, wet oläte afwenche tä iyhäjkottaj tä wey'ä tä inukwe pule lechowej, wet ifwitsenej lechos tä yok: –¡P'elitses, matche tä p'elitses wichi tä ihonhate! ¡Tsi lewit'äy ihihila chik pitsajiyela iyhäj tres ángeles chik yafwutche lefwolis trompetas!