Apoc 7 - Biblia Wichi

Häp ciento cuarenta y cuatro mil (144.000) wichi tä kalelhäjen

¹ Tä tajyäme täjtso, ow'en cuatro ángeles tä takasthen tä ihi tä tafwojhiye, lhäy'e tä tapinhiye, lhäy'e tä ifwala tälhche, lhäy'e tä ifwala y'uy. Lhamel itsokwethä ihwok lhayis tä tälhchehen lhipeytso, yämlek newache che i'pe honhat lhäy'e lewomekitas lhäy'e hal'äy.

² Häte ow'en elh ángel tä tälhche tä ifwala tälhche, tä ichäj Dios tä n'ilataj laka sello. Wet lham ifwitsenej lechos tä t'änpe iyhäj tä ihi cuatro tä pajche õhw'enhomche lakhajyhayaj yämlek iwit'äyen honhat lhäy'e lewomekitas. Wet yok:

³ –¡Yej wit'äyen ayej honhat lhäy'e lewomekitas lhäy'e hal'äy, tä kamaj kay'atiyayejwethä sello häp lhaka Dios lakawos letachol!

⁴ Wet oläte número häp lhamel tä kalelhäjen, häpe ciento cuarenta y cuatro mil (144.000) tä iyej nilhokej Israel lhayis tä tälhehen letetsel tä ihi doce:

⁵ Tsi tälhe Judá laka wichi doce mil tä kalelhäjen, wet tälhe Rubén laka wichi doce mil, wet tälhe Gad laka wichi doce mil,

⁶ wet tälhe Aser laka wichi doce mil, wet tälhe Neftalí laka wichi doce mil, wet tälhe Manasés laka wichi doce mil,

⁷ wet tälhe Simeón laka wichi doce mil, wet tälhe Leví laka wichi doce mil, wet tälhe Isacar laka wichi doce mil,

⁸ wet tälhe Zabulón laka wichi doce mil, wet tälhe José laka wichi doce mil, wet tälhe Benjamín laka wichi doce mil.

Wujpey wichi tä lew'uyis ipelas

⁹ Tä tajyäme täjtso, oyahin wet ow'en wujpey wichi tä tälhomche nilhokej honhates, wichi tä w'enhache lhamejen, häp lhamel tä lhämtes w'enhahiche. Lhamel takasthen tä ihi tä n'oniyatyaj lhäy'e Tson'ataj Lhäs tatache, wet nehit katsik ihanej che iwo t'ufwahtesa, tsi wujtaj'atpey lhamel. Lew'uyis ipelas wet ichäjwethä fwitsuk w'oley,

¹⁰ wet ifwitsenej lechos wet yok: “¡Häp lhaka Dios tä tatayphä'pe leniyatyaj, lhäy'e Tson'ataj Lhäs, häp tä n'ofwayhyaj tälhe!”

¹¹ Wet nilhokej ángeles tä takasitwethä tä ilunej n'oniyatyaj lhäy'e hin'ol tä lhamenya lhäy'e cuatro m'ayhay tä wujpe tatelhoy, häp ángelestso takhosche katsi tä ihi tä n'oniyatyaj tatache wet n'okwiyej Dios

¹² wet yok: “¡Amén! ¡N'awunit lhaka Dios, n'an'okwiyej lham tä lehanyaj ihi, lhäy'e lakhajyhayaj, lhäy'e tä ihanej iwoyneje m'ak at che häpe! ¡N'aw'enho gracias wet n'awujyen yämlek tiyäj'attsiy! ¡Amén!”

¹³ Wet nech'e elh hin'ol tä lhamenya tahuy n'oyej wet yok: –Häp lhameltsi tä lew'uyis ipelas, ¿atsi tä häpe, wet chi tälhi?

¹⁴ Olham onchulho wet oyok: –Thayej, iwuk, am tä lehanej. Wet nech'e lham yok: –Häp lhamel tä tafwayej n'olhakli tä äytaj, häpe t'at tähestsi. Lhamel pajche ilejen lew'uyis wet ipelnhatejen Tson'ataj Lhäs lew'oyis.

¹⁵ “Häp tä tamenej tä lhamel ihi t'at tä Dios niyatyaj itayche, laka n'ohusewos t'at lhamel, wet ifwalapej honatsipej iwoye lechumyaj tä ihi Dios Lew'et. Wet Dios tä tatayphä'pe leniyatyaj, lham iyej t'at wet t'uhiyehena.

¹⁶ Nemla nichuyuhen wet nemla ichimhen, wet tek ifwala hip'ohihena, wet tek nahayoj ilänhihena.

¹⁷ Tsi Tson'ataj Lhäs tä ihi leniyatyaj lechowej, itech'aynhiyeja tä t'uyehen tson'atas, ihänhiyela ts'ifwik lhayis tä häpe inät tä iwo n'ow'atshancheyaja, wet Dios ilejihena nilhokej tatet'ilis.”