Apoc 6 - Biblia Wichi

Häpet siete sellos

¹ Wet nech'e ow'en tä Tson'ataj Lhäs hich'esaj häp sello elh tä ichun, wet oläte elh lhamel häp m'ayhay tä wujpe tatelhoy, tä lepak hätet iwoye pelhay tä y'ip wet yok: –¡Lhuu!

² Tä oyahin, ow'en yel'ataj tä ipelaj, wet häp hin'o tä i'pe ichäjlhi lutsej hal'ä. Wet õhw'enho corona, wet yik tä ikalhi letayhfwas wet äp ikalhihila.

³ Wet Tson'ataj Lhäs hich'esaj segundo sello, wet oläte elh häp m'ayhay tä wujpe tatelhoy tä yok: –¡Lhuu!

⁴ Wet ow'en tä inuphä elh yel'ataj tä ichät, wet häp hin'o tä i'pe õhw'enho lakhajyhayaj yämthilek isoyej letamsek häp honhat wet lhailänhen wichi. Wet õhw'enho lefwajnhat tä khajay.

⁵ Wet Tson'ataj Lhäs hich'esaj sello tä tres, wet oläte elh häp m'ayhay tä wujpe tatelhoy tä yok: –¡Lhuu! Tä oyahin, ow'en yel'ataj tä ichalaj, wet häp hin'o tä i'pe ichäjlhi balanza.

⁶ Wet nech'e oläte m'ak tä hätet iwoye n'opak tä tumho lechowej häp m'ayhay tä wujpe tatelhoy tä yok: –Tajlhama kilo tefwajni trigo wok tres kilos cebada tä hin'o lakaha ifwala tefwajni. Mat yej lekänchi aceite lhäy'e vino.

⁷ Wet Tson'ataj Lhäs hich'esaj sello tä cuatro, wet oläte elh häp m'ayhay tä wujpe tatelhoy tä yok: –¡Lhuu!

⁸ Tä oyahin, ow'en yel'ataj tä ika'tu, wet häp hin'o tä i'pe lhey N'ot'ilek. Wet nekche len'äyij elh tä häpe N'ot'ilek niyatyaj, wet õhw'enho lakhajyhayaj lhamel yämthilek ikalhi lhip honhat, mat häpkhit'a lechowej. Wet itayyenwek wichi wet lhailänhen, wet ilänej nehläs, lhäy'e äytes, lhäy'e itshätäy tä fwitses tä ihi honhat.

⁹ Wet Tson'ataj Lhäs hich'esaj sello tä cinco, wet nech'e ow'en tä ichufwi altar häp lhamel tä pajche õ'länhenpe tä yen lhämeta Dios Silätyaj lhäy'e tä yäme m'ak tä lhamel t'ekhaye.

¹⁰ Lhamel ifwitsenej lechos tä yok: –Iwuk tä najit atumfwaya, am tä an'ot'amajchet lhäy'e tä matche, ¿atsihila ifwala chik lewohla akalelhthayajayej wichi tä ihonhate wet lewohla lahayayej lhamel tä ilänhen olhamel?

¹¹ Wet nech'e õhw'enho elhpej lew'uy tä ipelaj, wet õ'fwenho lhamel tä õyok: –Taye ayej lhimphaj lewhäy, pajla'tha apuhfwas tä ihi Cristo lechumet w'awulho número tä õ'länhihena'pe lechayaj, mälhyej iwoye amel.

¹² Wet Tson'ataj Lhäs hich'esaj sello tä seis. Tä oyahin, iche honhat w'ahu tä äytaji, wet ifwala nemhit isi, nech'e ichalaji, mälhyet iwoye tesa lew'uy tä ichalaj. Wet imälhewek iwel'a nech'e ichät, mälhyet w'oyis,

¹³ wet katetsel tälh puleye wet natche honhate, mälhyet iwoye hal'ä lhay tä kamaj n'oya tä natchä tä tälho lhile tä yafwthitaj tä äytaji isichäthi.

¹⁴ Wet pule hätet iwoye papel tä õ'käfwelche, nemhit iche, wet nilhokej chenhas lhäy'e lhiletas yikchech'oye lew'etes tä pajche ihiche.

¹⁵ Wet häp niyatey tä i'pe honhat, lhäy'e n'owustas, lhäy'e sip'äl kaniyatey, lhäy'e wichi tä hiw'en m'ayek, lhäy'e iyhäj tä len'ohyajay ihiche, lhäy'e nilhokej wichi, häp n'okwenkay lhäy'e hin'ol tä kahäpeya n'okwenkay - nilhokej lhameltso tiyäje chenhas wet lhaiskathen tä y'uchehen chowhay wet y'uchechufwi tuntey.

¹⁶ Wet tahuye chenhas lhäy'e tuntey, wet yok: –¡Chätpe olhamel wet askat n'ohen, häpkhilek n'am nehi tä itayche häp Elh tä itayphä'pe leniyatyaj, lhäy'e Tson'ataj Lhäs lewäk!

¹⁷ Tsi nech'e näm ifwala tä n'otasnhayaj tä lhamya, wet nehit katsik tumhilahlä.