Apoc 3 - Biblia Wichi

Cristo lhämet tä ichene Dios leles tä ihi Sardis

¹ Wet äp lham yok: –Häte lesayen täja wet chene ángel tä iyej Dios leles tä ihi hupuy tä Sardis: “Häp täja lhämet häp Elh tä siete espíritu lhayis tä tälhe Dios iyej, lhäy'e siete katetsel. Yok, Ohanej nilhokej m'ak tä lewoyepej, wet tej tä wichi yäme tä leläy, mat ohanej tä let'il t'at.

² Häp m'ayhay tä lhenlhi, Dios tek akäjejlhi, tsi imälhehit'awek tä lewoye lhämtes. Tä mälhyejtso, oyok, Yej lemä, mat khajyenhen m'ayhay tä imälhehi tä eyte y'inhihen.

³ Tichunche n'ochufwenyaj tä lelätehte lhäy'e tä letachumtehlä, äple wet wo ahusek elha. Chik lemä t'at, ohätehlat iwoye etantsaj chik ohohla ame häp ifwala chik lhenek tek onämla.

⁴ “Matkat iche iyhäjfwas amel tä lheyayhi Sardis tä niwahnayej lech'isukyaj chik hich'oyhat lew'uyis. Oyok, lhamel nekhila n'okwe wet ipelas t'at lew'uyis, tsi t'uhawetej t'at.

⁵ Wet häp tä mälhhiyejattso häp elh chik häpe chik ikalhi m'ak tä tatayhlä. Lew'uy ipelajila t'at wet tek otäyhthila lhey tä ihi n'olesaynekhi tä wichi tä ikatej lew'atshancheyaj tä t'un lheyes ihi. Mat chik ihi tä Ojcha tatache lhäy'e tä ángeles tatache, oyohlak, N'aelh t'at lhamtsi.

⁶ “¡Elh chik lech'otey ihi, ch'ahuye m'ak tä Espíritu tä Dios T'amajchet ifwenho Dios leles!”

Cristo lhämet tä ichene Dios leles tä ihi Filadelfia

⁷ Wet äp lham yok: –Häte lesayen täja wet chene ángel tä iyej Dios leles tä ihi hupuy tä Filadelfia: “Häp täja lhämet häp Elh tä Dios T'amajchet lhäy'e tä matche, häp lham tä David laka llave iyej. Chik lham ifwoyenche lepe, nehit katsik hip'ohi, wet chik lham hip'ohi, nehit katsik ifwoyenche.

⁸ Yok, Ohanej nilhokej m'ak tä lewoyepej. Lhek yahinya, ofwoyenche lepe tä ihi tä letayche wet nehit katsik ihanej chik hip'ohi. Tsi tej tä lhimphaj akhajyhayaj, lewoye t'at olhämtes, tek alefwon n'ohlä.

⁹ Oyachajila ame häp lhamel tä Satanás leles, lhamel tä lhämtes kamatachehen, tä yäm lhamehen tä fwetaj Judío lhayis mat häpkhihent'a, yämlek lakamchetey itiwhäye apach'ol wet ihanej tä oaihumin.

¹⁰ Tä lewoye olhämet tä one'tek letujlhache wet tek leleyej, häp tä tamenej tä ot'amajila amej chik nichäte lewhäy m'ak tä äytajche chik nichätpe imälhewek honhat, yämlek yelhte wichi tä i'pe honhat.

¹¹ “Onämlat thahya. Amajej m'ak tä i'amej häpkhilek nehit katsik iso amej awayhat tä häpe corona.

¹² Häp elh chik häpe chik ikalhi m'ak tä tatayhlä, oyenla oka Dios Lew'et ch'uteya, wet nemla yikch'oye. Wet olesaynhila oka Dios lhey tä oti'pe, lhäy'e lham laka hupuy lhey tä häpe Jerusalén tä nech'ayek tä tälhiyela oka Dios tä ipuleye. Häte olesaynhila olham olhey tä nech'ayek tä oti'pe.

¹³ “¡Elh chik lech'otey ihi, ch'ahuye m'ak tä Espíritu tä Dios T'amajchet ifwenho Dios leles!”

Cristo lhämet tä ichene Dios leles tä ihi Laodicea

¹⁴ Wet äp lham yok: –Häte lesayen täja wet chene ángel tä iyej Dios leles tä ihi hupuy tä Laodicea: “Häp täja lhämet häp elh tä yäm matche Dios lhämtes, häp lham tä häpe Dios kasilätwo tä afwtintsaj lhäy'e tä matche, wet nilhokej lhenhay häp tä tälhe.

¹⁵ Yok, Ohanej nilhokej m'ak tä lewoyepej, ahäpkhit'a m'ak tä techäji wok m'ak tä chayohi. ¡Chik ahäpkhi m'ak tä techäji wok chayohi, is t'at!

¹⁶ Mat tä ahäpe m'ak tä hip'ehi, wet tek ahäpe techäji wok chayohi, otch'uyhiphäla amej.

¹⁷ Tä lhok, Ois t'at, ow'en m'ayek wet niwohit m'ak chik tatäy n'oyej, mat lehanhiyejt'a tä ahäpe t'at elh tä m'ak niw'ena, w'et am'ayek t'at, ap'elitsaj, a'asnam t'at wet najit haw'uya.

¹⁸ Häp tä ofwel amho tä oyok, Is chik lechäj oka oro tä wak'alh tä tälho itäj, häpkhilek matche tä ahäpe elh tä hiw'en m'ayek. Häte is chik lechäj wesas tä in'oyej tä ipelas yämlek letaw'uyhiche wet lep'oyej atape, tsi on'äfwelh atape tä ats'ilakche. Wet häte is chik lechäj kacha yämlek let'ilenpe atelhoy wet lew'enche honhat.

¹⁹ “Ofwonwethä wet otasnhen nilhokej lhamel tä ohumnhen. Tä mälhyejtso, akhajyen wet wo ahusek elha.

²⁰ Lhek yahinya, oihi lepe, wet elh chik häpe chik iläte tä ot'änch'oye wet ifwoyen n'ohlä, ohohlachufwi lewukwe yämlek otchufwiyej tä ot'ekhen.

²¹ Häp elh chik häpe chik ikalhi m'ak tä tatayhlä, ow'enhihola yämlek tatayphä owhäye tä oi'pe oniyatyaj, mälhyej olham tä okalhi m'ak tä tatay n'ohlä wet ottayphäwhäye Ojcha tä i'pe leniyatyaj.

²² “¡Elh chik lech'otey ihi, ch'ahuye m'ak tä Espíritu tä Dios T'amajchet ifwenho Dios leles!”