Apoc 18 - Biblia Wichi

Tatäy Babilonia

¹ Tä tajyäme täjtso, ow'en elh ángel tä inuhchä tä tälh puleye. Wuj tä lakhajyhayaj iyej, wet lhäy'e lhip tä isi, wet lehutunek ihutunpe honhat.

² Wet ifwitsenej lechos tä t'än tä yok: “¡Tatäy, tatäy t'at Babilonia tä lhamya! ¡Nech'e ahät lhayis tä yen lew'eta, wet afwenchey tä kok'ayehen yen lhupisa, wet itshätäy tä kok'ayehen wet fwitses yen lhokweya!

³ Häp tä nilhokej wichi tä ihiche honhates w'oknhasejwethä lakain'oyaj tä tälhe, wet niyatey tä i'pe honhat iwo lakain'oyajayej häp lham. Wet tä lham ikänlha'pe m'ayhay, negociantes tä i'pe honhat iwo kotsayej, wet nech'e lhamel hiw'en m'ayek.”

⁴ Wet oläte elh n'opak tä tum puleye tä yok: “Amel tä ahäpehen oka wichi, mäyaych'oye hupuyna, häpkhilek ka'amtejayej lesukyajay tä iwoye, wet katan'isayej chik lewit'äyhyaj nichätpe.

⁵ Tsi iskon lesukyajay yäk nichät puleye, wet Dios tek hip'ethatlä m'ak tä ni'isachehen tä iwoye.

⁶ ¡Häp m'ak tä lew'enayho, w'awulhathi m'ak tä hiw'enhomche iyhäj! ¡Isayej lhip laha tä letiskanejpe lechumet tä iwoye! ¡Tsäyayho lhäthi hat'es tä lhäy'e lhip tä äytaji, wet nuhatpe m'ak tä lham iyäynej iyhäj!

⁷ ¡W'enayho lelhakli lhäy'e leteläythayaj, w'awulhatej lham lewujyaj tä lhaiwujyenej lhäy'e lenech'ethayajay tä iwoye! Tsi iti lhamhi letichunhayaj wet yok, Olham ottayphä t'at, oniyat tsinha, ohäpkhit'a tesa, wet olhakli ihit'ala n'oyej.

⁸ Wet tä mälhyej'attso letichunhayaj, häp tä tamenej tä ifwala tefwajni lewit'äyhyaj nichätla'pe, häp n'ot'ilek, lhäy'e n'olhakli, lhäy'e nehläs, wet õ'wunhihola. Tsi takhajay Dios Lhawuk tä itiyej letasnhayaj.”

⁹ Häp niyatey tä i'pe honhat tä lhayachaje lham tä ikänlha'pe m'ayhay wet iwo lakain'oyajayej häp lham, lhamel tafwichelahchä wet ihowatshanhila chik hiw'ene tutsaj chik tälho tä y'uho.

¹⁰ Takasthenla tä atofwehlä tä nowaye n'otasnhayaj tä iyej, wet yohlak: “¡Ap'elitsaj, ap'elitsaj Babilonia, hupuy tä lhamya, hupuy tä takhajay! ¡Mat yofwajkwet n'otasnhayaj nichät ame!”

¹¹ Wet häp negociantes tä i'pe honhat, häte tafwichelahchä wet ihowatshanhila chik hiw'ene hupuytso lewit'äyhyaj. Tsi nem iche elh tä ichäj laka m'ayhay,

¹² tä häpehen oro lhäy'e plata, lhäy'e n'olhamsilis tä häpe tuntey tä isis tä wuj laha, lhäy'e wesas tä isis tä lino lhäy'e tä seda, tä ifwak'an lhäy'e tä ichät, lhäy'e nilhokej hal'ä tä lenij akäjche, lhäy'e m'ayhay tä õyenejlhi elefante tsotey lhäy'e hal'äy tä wuj tä laha ihi, lhäy'e m'ayhay tä õyenejlhi bronce, chinaj, lhäy'e tuntey tä talesay tä lhey mármol,

¹³ lhäy'e m'ayhay tä lenij akäjche, tä häpe canela, incienso, mirra, lhäy'e m'ayhay tä perfume, lhäy'e hat'es, aceite, harina tä lhäy'e lhip tä is, trigo, lhäy'e itshätäy tä n'olhuhyenhay, lhäy'e tson'atas, yel'atas, lhäy'e kaletas, lhäy'e n'okwenkay tä lhamel iwom tä häpe hin'ol.

¹⁴ Wet negociantestso tahuyhiyela hupuy, yohlak: “¡Häp m'ayhay tä akäs tä lhäy'e lhip tä lekän, nemhit i'amej! ¡Nilhokej akäywet lhäy'e asilatyaj tatäy, wet yachajihot'alak i'amej!”

¹⁵ Häp hin'oltso tä wuj chinaj t'äj tä ikalhihlä hupuytso, lhamel takasthenla tä atofwehlä tä nowaye n'otasnhayaj tä iyej. Wet tafwichelahchä tä ihowatshanhila,

¹⁶ wet yohlak: “¡P'elitsaj, p'elitsaj hupuy tä lhamya! Häp lham tä hätenaj at iwoye atsinha tä yen lew'uyisa wesas tä ichät lhäy'e tä ifwak'an, wesas tä lhäy'e lhip tä isis, wet lhaisilatyenej oro lhäy'e lhamsilis tä häpe tuntey tä isis tä wuj laha.

¹⁷ ¡Matkat yofwajkwet noj lakäywet tä wuj!” Wet nilhokej barcos tä wus kaniyatey, lhäy'e lhamel tä inukwe lhip lewomekitas tä hupuy iwhäye, lhäy'e barcowos, lhäy'e nilhokej lhamel tä lakaha tälhe lechumet tä ihi lewomekitas, lhamel takasthen tä atofwehlä.

¹⁸ Wet tä lhamel hiw'ene tutsaj tä tälho hupuy tä y'uho, lhamel t'änhen tä yok: –¡Ihichet'a hupuy chik häte iwoye hupuyna tä lhamya!

¹⁹ Wet itsäche'pe honhat häp lhethey, wet tafwchehchä tä ihowatshan wet t'änhen tä yok: “¡P'elitsaj, p'elitsaj hupuy tä lhamya, häp hupuy tä nilhokej hin'ol tä laka barcos ihi lewomekitas ikalhihlä wuj chinaj t'äj tä tälho! ¡Matkat yofwajkwet tatäy!”

²⁰ ¡Am, pule, wo akäjyajayej häp hupuyna tä noj! ¡Wo akäjyaja, amel tä ahäpehen Dios laka wichi, lhäy'e apóstoles, lhäy'e profetas! Tsi tä Dios itiyej letasnhayaj, iwo lahayayej häp m'ak tä iwoyej amehen.

²¹ Wet ángel tä takhajay ineyhatphä tunte tä hätet iwoye fwelhek tä wuj, wet ithate lewomekitaj wet yok: “¡Babilonia tä ahäpe hupuy tä lhamya, amälhhiyejat iwoye tunte tä otfwomejtso chik Dios aitäyhat, wet nemla wichi ahiw'en!

²² Häp hin'ol tä yenlhinaj música tä ihiche akawayhil, lhamel tä y'ajiche arpas lhäy'e iyhäj tä yafwutche lefwolis flauta lhäy'e trompeta, oyok, tajlhama tä õ'läte lepakas. Wet häp wichi tä i'amej tä yenwethä lechumet chik häpe, nemla iche, wet fwelhek lepak chik tum ame nemla õ'läte,

²³ wet n'ochäkw chik i'amej nemla n'äle, wet wichi tä tawhayeyhen lepak tä iwo lakäjyaja chik tum ame, nemla iche. Tsi häp tä negociantes tä i'amej häpehen hin'ol tä lhäy'e lhip tä len'ohyaj ihi tä i'pe honhat, wet tä ahiyawu lekanejen nilhokej wichi tä ihiche honhates.”

²⁴ Tsi profetas lhäy'e Dios laka wichi lew'oyis ihi t'at hupuyna, lhäy'e nilhokej wichi tä õ'länhen tä i'pe honhat.