Apoc 10 - Biblia Wichi

Ángel tä ichäjlhi n'olhämet lehifwaj tä õ'käfwelche

¹ Ow'en elh ángel tä khajay tä inuhchä tä tälh puleye. Yen w'uya pule wet lawo i'pe lhetek, wet tate'pe isi hätet iwoye ifwala, wet takäläy hätet iwoye itäj tä lhaipiyenchetshi.

² Wet ichäjilhi takwey n'olhämet lehifwaj tä õhch'enhi, wet t'äsejpe takälä tä lefwomkat häp lewomekitaj, wet takälä elh tä lets'amkat t'äsejpe honhat.

³ Wet ifwitsenej lechos tä t'än, hätet iwoye t'owalhaj tä y'ip. Häpet tä t'än, äp pitsaje siete pelhay lhayis lepak.

⁴ Wet tä oläte tähestso, ofwetaj olesayen lhämtes. Mat äp oläte n'opak tä tum puleye tä tahuy n'oye tä yok: –Yej lesayen, mat askat wet amajej häp siete pelhay lhayis lhämtestso.

⁵ Wet ángel tä ow'en tä t'äspe lewomekitaj lhäy'e honhat, ipiyen puleye takwey tä lefwomkat

⁶ wet yok: –Häp elh tä iläy yämlek tiyäj'attsiy, wet äp lham tä lhenek pule, lhäy'e honhat, lhäy'e lewomekitas, lhäy'e nilhokej m'ayhay tä ihiche tähestso, lhämet n'oyej tä oyok, “Noj t'at lewhäy.

⁷ Tsi chik ángel tä siete yafwuthichela lefwol trompeta, häpkhilek lhayäm matche häp m'ak tä Dios pajche t'uhläk iwoye, mälhyej tä iwo silätayej lakawos profetas.”

⁸ Wet äp yachajo tä oläte n'opak tä tum puleye tä äp tahuy n'oye tä yok: –Mäyeh n'olhämet lehifwaj tä õhch'enhi tä ihi takwey häp ángel tä t'äspe lewomekitaj lhäy'e honhat.

⁹ Wet ohoye ángel tä õ'chen n'oye wet oyok: –W'en n'oho n'olhämet lehifwaj. Lham nichulh n'oho wet yok: –Chuma, tufw. Chik ihi hak'aj, hätehlat iwoye akäyek tä hak'onek, mat chik nichätho hats'e, tapayhla.

¹⁰ Wet otchuma n'olhämet lehifwajtso tä ihi ángel takwey wet otufw. Tä ihi ok'aj, hätet iwoye akäyek, wuj tä hak'onek, mat tä otim, tä nichätho ots'e, nech'e tapay t'at.

¹¹ Wet nech'e õ'fwel n'oho wet õyok: –Achajo tä lhen asilätyaja häp lhämet tä Dios itayhtejlä wujpey wichi tä w'enhache lhamejen, häp wichi tä ihiche honhates tä lhämtes w'enhahiche, lhäy'e laka niyatey.