Ap.Lh 6 - Biblia Wichi

Dios leles tatshupiye siete hin'ol yämlek tach'ote lechumet

¹ Fwalastso tä lhäy'epej lhip tä wujpe Judío lhayis tä ihänlhi Jesús, iche iyhäj lhamel tä ihumin tä iten Griego lhayis lakeyes, wet iyhäj ilehiyejt'a Hebreo lhayis lakeyes. Wet lhamel tä iten Griego lhayis lakeyes yok: –Häp hin'ol tä iwom n'olhäk fwalapej wujit'a tä itetshan tesalis tä in'oyejen.

² Tä mälhyejtso, apóstoles tä ihi doce ihutwek nilhokej Dios leles wet ifwenho tä yok: –Isit'a tä olhamel oleyej tä oyen silätyaja Dios lhämtes tä olhainahhatej tä otetshan n'olhäk.

³ Häp tä tamenej, ipuhfwas, is che let'uyaykwe siete hin'ol tä i'amejen. Mat is che häpehen iyhäj tä õyäme tä isen, lhäy'e tä Espíritu tä Dios T'amajchet tapokwe, lhäy'e tä ihanej m'ak tä iwoye, häpkhilek y'atshupyeneje lechumetna.

⁴ Wet olhamel otujlhahichela ochumet tä häpe ot'alhyaj lhäy'e tä oyen silätyaja Dios lhämtes.

⁵ Tä nilhokej lhamel ihuminche täjtso, tatshupiye hin'o tä lhey Esteban, häp elh tä wuj tä t'ekhaye Jesús lhäy'e tä Espíritu tä Dios T'amajchet tapoyej. Häte tatshupiye iyhäj tä lheyes Felipe, Prócoro, Nicanor, Timón, Parmenas, lhäy'e Nicolás tä häpe hin'o tä Antioquía lhele tä pajche lhayen häpeya Judío.

⁶ Wet lhamel ihäne apóstoles yämlek iwo t'alhyaja'pe wet itiche'pe takweyey.

⁷ Wet nem koyhyaj tä t'aylhatshi Dios lhämet, wet lhäy'epej lhip tä wujpe lhamel tä ihi Jerusalén tä t'ekhaye Jesús. Häte wujpe sacerdotes iwo t'ekhahyaja.

Õ'tsoklhi Esteban

⁸ Esteban häpe hin'o tä yenlhi n'otetnhay lhäy'e m'ayhay tä wichi t'iseltejen, häp tä Dios lakäpfwayaj tä is lhäy'e lakhajyhayaj tapoyej.

⁹ Mat iche iyhäj Judío lhayis tä laka n'ohusew'et lhey “N'olhämtshay Kan'ohusew'et”, lhamel itayhtejlä lhämtes häp Esteban. Iche iyhäj tä tälhe Cirene, lhäy'e iyhäj tä tälhe Alejandría, wet iyhäj tälhe Cilicia lhäy'e Asia.

¹⁰ Mat lhamel ikalhihit'a Esteban, tsi tä yämlhipej, Dios laka Espíritu wuj tä itiyej lehanyaj.

¹¹ Tä mälhyejtso, lhamel iwo lakahaya hin'ol iyhäj yämlek t'isufwkaneje lhämtes tä fwetaj iläte n'aji Esteban tä isitäyen Moisés lhäy'e Dios.

¹² Wet lhamel lhämtestso ika'tshayen wichi, lhäy'e hin'ol tä thänhäy, lhäy'e iyhäj tä lhayen lewosayej Ley p'ante tälhe Moisés. Wet lhamel inuye Esteban wet itsoklhi, wet ihäne Concilio tä Lhamya.

¹³ Wet häte ichäj alhoho häp hin'ol iyhäj tä lhämtes kamatachehen tä yok: –Häp hin'otsi ilehiyejt'a tä itiyej leläkwyhanyajay häp Dios Lew'et tä T'amajchet lhäy'e Ley p'ante tälhe Moisés.

¹⁴ Olhamel oläte naji tä yok, “Jesús tä Nazaret lhele iwasthihila Dios Lew'etni, wet itäyhthila lakeyes tä Moisés p'ante hin'äy n'amejen, wet lham yenhilhila iyhäj tä nech'ayhis.”

¹⁵ Wet nilhokej Concilio tä lhamel iyahin Esteban, hiw'en tä lete'pe mälhyej che häpe t'at ángel lete'pe.