Ap.Lh 5 - Biblia Wichi

Ananías lhäy'e Safira fwetaj ifwech'enlhi Dios

¹ Mat iche elh tä lhey Ananías, lhäy'e lech'efwa tä lhey Safira, hin'otso iwom laka honhat.

² Wet lhamel y'ajwek letichunhayaj tä iwoye tä iskat lhip laha, wet tachuma lhip elh wet yachaje apóstoles yämthilek lhamel itetshan m'ak chik iwoyeje.

³ Mat Pedro tahuyej hin'o tä yok: –Ananías, ¿chipte tä letach'anlhaye Satanás tä tiyäjo ahusek wet leskat lhip chinaj t'äj, wet ne'tek lefwech'enlhi häp Espíritu tä Dios T'amajchet tä lefwetaj nilhok t'at chinaj t'äj tä aka honhat laha tä lew'en n'ohohen? ¿Mat chipte?

⁴ Tsi tä kamaj kawoma honhattso, alewuk t'at, wet tä äp lewom, alewuk t'at chinaj t'äj tä laha. Tä mälhyejtso, ¿chipte tä lefwetaj lewoynejetso m'ak tä lewoye? Oyok, häpkhit'a hin'ol tä lefwech'enwethä, mat lefwetaj lefwech'enlhi häp Dios.

⁵ Tä Ananías iläte, nichät katsi wet y'il. Wet nilhokej wichi tä ihanch'oye wuj tä lenowayhyaj ihi.

⁶ Nämhen mamses wet ikäfwelche lep'itsek, wet yikchufwi tä tajänch'oye.

⁷ Tä paj tä tajyäme tres horas, nech'e näm lech'efwa, mat ihanhiyejt'a m'ak wit'äytso.

⁸ Pedro tay'ätshane tä yok: –Lhek fwel n'oho, ¿hä matche tä mälhyejn'ajtso laha häp amel aka honhat tä lewomay? Lham nichulho wet yok: –Matche, lahanaj t'at täjtso.

⁹ Wet Pedro yok: –¿Chipte tä am lhäy'e hach'efwa lefwetajay lhelhte häp Lhawuk laka Espíritu? Nech'efwaj tä nämhen lhamel tä yikmatchufwi hach'efwa p'itsek tä tajänch'oye, wet athana häte yikhilachufwi häp am hap'itsek.

¹⁰ Häpet tä iwoyetso, atsinha nichätwhäye lepach'ol wet y'il. Tä mamses tiyäjchufwi hup, hiw'en lep'itsek, wet äp yikchufwi wet itiwhäye lech'efwa lep'itsek tä tajänch'oye.

¹¹ Wet nilhokej Dios leles wuj tä lenowayhyaj ihi, lhäy'e nilhokej wichi iyhäj tä ihanch'oye m'ak wit'äyhyajtso.

N'otetnhay lhäy'e m'ayhay tä iselkat wichi

¹² Wujpe n'otetnhay tä apóstoles yenlhi, lhäy'e m'ayhay tä wichi t'iseltejen. Lhamel lhaihutpejwek tä ihi Pórtico de Salomón,

¹³ wet wichi lhäy'e lhip tä iwujyen, mat ihichet'a elh chik tektshane yämthilek lhay'aje lhamel.

¹⁴ Mat iche iyhäj tä itiyej lechayaj Lhawuk, hin'ol lhäy'e atsinhay, wet lhäy'e lhip tä wujpe lhamel tä Dios leles.

¹⁵ Wet wichi tachumapej häp t'inhayaj länhay, wet iti'pe lemäwetes lhäy'e lehowetes wet itihiche hup kawayhil. Tsi lhamel yok: –Chik Pedro nekhichela täja, tejlak lepeyak chik i'pe elh chik häpe, ichesla.

¹⁶ Häte nämhenpej wuj wichi tä tälhe lew'etes tä tott'aye Jerusalén. Lhamel ichäj t'inhayaj länhay lhäy'e iyhäj tä ahät länhay, wet nilhokej lhamel ichesen.

Niyatey itiyej laka'tshayaj apóstoles

¹⁷ Tä Sacerdote tä Lhamya ihanch'oye tähestso, wet wuj tä t'ischenyaj ihi, lhäy'e Saduceo lhayis tä iyej.

¹⁸ Tä mälhyejtso, lhamel ne'tek õ'tsokwethä apóstoles wet õ'thatho n'op'onthi.

¹⁹ Mat tä honatsi näm ángel tä tälhe Lhawuk, wet ifwoyenche n'op'onthi lepelis wet inuhatphä lhamel. Wet ifwenhomche tä yok:

²⁰ –Mähen, hoye Dios Lew'et wet kastejphäla chik lefwenhomche wichi m'ak tä häpe häp n'ow'atshancheyaj tä nech'ayek tä tälhe Jesucristo.

²¹ Tä mälhyejtso, tä nech'e fwamlafwaj lhamel ihoye t'at Dios Lew'et wet iwo tesa tä iwo lechufwenyaja. Wet Sacerdote tä Lhamya lhäy'e lech'otfwas ihutwek nilhokej Concilio tä Lhamya, wok oyok, Judío lhayis tä thänhäy, wet ne'tek sip'äl yike apóstoles tä ihi n'op'onthi.

²² Mat tä lhamel nichäte n'op'onthi, hiw'enhit'a. Wet tapile niyatey wet iwo silätayej lhamel tä yok:

²³ –Iwuhuy, tä olhamel onchäte n'op'onthi, wet ow'en tä t'unhiche t'at lepelis, wet sip'äl tä t'uye iyej t'at. Mat tä ofwoyenche, ow'enhit'a elh chik ilech'oye.

²⁴ Tä Sacerdote tä Lhamya iläte, lhäy'e häp hin'o tä niyatej sip'äl tä t'uye Dios Lew'et, lhäy'e sacerdotes tä len'ohyajay ihiche, lhamel tay'ätshan lhamehen tä yok: –Chik mälhyej'attso, ¿atsihila ifwala chik nofwila m'ayhay tä mälhyejenna?

²⁵ Mat nech'e näm häp hin'o elh, wet ifwenho lhamel wet yok: –Lhek yahinya, häp hin'olnaj amel lene'tek õhp'ohiche, ihi t'at Dios Lew'et wet ichufwenhen wichi.

²⁶ Tä mälhyejtso, sip'äl lhäy'e laka niyat lhamel yike apóstoles. Mat tek wo m'ak chik iwoyeje, tsi nowayek wichi ithatejwethä tuntey häp lhamel.

²⁷ Wet ichäje Concilio, wet Sacerdote tä Lhamya tahuyejen tä yok:

²⁸ –Olhamel on'äyejnaj amhohen tä lewo lheya Jesús tä lechufwenhen wichi. ¿Mat atsi m'ak tä lewoye? Tsi athana achufwenyaj tapoyej Jerusalén, wet äp let'isej tä lhäme tä olhamel t'at tä otes hin'otso t'ilek.

²⁹ Mat Pedro lhäy'e iyhäj apóstoles lhamel yok: –Lhek yahinya, iwohiyet'ak n'am woye Dios lhämtes, mat owohiyet'a hin'ol lhämtes.

³⁰ Häpe t'at n'amel lhatetsel laka Dios tä inuhatphä Jesús tä tälho n'op'itseyhay, häp hin'onaj amel lene'tayek õ'län tä õ'fwuhatlhi tä ihi cruz.

³¹ Wet tä inuhatphä, äp ineyhatphä wet itihi lefwomkat, yen häpeya Niyat tä Lhamya wet N'ofwayhthi, yämthilek Israel lhayis iwo lehusey iyhäja wet tatäy lech'isukyajay.

³² Olhamel ohanej tähestso wet oyäme t'at. Wet häte Espíritu tä Dios T'amajchet tä lham hiw'enhomche wichi tä iwoye lhämtes, häp tä äp yäme.

Gamaliel lhämet

³³ Tä Concilio iläte täjtso, wet lewäk ihi lhamel wet t'uhläk ilänhen apóstoles.

³⁴ Mat iche häp Fariseo tä lhey Gamaliel tä iyej niyateytso, lham häpe t'at elh hin'ol tä lhayen lewosayej Ley p'ante tälhe Moisés, wet nilhokej wichi wuj tä yen hin'oya. Lham takasit wet yok: –Hänay ayej alhoye häp hin'oltsi.

³⁵ Wet nech'e tahuyej leniyatfwas wet yok: –Yaiyhäj tä ahäpehen Israel leles, is chik lenowaye häp m'ak tä lefwetaj lewoyeje hin'oltso.

³⁶ Tichunche ifwalaste hin'o tä lhey Teudas, lham lhain'älit tä inu'pe iyhäj, wet iche cuatrocientos (400) hin'ol tä ihänlhi. Mat ilepese õ'län, wet nilhokej lhamel ifwtsatpehen honhat wet noj t'at.

³⁷ Wet äp ifwalaste õ'wo t'ufwahtesa wichi, n'äl Galilea lhele tä lhey Judas, lham häte ikalhi iyhäj yämthilek ihänlhi. Mat äp õ'län, wet nilhokej lhamel ifwtsatpehen honhat.

³⁸ Häp tä tamenej tä ofwen amhohen tä oyok, Leyayej häp hin'oltso, ch'anlhaye t'at. Tsi chik m'ak tä lhamel iwoye tälhe hin'ol, nofwila.

³⁹ Mat chik tälhe Dios, tek lekalhihila. Uyayhlä, tsi elat letatayhlä Dios. Tä iyhäj iläte Gamaliel lhämettso, iwoye t'at.

⁴⁰ Tä mälhyejtso, t'äne häp apóstoles wet ne'tek õ'tasinwethä. Wet äp ifwenhomche tä yok: –Yej lhachajo tä lewo lheya Jesús tä lhämhoplhi wichi. Wet ilanche lhamel.

⁴¹ Wet lhamel yikch'oye niyatey, mat lakäjyaj ihi tä Dios tach'anlhaye tä Jesús lhey tamenej tä õyen w'et m'ayhaya.

⁴² Wet nilhokej ifwalas lhamel ilehiyejt'a tä iwo lechufwenyaja tä ihi Dios Lew'et lhäy'e lhamel lew'etes, wet iwopej silätayej wichi tä Jesús häpe t'at N'ofwayhthi tä Dios Chenek.