Ap.Lh 2 - Biblia Wichi

Espíritu tä T'amajchet nichätpe Dios leles

¹ Tä nichäte lewhäy n'okäjyaj tä lhey Pentecostés, nilhokej lhamel lhaihutwek.

² Wet iseltejen m'ak tä tälh puleye, mälhyet iwoye yafwthitaj lepak tä äytaji, wet tapoyejej lew'et tä lhamel ihi tä tatachephä.

³ Wet äp lhain'ältej lhamel n'ok'ajlhich'ul tä hätet itäj lhal, wet lhaiw'enhathen tä tiyäjche'pe elh tefwajpejni.

⁴ Wet nech'e nilhokej lhamel tä Espíritu tä Dios T'amajchet tapokwe, wet iwo lhämtes iyhäja, mälhyej n'olhämet at che häpe tä Espíritu yämyenejlhi.

⁵ Wet iche häp Judío lhayis tä ihumin tä n'okwiyejpej Dios, lhamel tälhomche lew'etes tä i'pe honhat wet ihi t'at Jerusalén.

⁶ Tä pitsaje lepaktso, wujpe lhamel tä lhaihute, mat ihanhiyejt'a m'ak tä häpe, tsi elhpej iläte lham lhämet tä Dios leles iwoye tä yämwethä.

⁷ Wet lhäy'e lhip tä lhamel iseltejen, wet yok: –Lhek yahinya, häp nilhokej tähesna tä yämwethä, ¿hä kahäpeya Galilea lheley?

⁸ ¿Mat chip iwoye tä y'aläte tä ihanej t'at n'amel ilhämtes tä w'enhahiche?

⁹ Tsi ikana n'amel tä y'atälhe Partia, Media, Elam, Mesopotamia, Judea, Capadocia, Ponto, Asia,

¹⁰ Frigia, Panfilia, Egipto, lhäy'e Libia lhipey tä tott'ahomche Cirene. Häte iche asiyakas tä tälhe Roma,

¹¹ häp Judío lhayis tä lhamenya lhäy'e wichi iyhäj tä pajche lhayen häpeya Judío lhayis. Wet iyhäj tälhe Creta lhäy'e Arabia. ¡Mat lhek yahinya, y'alhokej tä y'aläte t'at elhpej n'amel ilhämet tä hin'oltso iwoye tä yäme Dios lhenhay tä wus!

¹² Wet nilhokej lhamel wuj tä iseltejen, kalelhäjit'a letichunhayajay, wet tay'ätshanejpej lhamehen wet yok: –¿Atsi m'ak tä häpe täja?

¹³ Mat iyhäj itiyej leläkwyhanyaj wet yok: –¡W'oknhas t'at!

Pedro iwo lhämeta

¹⁴ Wet nech'e Pedro takasit, lhäy'e iyhäj apóstoles tä ihi once, wet ifwitsenej lhämet wet yok: –Judío lhayis, lhäy'e nilhokej amel tä lheyayhi Jerusalén, ch'ahuyaye m'ak tä oyäme wet hanayej.

¹⁵ Häp lhamel tä lhenayek w'oknhas, oyok, w'oknhasit'a, tsi kamaj nech'e fwala t'at.

¹⁶ Mat häp m'ak tä lew'enay kana, häpe t'at tä profeta Joel yen p'ante silätyaja tä yok:

¹⁷ “Che nichäte fwalas tä lepese, yokwe Dios, otsäyhla'pe oka Espíritu nilhokej wichi. Häp ales tä hin'ol lhäy'e tä atsinhay yenla silätyaja m'ak tä häpe oka Espíritu lhämet, wet mamses hiw'enla lew'enhay, wet iyhäj tä thänhäy tafwilhanhihena.

¹⁸ Wet okawos tä hin'ol lhäy'e tä atsinhay otsäyhla'pe oka Espíritu che nichäte fwalastso, wet häte yenla silätyaja olhämet.

¹⁹ Wet opäynhiyela m'ayhay tä ipuleye tä iselkathihena wichi, lhäy'e n'otetnhay tä ihonhate, häp w'oyis, itäj, lhäy'e tutsaj tä wuj.

²⁰ Wet fwala nech'e honatsi ihihila, wet wel'a mälhhiyejat w'oyis, tä kamaj ninäma Lhawuk laka fwala tä wuj lhäy'e tä letoyaj ihi.

²¹ Mat elh che häpe che t'änch'oye Lhawuk, tafwayhla.”

²² Wet Pedro äp yok: –Tä mälhyejtso, Israel lhayis, ch'ahuyaye olhämtes, tsi oyäme Jesús tä Nazaret lhele. Amel lehanej t'at tä lham häpe elh tä newache Dios t'ulhnhayaj che häpe tä iyej, tsi häp tä isej lham, Dios yenlhi letetnhay lhäy'e m'ayhay tä leseltejen tä lew'en.

²³ Mat tä paj õyachaj amehen, mälhyej Dios letichunhayaj lhäy'e lehanyaj tä pajche iwaklhat tä iwohiyela. Wet amel lelänay, tsi lene'tayek hin'ol tä ni'isahen hip'ajtej cruz.

²⁴ Mat Dios inuhatphä tä tälho n'op'itseyhay, ifwayhtej t'at leteläythayaj tä häpe t'ilek, tsi n'ot'ilek ihanhiyejt'a che yen lhäytseka.

²⁵ Tsi David yäme p'ante Jesús wet yok: “Ow'en häp Lhawuk tä ipej n'oyej, ihi t'at olhip tä ofwomkat, wet tek wohla m'ak che iwit'äyenhilan'o.

²⁶ Häp tä tamenej tä lhäy'e lhip tä okäjyaj ihi wet ochoylhi t'at. Oniwhayaj ihi,

²⁷ tsi tek lewomla n'ohi honhat tä n'op'itseyhay lew'et, wet tek letach'anlhahiyelak najut ot'isan tä amajchetn'o.

²⁸ Pajche lepäyen n'oye n'äyij tä tiyäje n'ow'atshancheyaj, wet tä lhe n'oyej, matche tä okäjyaj ihi.”

²⁹ Wet Pedro äp yok: –Ipuhfwas, matche olhämet tä ofwel amhohen tä oyok, Häp lhachäti David pajche ileyej p'ante honhat wet õtjänch'oye, wet lep'itsekhi kamaj in'amejen.

³⁰ Mat lham äp häpe p'ante profeta wet ihanej ihi m'ak tä ihichela. Tsi Dios pajche hit'unteji lhämet tä ifwenho tä yok, “Otihihila aniyatyaj häp ales tä lepes lheley elh.”

³¹ Wet täjtso, mälhyej che David pajche hiw'en p'ante m'ak tä Dios iwohiyela. Tsi tä yok, “Õ'womhihit'ala honhat tä n'op'itseyhay lew'et, wet tek najutla t'isan”, yäme t'at N'ofwayhthi tä Dios Chenek tä inuhiphäla tä tälho n'op'itseyhay.

³² “Wet kalelhäj t'at, Dios inuhatphä naji Jesús, wet nilhokej olhamel ow'en tä matche t'at täjtso.

³³ Tä paj wet Lajcha Dios ineyhatphä wet itumtej lhip tä lefwomkat, wet hiw'enho Espíritu tä T'amajchet tä pajche ifwenho. Wet athana Jesús itsäy o'pehen Espíritutso, tsi häpe t'at tä amel lew'enay lhäy'e tä lelätayena.

³⁴ David lhamhit'a p'antek nephä tä iho puleye. Tsi lham yop'antekwe: Lhawuk ifwenho Owuk wet yok, Tayhiphä olhip tä ofwomkat,

³⁵ wet otihlachufwi apach'ol häp atayhfwas.

³⁶ “Tä mälhyejtso, is che nilhokej amel tä Israel lhayis wuj tä lehanej ihi tä Jesús tä amel lene'tenaj che õhp'ajtej cruz, Dios yen häpeya Lechenek tä N'ofwayhthi, Lhawuk.”

³⁷ Tä wichi iläte täjtso, wet lechowhal nilhak'alwethä lhamejen, wet tay'ätshane Pedro lhäy'e apóstoles iyhäj wet yok: –Yaiyhäj, ¿atsi m'ak che owoye olhamel?

³⁸ Pedro nichulho wet yok: –Woyay ahusey iyhäja, wet elh weihalhapej abautisaynej Jesucristo lhey, häpkhilek Dios itäyhat amejen asukyajay wet hiw'en amhohen Espíritu tä T'amajchet.

³⁹ Tsi m'ak tä Dios ifwelna alewuhuy t'at, lhäy'e ales, lhäy'e nilhokej wichi tä atosehen lew'etes. Wok oyok, elh at che häpe che Lhawuk Dios t'äne.

⁴⁰ Wet wuj Pedro lhämtes tä iwoye tä inityenej lhamel wet yok: –¡Afwayhthen tä lheyayej wichi tä ni'isahenna!

⁴¹ Wet häp tä mälhyejtso, häp lhamel tä tach'ahuye lhämtestso lhaibautisaynhen, wet fwalatso iche tres mil wichi tä lhaip'ajtej Dios leles.

⁴² Wet lhamel lhay'amkatej m'ak tä apóstoles ichufwenejen, wet hiw'enhomche iyhäj m'ak tä iyej, wet iwopej let'alhyaja, wet tachufwiyejpejwek Santa Cena.

M'ak tä Cristo laka wichi tä ichunpe honhat iwoye

⁴³ Tä wichi hiw'en wujpe n'otetnhay tä apóstoles yenlhi, wet nilhokej lhamel wuj leselthayaj wet n'okwiyej Dios.

⁴⁴ Wet nilhokej Dios leles wuj tä lhaip'ajtitwek, wet hiw'enpej lhamhomche m'ak tä hiw'en.

⁴⁵ Elhpej iwom lakäywet wok laka honhat, wet hiw'enho laha elhpej tä iwatlä m'ayek, yämthilek ichäj.

⁴⁶ Wet nilhokej fwalas lhamel lhaihuthiwek Dios Lew'et tä ihi Jerusalén. Wet tä ihiche lew'etes, tachufwiyejpejwek Santa Cena lhäy'e tä t'ekhen. Tä iwoyepej, wuj tä lakäjyaj ihi, wet lehusey ts'ilakejchä m'ak tä isna.

⁴⁷ Wet iwunitpej Dios, wet nilhokej wichi yäme tä isen lhamel. Wet fwalapej fwalapej Lhawuk y'isej iyhäj wichi tä tafwayhen.