Ap.Lh 12 - Biblia Wichi

Õ'län Santiago wet äp õ'thatho n'op'onthi häp Pedro

¹ Häp ifwalastso Rey Herodes iwo laka'tshayajayej Dios leles,

² wet ne'tek õ'länej n'ofwajnhat häp Santiago, Juan lechila.

³ Wet tä Herodes hiw'en tä Judío lhayis ihuminche täjtso, wet ifwenho laka sip'äl wet yok: –Häte tsoklhi Pedro. Häpe t'at lewhäy tä Judío lhayis yenlhi lakäjyaj tä tuj pan tä levadura newahi.

^4-5 Wet Herodes äp ifwenho laka sip'äl wet yok: –Thatho n'op'onthi Pedro yäk tajyäme Pascua, wet tonphäla yämthilek opäyne wichi wet y'ithatejlhi letes. Tä mälhyejtso, Pedro ihi t'at n'op'onthi, lhäy'e lhip tä õt'uye, iche cuatro turnos, turnopej cuatro sip'äl. Mat Dios leles mälhewek lehusey tä iwo t'alhyaja'pe.

Dios ifwayhtej n'op'onthi häp Pedro

⁶ Häp honatsitso tä häpe lewhäy che ifwala yämthilek Herodes ipäyne wichi häp Pedro, wet Pedro imä t'at tä ihi lechowej sip'äl täkwfwas tä yäyit lhamejen t'akay tä chinhas, wet sip'äl iyhäj ihi t'at lepe tä t'uye.

⁷ Wet nech'e n'äl ángel tä tälhe Lhawuk, wet isi ihutunchufwi lhip tä Pedro ihi. Wet ángel tachumpe Pedro wet hin'omhatlhi, wet yok: –¡Kelit, nephä! Häpet tä mälhyejtso, nichätchehchä chinhas tä ihi Pedro takweyey.

⁸ Wet ángel yok: –Unthi akawak wet wo anisäja. Wet Pedro iwoye, wet ángel äp yok: –That atape haw'uy wet nek n'okwe.

⁹ Pedro yikche wet inukwephä, mat ihanhiyejt'a che matche wok kamatache m'ak tä ángel iwoye, mat fwetaj lefwilhek t'at.

¹⁰ Wet lhamel tafwayej sip'äl tä tumejlä lepe tä ichun, lhäy'e iyhäj tä iw'echehi. Tä nichäte lepe tä chinaj tä tumejlä lakawayhi, lhaifwoyenche t'at wet lhamel inukwephä wet yikhen. Tä inukwe lakawayhi, nech'e ángel yikch'oye.

¹¹ Tä nojphä Pedro laka nahati, yok: –Nech'e ow'en tä matche t'at tä Lhawuk ichen n'oye laka ángel yämthilek ifwayhat n'oyej Herodes lhäy'e nilhokej m'ak tä Judío lhayis t'uhläk iwoyej n'oye.

¹² Wet tä letichunhayaj mälhyejtso, ihoye häp María tä Juan Marcos lako lew'et tä wujpe wichi tä ihi tä lhaihutwekhen tä iwo t'alhyaja.

¹³ Tä nichäte, wet y'ajlhi häp lepe tä tumejlä lakawayhi, wet atsinha lhutsha tä lhey Rosa iyahne atsi tä häpe.

¹⁴ Tä nitäfwelche lepak tä häpe Pedro, wet wuj tä lakäjyaj ihi. Wet tek ifwoyenche ayej lepe, mat inu alhoho tä yäpil lech'oye, wet ifwenho iyhäj wet yok: –¡Pedro tä ihi lepe!

¹⁵ Mat lhamel nichulho tä yok: –¡Ach'isuk! Mat lham yok: –¡Matche olhämet! Mat lhamel yok: –Oyenek laka ángel p'iya.

¹⁶ Mat Pedro tujlhache t'at tä y'ajlhi lepe. Wet tä lhamel ifwoyenche, lhäy'e lhip tä t'iseltejen tä hiw'en.

¹⁷ Mat lham takwey y'aje lhamel, ne'tek iwo letamseka, wet nech'e ifwenhomche häp m'ak tä Lhawuk iwoyeje tä inuhatphä tä tälho n'op'onthi. Wet äp yok: –Fwenhola Santiago lhäy'e Dios leles iyhäj. Tä ileyej lhämtesna, yik, ihoye lhip elh.

¹⁸ Tä nech'e ifwala sip'äl wuj tä lelhakli ihi wet lhäy'e lhip tä nowayhen, wet ihanhiyejt'a m'ak tä õ'woyeje Pedro.

¹⁹ Wet rey Herodes ne'tek t'ukwe, mat tä lhamel nilhokaye, tay'ätshaneje sip'äl tä pajche t'uye, wet ne'tek õ'länhen. Tä tajyäme täjtso, Herodes yikch'oye Judea, wet ihoye Cesarea wet ihi.

Herodes ileyej honhat

²⁰ Häp rey Herodes wuj tä fwitsaje wichi tä ihi hupuy tä Tiro lhäy'e Sidón. Wet lhamel y'ajwek tä t'uhläk ihoye wet t'alheje che letamsek ihi, tsi lhamel isejpej lhäk tä tälhe lham laka honhat. Wet lhamel lhaip'altsene lham lakawos elh tä lhey Blasto tä len'ohyaj ihi yämthilek tach'otehen, wet lham iwoye. Tä mälhyejtso, lhamel ihoye t'at rey.

²¹ Tä nichäte ifwala tä Herodes itshupyene, lham taw'uyhi niyat lew'uyis tä isis wet tatayphä'pe lakalelhthayajw'et wet iwo lhämeta.

²² Tä wichi iläte, ifwitsenej lechos tä t'änhen wet yok: –¡Hin'ohit'a tä yämlhi, dios t'at!

²³ Häpet tä mälhyejtso, ángel tä tälhe Lhawuk ilänej t'inhayaj, wet iwos tuj t'isan, wet y'il. Tsi iwujyenhit'a Dios tä matche.

²⁴ Wet ifwalastso Dios lhämet t'aylhatshi, wet lhäy'e lhip tä wujpe wichi tä ichaye Jesús.

²⁵ Wet Bernabé lhäy'e Saulo, tä wak'alh nilhokej m'ak tä iwoye, lhamel tälhe Jerusalén wet ichäj Juan Marcos.