Ap.Lh 11 - Biblia Wichi

Pedro ifwenho Dios laka wichi tä ihi Jerusalén häp m'ak tä õ'woyeje Cornelio lhäy'e iyhäj

¹ Häp apóstoles lhäy'e Dios leles iyhäj tä ihi Judea ihanch'oye tä wichi tä kahäpeya Judío lhayis häte lhamel tachumlä Dios lhämet.

² Wet tä Pedro tapinho Jerusalén, lhamel tä iwujyen n'otetnek tä n'olhijtsek tatayhlä

³ wet yok: –¿Chipte tä lehoye n'aji wichi tä kahäpeya Judío lhayis wet äp letachufwiyej lhamel tä t'ekhen? Lehanej t'at tä häpehen wichi tä n'olhijtsek newayej.

⁴ Wet Pedro ifwenho nilhokej m'ayhay, tälhe täjn'aj iwo tesa, wet yok:

⁵ –Olham oihinaj Jope, wet tä owo ot'alhyaja iche m'ak tä ow'en, m'ak tä mälhyej iwoye wesaj tä wuj tä õyäythen letselhäs, wet inuhchä tä tälh puleye yäk näm n'oye.

⁶ Wet oyahnho tä ot'uhläk ow'en m'ak tä ihi, wet iche itshätäy tä w'enhache lhamej, lhäy'e iyhäj tä fwitses, lhäy'e m'ayhay tä lhaitonchehen honhat, lhäy'e afwenchey.

⁷ Wet oläte n'opak tä tahuy n'oyej tä yok, “Pedro, nephä, länhen wet tuj.”

⁸ Mat olham onchulho wet oyok, “Kha, Iwuk, tsi ohanhiyejt'a chik otuj m'ak tä kan'ot'amajcheta wet äp kok'aye.”

⁹ Wet n'opak tä tum puleye äp yachajo tä tahuy n'oyej tä yok, “Häp m'ak tä Dios hi'isyen, yej fwetaj kan'ot'amajcheta.”

¹⁰ “Wet tres veces tä mälhyejtso, wet nilhokej m'ayhay nech'e yäpil puleye.

¹¹ Häpet tä mälhyejtso, wet tres hin'ol tä n'ochenhay tä tälhe Cesarea tä t'u n'okwe, näme häp hup tä olhamel oichufwi.

¹² Wet Dios laka Espíritu tahuy n'oyej tä yok, Pedro, mäkwe lhamel, yej kachu. “Wet seis hin'oltsi iwo ot'unfwaya tä oyik. Tä olhamel onchäte lew'et häp hin'o tä ohoye, ohochufwi.

¹³ Wet ifwel n'ohohen tä lham ihi lew'et, hiw'en n'aji ángel tä takasitwhäye wet ifwenho tä yok, Wo achenekaye Jope yämthilek ichäj alhoho Simón tä äp õyen lheya Pedro.

¹⁴ Lham ifwenla amho Dios lhämtes yämthilek letafway, lhäy'e nilhokej haw'et lheley.

¹⁵ “Wet tä owo tesa tä otahuyej lhamel, Espíritu tä Dios T'amajchet nichätche'pe, hätet iwoye täjnaj nech'e nichätpe n'amel.

¹⁶ Wet nech'e ohusekch'oye häp Lhawuk lhämet tä yok, Juan ibautisaynejte inät wichi, mat Dios ibautisaynhila amejen Espíritu tä T'amajchet.

¹⁷ “Tä mälhyejtso, tä Dios yen lhamel t'awayhata laka Espíritu, mälhyet iwoye tä yennaj n'amel lhatw'ayhata tä y'achaye Lhawuk Jesucristo, oyok, ¿atsi tä ohäpe chik ofwetaj on'äyejo m'ak tä lham Dios iwoye?”

¹⁸ Tä Dios leles iläte täjtso, iwo letamseka. Mat iwunit Dios wet yok: –¡Matche t'at tä Dios häte tach'anlhaye wichi tä kahäpeya Judío lhayis chik iwo lehusey iyhäja yämthilek ikatej lew'atshancheyaj tä t'un!

Wichi tä lew'et hupuy tä Antioquía iwo tesa tä lhayen Dios lelesa

¹⁹ Tä tajyäme tä õ'län Esteban, iwo tesa n'oka'tshayaj tä õ'tiyej Dios laka wichi wet ifwtsatpehen honhat. Iche iyhäj tä ilethane häp Fenicia, lhäy'e Chipre, lhäy'e Antioquía. Tä lhamel yäm kanhi, wet yen lhämeta Dios lhämet, mat ts'ilak t'at häp Judío lhayis tä lhamel iwo silätayej.

²⁰ Mat elhpej tä tälhe Chipre lhäy'e Cirene nämho Antioquía wet tatshupiye wichi tä kahäpeya Judío lhayis wet yen lhämetayej Lhawuk Jesús.

²¹ Wet Lhawuk lakhajyhayaj iyej lhamel, wet wujpe wichi iwo lehusey iyhäja wet t'ekhaye.

²² Tä Dios leles tä ihi Jerusalén ihanch'oye m'ayhaytso, lhamel ichene Bernabé häp Antioquía.

²³ Tä nichäte, hiw'en tä matche t'at tä Dios takäpfwayehen wichi, wet lham lakäjyaj ihi. Wet inityenej nilhokej lhamel wet yok: –Akhajyenhen, yej leyej Lhawuk, mat tujlhache, mälhewek ahusey.

²⁴ Tsi Bernabé häpe hin'o tä is wet wuj tä t'ekhaye Lhawuk, wet Espíritu tä Dios T'amajchet tapoyej. Wet wujpe wichi tä lhaip'ajtej Lhawuk.

²⁵ Tä paj Bernabé ihoye Tarso wet t'ukwe Saulo.

²⁶ Tä nilhoke, ichäje Antioquía, wet lhamel iyej Dios leles nekchäm tefwajni wet ichufwenhen wujpe wichi. Wet wichi tä ihi Antioquía lhamel p'ante tä ichun tä yen lheya Dios leles häp “cristianos”.

²⁷ Häp lewhäytso iche profetas tä tälho Jerusalén tä ihoye Antioquía.

^28-30 Wet elh tä lhey Agabo takasit wet Dios laka Espíritu yämyenlhi tä yok: –Ihichela nehläs tä wuj tä ihihila nilhokej honhates. Tä Dios leles iläte, lhamel fwetaj is chik ichene lech'otyaj häp Dios laka wichi tä ihi Judea, m'ak at chik häpe tä elhpej ikalhi. Wet mälhyejtso m'ak tä lhamel iwoye, wet hiw'enho Bernabé lhäy'e Saulo, ne'tek ihäne häp Dios leles tä lhamenya tä ihi Judea yämthilek hiw'enhomche iyhäj. Wet matche, ifwalas p'ante Claudio häpe niyat Romano, wuj nehläs tä ihi honhat.