Ap.Lh 10 - Biblia Wichi

Cornelio lew'enek ihi wet iwo chenekaye Pedro

¹ Iche p'ante häp hin'o tä lhey Cornelio tä ihi hupuy tä Cesarea, lham häpe t'at sip'äl tä Italiano lhayis kaniyat.

² Lham lhäy'e lew'et lheley häpehen iyhäj tä n'okwiyejpej Dios. Häte lham iwompej chinaj t'äj tä hich'otyeneje Judío lhayis tä p'elitses, wet iwopej let'alhyaja.

³ Wet fwala elh p'ante tä fwala tatayhchä, hiw'enlä ángel tä tälhe Dios tä tiyäjchufwi hupch'o tä lham ichufwi wet tahuyej tä yok: –¡Cornelio!

⁴ Wet Cornelio iyahin wet wuj tä nowaye. Wet tay'ätshane tä yok: –¿Chiwoye, Iwuk? Ángel yok: –Dios ihuminche t'at alhyajay lhäy'e m'ak tä lewoyepej tä letach'otehen p'elitses.

⁵ Athana wo achenekaye hupuy tä Jope yämlek ichäj alhoho hin'o tä lhey Simón tä äp õyen lheya Pedro.

⁶ Iyej Simón elh tä häpe tsänt'äheswo tä lew'et iwhäye lewomekitaj.

⁷ Tä ángel ileyej lhämet tä iwoye, yikch'oye. Wet Cornelio t'äne täkwfwas lakawos tä ihi lew'et, lhäy'e elh lakawo tä sip'ä tä lham häte ihumin t'at Dios.

⁸ Wet ifwenho m'ak tä hiw'enn'e lhäy'e tä iläte. Tä ileyej, wet ichene Jope.

Pedro lew'enek ihi

⁹ Fwala elh p'ante tä fwala ikanhi, tä lhamel yikhen tä tott'aye Jope, Pedro ihoye hup lhip tä tumphä tä iwo let'alhyaja.

¹⁰ Wet nichuyu, t'uhläk t'ek. Wet tä õ'waklhat lhäk, mälhyet iwoye che nahati tä ilän wet lew'enek ihi.

¹¹ Hiw'en tä pule lhaich'enhi, wet nech'e inuhchä m'ak tä hätet iwoye wesaj tä wuj tä õyäythen letselhäs, wet iho honhate.

¹² Wet wujpe itshätäy tä w'enhache lhamej tä ihi, lhäy'e häp m'ayhay tä lhaitonchehen honhat, lhäy'e afwenchey.

¹³ Wet iläte n'opak tä tahuyej tä yok: –Pedro, nephä, länhen wet tuj.

¹⁴ Mat Pedro nichulho wet yok: –Kha, Iwuk, ohanhiyejt'a che otuj m'ak tä kan'ot'amajcheta wet äp kok'aye.

¹⁵ Wet n'opak äp yachajo tä yok: –Häp m'ak tä Dios hi'isyen, yej fwetaj kan'ot'amajcheta.

¹⁶ Wet tres veces tä mälhyejtso, wet nech'e wesaj yäpil puleye.

¹⁷ Wet tä Pedro wuj tä yen tichunhayaja täjtso, atsi m'ak tä yäme häp m'ak tä mälhyejtso tä hiw'en, wet nech'e Cornelio lechenhay näme huppe. Lhamel tay'ätshanejlhi Simón lew'et,

¹⁸ tä nilhoke, t'änch'oye tä yok: –¿Hä ikana häp hin'o tä lhey Simón tä äp õyen lheya Pedro?

¹⁹ Tä kamaj Pedro yen tichunhayaja lew'enekn'e, Dios laka Espíritu tahuyej wet yok: –Lhek yahinya, tres hin'ol t'u amche.

²⁰ Nephä, nuhchä wet mäkwe lhamel. Yej kachu, tsi olham tä ochen kana.

²¹ Wet Pedro inuhchä, wet tahuyej hin'ol wet yok: –Olham ohäpe t'at hin'o tä amel let'ukwe. ¿Atsi m'ak tä tamenej tä lenekhen?

²² Lhamel nichulho wet yok: –Olhamel onekhen tsi sip'äl kaniyat tä lhey Cornelio tä lechenek olhamel. Lham häpe t'at hin'o tä is alhoho wet n'okwiyejpej Dios. Häte nilhokej Judío lhayis yäme tä is. Wet Dios laka ángel ne'tek iwo kacheneka ame yämlek lehoye lew'et wet iläthiyela m'ak che lefwenhihola.

²³ Tä Pedro iläte, wet ihän lech'oye wet lhamel imäyej lew'et honatsitso. Tä nech'e fwala Pedro yikche lhamel, wet elhpej Dios leles tä lew'et Jope iwo t'unfwaya.

Pedro ihoye Cornelio lew'et

²⁴ Tä fwala elh lhamel nichäte Cesarea. Wet Cornelio inihihlä lhamel, lhäy'e lepuhfwas lhäy'e iyhäj tä lakalay'is tä lham t'änehen.

²⁵ Tä Pedro nichäte lew'et, Cornelio yistejlä wet takhoschufwi wet n'okwiyej.

²⁶ Mat Pedro ineyhatphä wet yok: –Kasit, olham ohin'o t'at, mälhyet iwoye am.

²⁷ Wet yikej t'at tä yämhoplhi, wet ihochufwi lewukwe wet hiw'en wujpe wichi tä ihi tä lhaihutwek.

²⁸ Wet tahuyej lhamel wet yok: –Amel lehanayej t'at tä õn'äyejo Judío lhayis che lhay'ajej wichi iyhäj wok ihochufwi lewukwey. Mat Dios ipäyennaj n'oye tä isit'a che oyäme elh at che häpe wet oyok, n'ot'amajchethit'a, kok'aye.

²⁹ Häp tä tamenej tä tälhe tä achenhay ihonaj n'oye, wet onek, tek olhainahhatej tähestso. Tä mälhyejtso, ¿atsi m'ak tä tamenej tä let'änay n'oye?

³⁰ Cornelio nichulho wet yok: –Häp fwala elh naji tä fwala tatayhchä, mälhyej lhampej olham owo ot'alhyaja tä oihi t'at ow'etna, wet nech'e lhain'älit n'oyej hin'o tä lew'uyis isi.

³¹ Lham tahuy n'oyej wet yok, “Cornelio, Dios iläte t'at alhyajay wet yen tichunhayaja hach'otyaj tä letiyejpej wichi tä p'elitses.

³² Lhek wo achenekaye Jope yämlek ichäj alhoho Simón tä äp õyen lheya Pedro. Iyej Simón elh tä häpe tsänt'äheswo tä lew'et iwhäye lewomekitaj.”

³³ Wet häp tä yofwajkwet owo cheneka hach'oye, wet is t'at tä lenek. Athana nilhokej olhamel oikana tä Dios tatache, wet ot'uhläk oläte nilhokej m'ak tä Lhawuk ne'tek lefwel n'ohohen.

Pedro iwo lhämeta tä ihi Cornelio lew'et

³⁴ Wet nech'e Pedro iwo lhämeta tä yok: –Athana nech'e ohanej tä matche tä Dios hiw'awlhatejchä lehumnhayaj tä itiyej wichi,

³⁵ tsi tachumlä elh che häpe che iwujyen Lhawuk wet iwoye m'ak tä is, Judío wok tej tä kahäpeya Judío.

³⁶ “Dios tahuyejte olhamel tä ohäpehen Israel lhayis, ifwenho otamsek häp tä isej Jesucristo tä häpe nilhokej wichi Lewuk.

³⁷ Amel lehanej t'at m'ak tä ichehte tä y'ajpe nilhokej honhat tä Judea, häp m'ak tä iwo tesa tä ihi Galilea tä tajyäme tä Juan yen lhämeta tä ne'tek wichi lhaibautisaynhen.

³⁸ Oyäme Jesús tä Nazaret lhele, lham tä Dios yäm tapoyejej Espíritu tä T'amajchet lhäy'e lakhajyhayaj, wet äp ilunchehte honhat tä iwoye m'ayhay tä isen lhäy'e tä ifwayhtejen wichi ahättaj lakhajyhayaj. Tsi Dios iyej t'at, häp tä tamenej tä yenlhi m'ayhaytso,

³⁹ wet olhamel ow'enej tä ihi Jerusalén lhäy'e honhat tä Judea. Tä paj õ'län, õ'fwuhthilhi cruz,

⁴⁰ mat tä tres fwalas Dios inuhatphä tä tälho n'op'itseyhay wet hin'älit.

⁴¹ Mat tek nilhokej wichi tä hiw'en, ts'ilak t'at olhamel tä Dios pajche itshupyenej n'oyehen yämlek ohäpehen iyhäj tä yen lhämeta. Wet olhamel otchufwiyej tä ot'ekhen lhäy'e tä oyä tä lham inuphä tä tälho n'op'itseyhay.

⁴² Wet lham ne'tek olhamel oyen silätyaja tä lham t'at tä Dios yen Lakalelhthayajwoyayej wichi tä iläyhen lhäy'e iyhäj tä y'inhen.

⁴³ Nilhokej profetas yen p'ante lhämeta wet yok, Elh che häpe che t'ekhaye, isej wet tatäy letes.”

Wichi tä kahäpeya Judío lhayis ikatej Espíritu tä Dios T'amajchet

⁴⁴ Tä kamaj yämlhi t'at Pedro, wet Espíritu tä Dios T'amajchet nichätpe nilhokej lhamel tä iläte Dios lhämtes.

⁴⁵ Wet Dios leles tä Judío lhayis tä nekche Pedro, lhamel wuj tä t'iseltejen tä häte õ'tsäype Espíritu tä Dios T'amajchet häp wichi tä kahäpeya Judío lhayis,

⁴⁶ tsi iläte lhamel tä iwo lhämtesa tä w'enhache lhamej tä iwunit Dios.

⁴⁷ Tä Pedro iläte, wet yok: –Ow'en tä t'uhawetej t'at che õ'bautisaynhen lhamelna, tä ikatej Espíritu tä Dios T'amajchet mälhyej iwoye n'amel.

⁴⁸ Wet ne'tek õ'bautisaynejen Jesucristo lhey. Tä õ'leyej, inityenej Pedro yämlek iyej ayej lhamel fwalas iyhäj.