Amós 8 - Biblia Wichi

Lhawuk ipäyne Amós lew'enek elh tä häpe lhay tä y'ohen tä ihi lehi tuskal tä õyenlhi

¹ Lhawuk Dios ipäyen n'oye täja: Ow'en lhay tä y'ohen tä ihi lehi tuskal tä õyenlhi.

² Wet tay'ätshan n'oye wet yok: –¿Atsi m'ak tä lew'en, Amós? Onchulho wet oyok: –Ow'en lhay tä y'ohen tä ihi lehi tuskal tä õyenlhi. Wet äp tahuy n'oyej wet yok: –Israel lhayis y'o t'at, wak'alh yämthilek lewit'äyhyaj nichäte. Tek otäyhthiyeja letes, noj tä oteläytej lhamel.

³ Chik nichäte ifwalatso, lhamel tä t'ichoywethä tä ihi niyat lew'et tafwichelahchä. Wujla'pe wichi chik y'inhen, wet õ'thatla kanhi lep'itseyhay, wet oyenhit'a tichunhayaja. Olham tä ohäpe Awuk Dios olhämet täjtso.

N'okalelhthayaj tott'aye Israel

⁴ Ch'ahuye täja, amel tä lhen w'et m'ayhaya wichi tä niw'ena m'ayek wet lewit'äyen wichi tä p'elitses tä ihi honhat.

⁵ Wet lhoyaykwe, “Is chik tajyäme n'okäjyaj tä iwel'a nech'ayek, häpkhilek y'awom yachuyaj lhay wet y'atihi laha tä wuj.” Wet äp lhoyaykwe, “Is chik tajyäme ifwala tä n'ot'elakw'et, häpkhilek y'awom yachuyaj lhay wet y'atihi laha tä wuj, wet äp y'atäyhthen lhip, wet pesas tä nichoyhtahen.

⁶ Wet n'achäjeja chinaj t'äj wichi tä p'elitses, wet n'athatahlä nisäj elh tä laj lenisäja, wet äp y'awomhila yachuyaj lhay tä niwujak is.”

⁷ Lhawuk hit'unhatche lhamej lhämet, häp lham tä Israel lhayis yen lewujyaja, wet yok: –Tek op'ethathilahlä m'ak tä ni'isatso tä lhamel iwoye.

⁸ Honhat w'ahuhiyejlhila tähestso, wet nilhok wichi tä ihi tafwichelahchä. Lewit'äyhyaj tä ihihila honhat tehlat iwoye tewok tä t'ulhpe honhat, wet äp tehlat iwoye tä äp y'im tewok.

⁹ Lhawuk Dios yokwe: “Chik nichäte ifwalatso, wet äp ifwala nichätho lechowej, one'tehlak lhaiskat wet honatsi ihla'pe honhat.

¹⁰ Wet akäjyajay nech'e häpkhila afwyhayajay tä let'äyen iyhäj tä y'inhen, wet let'ichoyhiyejawethä afwyhayajay, wet ow'uyyenla amhihen haw'uy tä tesa w'uy, wet lhisthichela haw'ole tä atetnek tä wuj tä alhakli ihi. Letafwichelahchä, tehlat iwoyek let'äyen äs tä tefwaj'atni tä y'il, wet häpkhila t'at ifwala tä n'ofwitajayaj.”

¹¹ Lhawuk Dios yokwe: “Lhek yahinya, nek t'at ifwalas tä ochenhiyela nehläs häp honhat. Mat häpkhit'ala pan wok inät chik wichi nichuyuhlä, mat häpkhila olhämtes chik wichi nech'e fwetajla iwatläk tach'ahuye.

¹² Lhamel ilunhichela honhat chik fwetajla t'ukwe olhämtes. Ihohiyela tä ifwala tälhche lhäy'e tä ifwala y'uy, wet ihohiyela lhip tä tafwojhiye lhäy'e tä tapinhiye, mat tek nilhokhiyela.

¹³ Wet lhutshay tä isis lhäy'e mamses tä takhajayhen, lhamel y'inhihena tä ichimhen häp ifwalatso.

¹⁴ Häp lhamel tä t'ekhaye dios lhayis tä n'otkwey lhenhay tä ihi Samaria, wet hit'untejche lhämet, oyok, lhamel nofwila wet lepes. Häp lhamel tä t'ekhaye dios tä lew'et Dan lhäy'e dios tä lew'et Beerseba, lhamel lewit'äyhyaj ihihila wet lepes.”