Amós 6 - Biblia Wichi

Nofwila Israel

¹ ¡Awit'äyhyaj i'amejen, amel tä atamsekis ihi tä lhehi Sión! ¡Awit'äyhyaj i'amejen, amel tä lhehi Samaria, häp amel tä lhok, “Lhawit'äyhyaj ihichet'ala” - häp amel tä ahäpehen hin'ol tä lhamenya tä aniyatej honhatna tä lhamya wet Israel lhayis ihopej amehen wet tach'ahupej amehen!

² Amel letahuyej wichi wet lhok: “Mäh hoyaye Calne, wet chik letälhe hoyaye honhat tä lhamya tä häpe Hamat, wet äp tiyäjela Gat tä häpe Filisteo lhayis kahonhat. ¡Lhek tetshan lhamel, lew'enla tä inuhit'a'pe lhaniyatyajay!”

³ Eh, mat olham oyok: Amel lefwetajay atofwe häp ifwala tä ni'isa, mat amel t'at tä letonay alhoho m'ak tä ni'isa yämthilek ayen kwenkaya.

⁴ Lemäkwe'pe amäwetes tä isis, wet lheche'pe ahowetes tä lewo akäjyaja tä letufwen tson'atas lhäy'e w'asetas leles tä yätajen.

⁵ Lhafwutchehen afwolis wet leten David tä lhenwethä músicas.

⁶ Wet äthis wus tä leyäyej hat'es, wet lelän amejen m'ak tä lenij akäjche, mat ailänhihent'a aka honhat tä lewit'äyhyaj ihi.

⁷ Tä mälhyejtso, ichunla amel chik õ'hän amehen honhat tä kahaw'eta, wet nemla lheche'pe ahowetes tä isis wet nemla lewo akäjyaja.

⁸ Lhawuk hit'unhatche lhamej lhämet, häp lham Dios tä lajit letumfwaya, wet yok: –On'äyiho m'ak tä Jacob kawichi Israel lhayis lhaichäjejwethä. Ohuminhit'a lewukwey tä isis, ow'enhihola letayhfwas häp laka honhates lhäy'e nilhok m'ak tä ihi.

⁹ Wet chik mälhyejtso, chik iche diez hin'ol tä imälhehi tä ihi lew'et, nilhokej y'inhihena.

¹⁰ Wet wujlak tanhowatnhanchufwi hup, wet chik elh itonphä lepuhfwa p'itsek yämthilek hip'o, tahuyhiyela elh tä ichufwi hup wet yohlak, “¿Hä iche elh tä i'amej?” Wet elh nichulhihola wet yohlak, “¡Kha!” Wet äp y'isiyeja tä yok, “¡Ch'eet! Tsi isit'ak y'awo lheya Lhawuk.”

¹¹ Tsi Lhawuk t'at tä ichenhiyela lewit'äyhyaj häp n'owukwey tä wus lhäy'e tä niwusa, wet nofwila nilhokej.

¹² ¿Hä yel'atas ihanej chik tatsufwelche chenhas? ¡Kha, ihanhiyejt'a! ¿Hä hin'o ihanej iwoyneje chik isajeji arado häp inät, mälhyet iwoye honhat? ¡Kha, ihanhiyejt'a iwoyneje! ¡Mat amel lhenay n'ot'ileka häp m'ak tä is, wet nilhokej m'ak tä tälho tapay t'at!

¹³ Laha ihihit'a akäjyajay tä lewoyej amehen tä lhoyaykwe: “Matche tä y'atkhajayhen, häp tä tamenej tä y'akalhi.”

¹⁴ Tsi lhek yahinya, Israel lhayis, Lhawuk Dios tä lajit letumfwaya yokwe: “Ot'änhiyeja amehen wichi yämthilek tatay ahilähen, wet matche tä ailhaklitlawethä, pajla'tha nichäte aiyhäj tä itafwojhiye lhäy'e aiyhäj tä tumej tapinhiye.”