Amós 5 - Biblia Wichi

P'elitses Israel lhayis

¹ Ch'ahuyaye olhämtes tä owoyej amehen, Israel lhayis, tä oyok, Ap'elitses t'at.

² Israel tatäy wet noj lesilatyaj, wet tek neyhiphäla. Tä nichätpe laka honhat, wet nehit katsik ineyhthiphäla.

³ Yokwe Lhawuk Dios tä tahuyej Israel lhayis: “Chik niyat ichen mil laka nifwotaj yämthilek iwo laka'tshayaja, tajlhamhiyelat cien chik tapil. Wet chik ichen cien, tajlhamhiyelat diez chik tapil.”

Lhawuk ne'tek Israel lhayis iwo lehusey iyhäja

⁴ Yokwe Lhawuk tä tahuyej Israel lhayis: “Hoyay n'oye häpkhilek kat'ilahen.

⁵ Yej hoyaye Betel, wet yej tiyäjo Gilgal, wet yej nukwe Beerseba. Tsi wichi tä ihi Gilgal wohit'ala m'ak chik isej, õ'hänhiyela honhat tä kalew'eta, wet Betel häpkhilek tatäy.”

⁶ Hoyaye Lhawuk häpkhilek kat'ilahen. Mat chik kawoyaye täjtso, nichätla atapehen tet iwoye itätaj, wet iwunhihola Betel, wet nehit katsik y'omatla.

⁷ ¡Awit'äy ihi, amel tä lhenay häpeya m'ak tä ni'isa häp m'ak tä is alhoho wet lethat katsi!

^8-9 Ukwe häp lham tä lhenek pätselhay lhäy'e katetsel iyhäj, wet inuhatphä ifwala wet noj t'at honatsi wet n'älpe honhat, wet äp ne'tek y'uy ifwala wet nech'e honatsi t'at. Häp lham tä t'äne inät tä ihi lewomekitaj wet itsäype honhat, wet ichätyenpe lewit'äyhyaj häp hupuy tä takhajayhen wet tatäy t'at. Häpe Lhawuk, häp täjtso lhey.

¹⁰ Amel len'äyiho hin'o tä iwoye m'ak tä is alhoho, wet let'ulhan elh tä yen lhämeta m'ak tä matche.

¹¹ Lhenay w'et m'ayhaya wichi tä p'elitses, wet let'alhe'pe impuesto häp lechumet lhay. Tä mälhyejtso, tej tä lhenwethä awukwey tä isis tä tuntey, mat tek lheyayhlachufwi. Wet tej tä letihchä uvas, mat tek leyähiyeja hat'es chik tälho.

¹² Olham wuj tä ontäfwelejen m'ak tä wuj tä ni'isachehen tä lewoyaye, lhäy'e hach'isukyajay tä laj lepesa. Lelhaklit wichi tä isen, wet tek letach'otaye wichi tä p'elitses chik ihi n'okalelhthayajw'et, wet letachumlä m'ak tä õ'känitlhi amej.

¹³ Häp tä tamenej tä hin'ol tä lehusek ihi tahuyhit'a, tsi häpe t'at lewhäy tä ni'isa.

¹⁴ Mälhetwek tä lewoyaye m'ak tä is wet yej woyaye m'ak tä ni'isa, häpkhilek kat'ilahen. Wet chik mälhyejtso, mathichela amel ämet tä lhäme tä Lhawuk Dios tä lajit letumfwaya i'amejen.

¹⁵ ¡N'äyiho m'ak tä ni'isa wet humin m'ak tä is! Achajo tä lekhajyen m'ak tä is alhoho tä ihi n'okalelhthayajw'etes. Wet chik lewoyaye täjtso, elat Lhawuk Dios tä lajit letumfwaya itihiyeja lep'altsenyaj häp Israel lhayis tä imälhehi.

¹⁶ Tä amel lewoyepej m'ak tä ni'isa, wet häp tä Lhawuk Dios tä lajit letumfwaya yokwe: “Wichi tafwichelahchä atapehen chik ihiche lhipey tä ischephä, wet t'änlawethä chik ihiche hupuy kawayhil. Wet õt'änhiyela iyhäj tä ihiche lakäsw'etes, õne'tehlak ileyej lechumtes wet lhaip'ajtej atsinhay tä tafwlhi atapehen chik awit'äy ihi.

¹⁷ Wet ihichela n'olhafwyhayaj tä ihiche n'olafwey tä uvasw'etes chik olham onukwe lechowej amel wet oti amejen otasnhayaj.” Häp täjtso Lhawuk lhämet.

Lhawuk laka ifwala

¹⁸ ¡Awit'äyhyaj i'amejen, amel tä lekelayej Lhawuk laka ifwala chik näm! ¿Hä lehanej m'ak tä ihla amejen chik näm? Ihichela honataj wet nemla isi.

¹⁹ Hätehlat iwoye hin'ok fwetaj inu alhoho chik nowaye t'owalhaj tä fwitsaj, mat nichutej sulaj. Wok fwetaj itsoke lewukwe lhip, mat amlhäj tä ihi yokwaj.

²⁰ Oyok matche, Lhawuk laka ifwala häpkhila honataj, wet ihichet'ala m'ak chik isihla.

²¹ Lhawuk yok: “Olham on'äyiho wet owohit'a lahaya amel akäjyaj tä lewoyepej tä lhen han'okhayaja, wet tek okäjejlhi tä alehutpejwek.

²² Tek owatlä itshätäy tä lewunhomche tä lefwetajay lewunitn'o, lhäy'e akäs lhay, wet tek otchumlä w'asetaj leles tä yätajen tä lefwetajay lekänitlhi n'oyej yämthilek ale'isyen n'oye.

²³ ¡Tonte n'ohlä apakas tä let'ichoywethä tä lefwetajay lewunitn'o! ¡Tek owatläk oläte aka música!

²⁴ Mat is chik n'o'isyaj hätet iwoye inät tä iläfwelche, wet n'ohumnhayaj is chik hätet iwoye ts'ifwik, ihanhiyejt'a chik y'im.

²⁵ “Israel lhayis, tä achätilis ihihte ts'anis cuarenta nekchämis, ¿hä ilänhen itshätäy tä yen n'okhayaja n'oyej? ¿Hä ichäj n'oye otw'ayhtes? ¡Oyok, kha! Tsi tek ot'alhejehte lhamel.

²⁶ Mat athana amel lhenwethä dios lhayis tä akwey lhenhay tä lheyis Sikut tä häpe elh tä lhen aka niyata, lhäy'e elh tä lhey Keván tä häpe kates. Tä mälhyejtso, lhenla alhuka enhaytso

²⁷ chik othat amehen honhat tä kahaw'eta tä iw'echehi Damasco.” Iwoye lhämettso häp Lhawuk Dios tä lajit letumfwaya. Häp täjtso lhey.