Amós 3 - Biblia Wichi

¹ Israel lhayis, ch'ahuyaye Lhawuk lhämet tä ifwel amhohen, häp amel tä lham itonphä p'ante achätilis tä ihi honhat tä Egipto. Yokwe:

² “Ts'ilak amel tä ottshupihte amehen tä lhewej wichi tä ihonhatena. Häp tä tamenej tä omenyenla amejen hach'isukyajay tä lewoyaye, wet otihla amejen otasnhayaj.”

Profeta lechumet

³ Chik iche täkwfwas iyhäj tä lhaip'ajtitwek tä yikhen, häp tä y'ajejwek m'ak tä lhamel t'uhläk iwoye.

⁴ Wet chik y'ip hay'äj tä ihi tayhi, häp tä isakanej lelänek. Wet chik lhäs tä ihi chowej tanhätinlhi, häp tä ikatej lhäk.

⁵ Wet chik afwenche nichät honhate, häp tä iche hin'o tä tiyäj. Wet chik nämhi n'okalnaj tä ihi niyäk, häp tä iche m'ak tä t'äsi.

⁶ Wet chik pitsaje tson'ataj ch'u tä õyafwutche, wichi nowayhen. Wet chik iche m'ak chik ni'isak nichätpe wichi, häp tä Lhawuk t'at tä ichen.

⁷ Wet Lhawuk Dios ihichet'a m'ak chik iwoye chik nichunkata lakawos profetas tä ifwenhomche.

⁸ Chik hay'äj y'ip, wichi nowayhen. Wet häp tä mälhyej'attso, chik Lhawuk Dios iwo lhämeta, lakawos yen silätyaja lhämtes.

Lhawuk iwasthihila Samaria

⁹ Enay silätyaja täja, fwenhomche niyatey tä ihi Asdod lhäy'e Egipto, oyaykwe: “Lhuyay hoyaype chenhas tä ilunej Samaria, wet yahne wichi tä ihi tä iwoyej lhamehen m'ak tä ni'isa wet tek lhaip'altsenhen.”

¹⁰ Lhawuk yok: “Ihanhiyejt'a yämlek iwoye m'ak tä is alhoho. M'ak tä t'amajej tä ichechufwi lewukwey häpe t'at m'ak tä isoyejwethä wichi, tsi matche tä fwitses lhamel.”

¹¹ Tä mälhyejtso, yokwe häp Lhawuk Dios: “Atayhfwas ilunhiyeja aka honhat wet iwasthihila hupuy tä hin'ol tä takhajayhen tä õy'uhyene honhat ihiche, wet tachumhiyela nilhokej m'ak tä ihiche aka niyatey lewukwey.”

¹² Wet Lhawuk äp yok: “Lhek tetshan t'owalhaj, chik tuj tson'ataj, noj t'at, tajlhamat takäläy wok lech'ote lhip tä lewo isoyej t'owalhaj. Mälhhiyejattso lewit'äyhyaj häp Israel lhayis tä lew'et Samaria, häp lhamel tä imäkwe'pe n'ow'etes tä isis tä tälhe Damasco. Tajlhamhiyelat iyhäjfwas chik tafwayhen.”

¹³ Lhawuk Dios tä lajit letumfwaya yokwe: “Ch'ahuyay n'oye, enay ämeta m'ak tä ni'isa tä Israel lhayis iwoye.

¹⁴ Ifwala chik otasnhila Israel lhayis, häp lech'isukyajay tä tamenej, owasthihichela altares tä ihi Betel, oyisthihena lech'ul

¹⁵ Wet otäyhthila n'owukwey tä wichi ichufwi häp lewhäy tä fwiy'et, lhäy'e lewukwey tä lhamel ichufwi häp lewhäy tä nahayofw. Owasthihichela lewukwey tä isis, wet lhamel tä hiw'en m'ayek lew'etes nemla iche. Olham tä ohäpe Awuk Dios olhämet täjtso.”