Amós 2 - Biblia Wichi

Lhawuk itiyej letes Moab lheley

¹ Wet Lhawuk lhämet äp yok: “Häp wichi tä ihi honhat tä Moab wuj tä ni'isachehen häp m'ak tä iwoye, wet häp tä owohit'a elha otichunhayaj tä otasnhila lhamel. Tsi lhamel hip'ohen Edom kaniyat lhiley yäk tajlhamat häp mok'otaj.

² Häp tä tamenej tä owunhihola häp lhamel lew'et Moab, wet itäj itäyhthila häp hupuy tä ihi Keriot tä hin'ol tä takhajayhen tä õy'uhyene honhat ihiche. T'änhihena sip'äl tä iwo laka'tshayaja, lhäy'e häp tson'ataj ch'ul lepakas, wet Moab lheley nofwiyeja.

³ Osohiyeja lhamel laka niyat wet olänla, op'ajthiyeja häp laka hin'ol tä lhamenya.”

Lhawuk itiyej letes laka wichi Judá lheley

⁴ Wet Lhawuk lhämet äp yok: “Häp wichi tä ihi Judá wuj tä ni'isachehen häp m'ak tä iwoye, wet häp tä owohit'a elha otichunhayaj tä otasnhila lhamel. Tsi lhamel iwohiyet'a olhämtes wet yen w'et m'ayeka ochufwenyajay. Lhamel lhaiwetahatejen dios lhayis tä kamatachehen, mälhyet iwoye täjp'ante lechätilis iwoye.

⁵ Häp tä tamenej tä owunhihola Judá, wet itäj itäyhthila häp hupuy tä ihi Jerusalén tä hin'ol tä takhajayhen tä õy'uhyene honhat ihiche.”

Lhawuk y'ajte laka wichi Israel tä itiyej letes

⁶ Wet Lhawuk lhämet äp yok: “Häp wichi tä ihi Israel wuj tä ni'isachehen häp m'ak tä iwoye, wet häp tä owohit'a elha otichunhayaj tä otasnhila lhamel. Tsi lhamel iwom häp wichi tä laj letesa, wet hin'ol tä p'elitses tä nitiskana'pe lenisähes, häp tä lhamel iwom, ichäjej chinaj t'äj.

⁷ Y'isej lhip lewit'äyhyaj tä itiyej wichi tä p'elitses, wet lep'altsenyaj itihiyejt'a wichi tä w'et m'ayhayhas t'at, wet hin'o lhäy'e lhäs lhamel imäyej atsinha. Häp täjtso m'ak tä iwoye tä yen n'oye elh tä w'et m'ayek t'at.

⁸ Wet äp imäkwe'pe häp wesas tä n'olhäyhay tä ichumlä, wet lhamel iyej t'at häp wichi tä iwunit dios tä takwey lhenhay, wet ichufwiyej tä t'ekhen. Wet lhamel ikanejen iyhäj tä t'alhe'pe m'ayhay yämlek hiw'en laha hat'es tä ichäj, wet lhamel iyäyej tä ihi laka dios lew'et.

⁹ “Tha mat olham, tä owohte n'äyija häp amel achätilis, otäyhat Amorreo lhayis, otech'aynej hal'ä tä oyisthen lhachal lhäy'e tä otijphä lefwettsil, tej tä lhamel häpehen wichi tä pites, hätet iwoye pänhichetek, wet äp takhajayhen, hätet iwoye hal'ä tä wujche.

¹⁰ Wet otonphä achätilis tä ihi honhat tä Egipto, wet cuarenta nekchämis tä onuhatchehen häp honhat tä ts'anis yämlek ow'enhomche Amorreo lhayis kahonhat.

¹¹ Wet amel lehanhiyejt'a lewoyneje chik lekachu, tsi pajche oyen oka profetasa häp iyhäj tä i'amejen, lhäy'e iyhäj tä oyen t'amajchetayej ochumet.” Häp täjtso Lhawuk lhämet.

¹² “Mat häp amel lenityenayej häp Nazareo lhayis yämlek iyäyej hat'es, wet len'äyejo profetas yämlek yen lhämetan'o.

¹³ Tä mälhyejtso, op'ajthilahchä häp amel, wet honhat tä lhehi waslahchä, mälhhiyejat iwoye honhat tä kaletaj t'äsche tä lhele lhäy'e lhip tä choyhat.

¹⁴ Tejlak lefwetaj lenukwe alhoho, mat tek lestakhiyeja. Häp elh tä takhajay nemla takhajay, wet khajnaj tek tafwayhla.

¹⁵ Hin'o isiyejt'ala häp lutsej hal'ä lhäy'e lothay, wet elh tä iläfwel tä inu alhoho lhäy'e elh tä i'pe yel'ataj tä ilethan, häte tan'isiyeja, ihanhiyejt'ala chik lhaifwayhthen.

¹⁶ Chik nichäte ifwalatso, häp sip'äl tä wuj tä takhajayhen iwomlawethä takwelheley tä laka'tshayajchal, häpkhilek nichoyhata wet iläfwel tä inu alhoho tä ilethan. Olham tä ohäpe Awuk Dios olhämet täjtso.”