2~Tim 4 - Biblia Wichi

“En ämeta Dios lhämet”

¹ Athana nem koyhyaj tä onityen amej tä ihi tä Dios itayche, lhäy'e Cristo Jesús tä nämla yämlek lhayen Niyata wet itiyej lakalelhthayaj wichi tä iläyhen lhäy'e iyhäj tä y'inhen.

² Oyok, en ämeta Dios lhämet. Chik iche fwala tä haw'et iyeji yämlek lewo ämeta, wok tej chik newache p'iya, mat yej pantej ämet. Äm kalelhäj ämet yämlek wichi isyen alhoho m'ak tä iwoye, fwone lhamel wet nityenej, wet yej lhak'alpe lhamel tä lechufwenhen.

³ Tsi nämla lewhäy tä wichi yämhiyela n'ochufwenyaj tä is tä tälhe Dios wet yohlak, “Äytajche n'olhämetna.” Wet tä afwtsesejwethä n'ochufwenyajay iyhäj tä iläte, ihutla lhamejen lewos tä lechufwenyaj yiwite m'ak tä lhamel ihuminche.

⁴ Nemla tach'ahuye Dios lhämet tä matche, mat lhaiwetahathihola p'alhalis.

⁵ Mat am, yej alhen alhaknhatsajayej m'ak at chik häpe, teläytej alhaklis, enpej ämeta Dios Silätyaj tä Is, wet woye t'at nilhokej achumtes tä ahäpe Dios lakawo.

⁶ Tsi olham tott'aye lewhäy chik oleyej honhat, wak'alh t'at tä õ'länlan'o, ohätehlat iwoye hat'es tä õyen Dios t'awayhata tä õ'tsäype altar.

⁷ Pajche olhaikhajyen tä owo oka'tshayaja, ofwit lepes on'äyij tä onukwe, ot'amajej lhat'ekhahyaj wet owoye.

⁸ Athana õt'amajej n'oho okaha, tä Lhawuk tä häpe N'okalelhthayajwo tä is alhoho, hiw'enla n'oho'pe o'isyaj chik nichäte fwala tä lepes. Wet ts'ilakhit'ala olham chik hiw'enla n'oho, mat häte nilhokhiyeja wichi tä ihumin wet inihihlä fwala tä lham tapinla.

Pablo lhämet tä ilepese

⁹ Yej nahayej m'ak chik häpe, mat ho n'oye'thahya.

¹⁰ Tsi Demas lehumnhayaj itiyej m'ayhay tä ihonhatena, wet iwomn'o wet ihoye Tesalónica. Crescente ihoye Galacia, wet Tito ihoye Dalmacia.

¹¹ Tajlhama Lucas tä in'oyej. Ukwe Marcos wet chäj alhoho, tsi oisiyeja chik hich'ote ochumet.

¹² Häp Tíquico pajche ochene Éfeso.

¹³ Chik lenek, chäj n'oye ow'uy tä on'äyejnaj Carpo tä ihi Troas. Häte oka libros, wet lhäy'e lhip tä owatlä n'olesaynekhis tä olewuk tä tsänt'äj tä õ'käfwelche.

¹⁴ Häp chinajwo Alejandro lhäy'e lhip tä ni'isa m'ak tä iwoyej n'oye. Mat Lhawuk iwohla lahayayej.

¹⁵ Häte amaj amejlä, tsi wuj tä lhaikhajyen tä tatayhlä lhasilätyaj.

¹⁶ Häp fwala tä iwo tesa tä oihi tä niyatey itayche, ihichet'a elh chik häpe chik hich'ot n'oye tä oyämlhi letape, mat nilhokej iwomn'o. Is chik Dios tek yen tesayej lhamel täjtso.

¹⁷ Mat Lhawuk häp tä inaj owhäye, wet hiw'en n'oho okhajyhayaj yämlek otkhajay tä oyen lhämeta imälhewek lham lhämet, häpkhilek nilhokej lhamel tä kahäpeya Judío lhayis iläte t'at. Wet mälhyejtso tä Lhawuk ifwayhatnaj n'oyej ot'ilek lak'aj,

¹⁸ wet ifwayhthila n'oyej nilhokej m'ayhay tä ni'isachehen, wet t'amajila n'oyej pajla'tha onchäte Leniyatyaj tä ipuleye. ¡Is chik lewujyaj iyej yämlek tiyäj'attsiy! Amén.

Pablo len'okhayaj lhäy'e lakäpfwayaj tä lepes

¹⁹ Ochene on'okhayaj Prisca lhäy'e Aquila, lhäy'e Onesíforo lew'et lheley.

²⁰ Erasto imälhehi Corinto, wet Trófimo on'äyhi naji Mileto, t'inhayaj tä ilän tä tamenej.

²¹ Yej nahayej m'ak chik häpe, mat ho n'oye tä kamaj kafwiy'eta. Eubulo, Pudente, Lino, Claudia, lhäy'e nilhokej lhapuhfwas iyhäj, ichen ame len'okhayajay.

²² Is chik Lhawuk iyej ahusek. Wet is chik Dios lep'altsenyaj iyej nilhokej amel.