2~Tim 3 - Biblia Wichi

Häp ifwalas che ilepese wichi mälhhiyeja tä Pablo yämena

¹ Häte iwohiyet'ak kahanayej lewhäy che lepese, nämla ifwalas tä lhäy'e lhip tä atha.

² Tsi ihichela wichi tä lhamel t'at tä lhaihumnhen, wet nilhak'alej chinaj t'äj tä ihut lhamejen. Lhamel fwetajla häpehen iyhäj tä len'ohyajay ihi wet lhaichäjlawethä, wet iläklawethä iyhäj, wet tach'ahuhiyet'ala lhokwey, wet tek iwohla laka graciasa'pe m'ak at che häpe, wet yenla w'et m'ayeka Dios lhämet.

³ Lehumnhayaj ihihit'ala wet hap'altsentsesit'ala, häpkhihena sitäwos, tumhit'alahlä lenech'ethayajay tä ni'isachehen, wet fwitsesla, wet tatayhlahlä m'ak tä is.

⁴ Häpkhihena kantses, tektshanlawethä, lhaiwujyenhihena, iwohla yiya m'ak tä lhamel t'at tä t'akänyajay wet tek ihumnhila Dios.

⁵ Lhain'älthila tä fwetaj häpehen iyhäj tä iwo t'ekhahyaja, mat häp lechumtes tä iwoye hin'älthila tä wetayej t'ekhahyaj tä matche. Häp wichi tä mälhyejentso oyok, Yej alet'aje.

⁶ Tsi iche iyhäj lhamel tä ihumin tä y'uychufwi elh lewukwe wet ikalhi tä ikanej atsinhay tä naj lehuseya tä wuj tä yenpej tichunhayaja lesukyajay tä pajche iwoye wet äp lenech'ethayajay itonpejwethä lhamel.

⁷ Atsinhayna fwetaj lhaichufwenejen m'ak tä matche, mat ihanhiyejt'a iwoyneje yämthilek nitäfwelej.

⁸ Wet häp hin'ol tä oyämene, lehusey nem is alhoho wet kalelhäjit'a t'ekhahyaj. Lhamel tatayhlä m'ak tä matche, hätet iwoye hin'ol p'ante lheyes Janes lhäy'e Jambres tä tatayp'antehlä Moisés.

⁹ Mat pitajit'ala len'äyij, tsi nilhokhiyeja wichi che nitäfwelej tä isukis t'at lhamel, hätet iwoye hin'ol tä Moisés letayhfwastso.

“Tujlhache nilhokej m'ak tä pajche alechufwenej”

^10-11 Mat am lenukwe t'at olham ochufwenyaj, lhäy'e m'ak tä okey, lhäy'e m'ak tä ot'upejläk owoye, lhäy'e ot'ekhahyaj, lhäy'e tä owo otamseka, lhäy'e ohumnhayaj, lhäy'e okhajyhayaj wet otumlä wichi laka'tshayajay lhäy'e oteläythayajay tä in'oyej. Lehanej nilhokej owit'äyhyajay tä oihihte Antioquía, lhäy'e Iconio, lhäy'e Listra. Äyteschehen laka'tshayajay tä wichi iti n'oyej, mat Lhawuk ifwayhat n'oyej nilhokej.

¹² Matche, nilhokej elh che häpe tä t'uhläk ihän Cristo Jesús len'äyij tä is alhoho, wichi itihiyeja laka'tshayaj.

¹³ Mat häp hin'ol tä ni'isahen lhäy'e iyhäj tä kantses, yike t'at m'ak tä hich'atej tä ni'isa. Ikanhiyejena iyhäj wet ikanla lhamejen.

¹⁴ Mat am, tujlhache nilhokej m'ak tä pajche alechufwenej, häp m'ak tä letäfwelej tä matche wet let'ekhaye. Wet lehanej ihi iyhäj tä pajche ichufwen amej.

¹⁵ Tichunche, tälhe tä ahäpe han'äfwaj letäfwelej t'at N'olesaynhay tä N'ot'amajchetes, tä ihanhat amej yämthilek let'ekhaye Cristo Jesús wet lechätho afwayhyaj.

¹⁶ Nilhokej N'olesaynhay tä ihi Lehi tälho t'at Dios leyalh, wet t'uhawetej che õyen chufwenyaja, wet õyen fwonyaja, wet õ'isyenej alhoho elh tä weta, wet õ'hantej wichi häp m'ak tä is che iwoye,

¹⁷ häpkhilek niwohit m'ak che tatäyej elh tä Dios kawo, mat wak'alh t'at yämthilek iwoye nilhokej m'ak tä is.