2~Cor 1 - Biblia Wichi

Pablo ichene len'okhayaj häp Dios leles

¹ Amtena ipuhfwas tä Dios aleles tä haw'et hupuy tä Corinto, lhäy'e nilhokej iyhäj amel tä Dios laka wichi tä lheyayhi honhat tä Acaya. Olham Pablo ohäpe Cristo Jesús laka apóstol, wok oyok, lakachenhay tä lhamenya elh, tsi häpe t'at täjtso Dios lenech'ethayaj. Wet olham lhäy'e n'aelh Timoteo ochen amehen olhämetna.

² Is chik Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.

Pablo leteläythayaj

³ Owunit Lhawuk Jesucristo laka Dios wet äp Lajcha, tsi lham häpe t'at Lhajcha tä hip'altsen n'oyehen, wet häpe Dios tä ikhajyenpej ohusey tä olhamel olhakli ihi.

⁴ Lham ikhajyenpej olhamel tä oteläythayaj ipej n'oyejen, yämthilek häte olhamel okalhi chik okhajyenhen lehusey häp iyhäj tä leteläythayaj iyejen, wet och'otyeneje okhajyhayaj tä lham hiw'en n'ohohen.

⁵ Tsi tä wuj tä olhamel otn'isej Cristo tä leteläythayaj iyej, häte wuj tä Dios ikhajyen ohusey häp tä oisej Cristo.

⁶ Oteläythayaj ipej n'oyejen yämthilek amel ahusey isej wet afwayhyaj i'amejen. Wet Dios ikhajyenpej olhamel ohusey yämthilek häte amel akhajyhayaj ihi, wet nech'e lekalhi t'at ateläythayaj tä hätet iwoye m'ak tä olhamel oteläytej.

⁷ Häp tä tamenej tä kalelhäj tä olhamel ot'ekhayej amehen, tsi tä letan'is n'oyejen tä oteläythayaj in'oyejen, ohanej tä häte Dios hiw'en amhohen ahusey lakhajyhayaj, mälhyej tä hiw'en n'ohohen.

⁸ Ipuhfwas, ot'uhläk ohanhat amejen olhamel oteläythayaj tä in'oyejen tä oihi honhat tä Asia. Wuj tä choyhat, tä lepese n'äl tä nemhit otumlä, wet ochowej ilehat at lhamejen, tek oyenek n'am t'inhihena.

⁹ Olhamel oyok, “Oyenek matche, lhakapes täja.” Wet tä n'am t'ekha lhamehen, oisej otichunhayajtso tä ot'ekhaye Dios, häp lham tä inuhatchephä n'op'itseyhay.

^10-11 Wet matche t'at tä Dios ifwayhat n'oyejen ot'ilek, wet äp ifwayhthila n'oyejen. Chik amel lech'otyenej n'oyehen alhyajay tä let'alhe Dios, olhamel ot'ekhaye t'at tä ilehiyejt'ala tä ifwayhatpej n'oyejen owit'äyhyaj. Wet chik wujpe wichi tä y'alhyen n'oyehen Dios, lham nichulhihola t'alhyajay wet hiw'enla n'ohohen lakäpfwayajay tä isen. Wet tälhe täjtso, wujla'pe lhamel chik iwo graciasayej Dios häp m'ak tä olhamel oisejna.

M'ak tä tamenej tä Pablo ileche p'ante tä fwetaj ihoye Corinto

¹² Iche m'ak tä iwo okäjyaja olhamel. Oyok, tä oiyej elh at chik häpe, ihichet'a m'ak tä oyen choweja lhamejen, wet newache m'ak chik ni'isa chik tumchä tä ihiche ohusey. Wet tä oinaj amejen, lhäy'e lhip tä mälhyej'attso. Mat täjtso tälhiyet'a olhamel ohanyaj, mat Dios tä lep'altsenyaj ihi häp tä tach'ot n'oyehen, yämthilek o'isyajtso in'oyejen.

^13-14 Tä ochenpej amehen oka carta, okalelhät olhämet yämthilek amel lehanej. Wet matche, lehanej t'at, mat wuj tä ohumin chik imälhewek tä lehanej, yämthilek chik tapil Lhawuk Jesús, amel a'akäslawethä n'oyejen, mälhyej tä olhamel okäslawethä amejen.

¹⁵ Tä ot'ekhayej amehen täjtso, häp tä tamenej tä ot'unajläk ochunkat amel tä oho amehen. Wet chik mälhyejtso, aisiyeja tä osikay amehen dos veces.

¹⁶ Oyennaj tichunhayaja chik ochunkat tä osikay amehen chik onukwe on'äyij tä itaye Macedonia. Wet chik otpil chik otälhe Macedonia, oyachajo tä oho amehen, yämthilek letach'otay n'oye chik otujlhache on'äyij tä ohoye Judea.

¹⁷ Mat tä äp owonaj elha otichunhayaj, ¿hä lhenay n'oye hin'o tä nikalelhäja m'ak tä iwoye? ¿Wok lew'enay tä owoye t'at m'ak tä olham onech'ethayaj tä oyok, “Owohiyela täjtso”, mat äp yofwajkwet oleche m'ak tä ot'uhläk owoye?

¹⁸ Lhek yahinya, Dios lham t'at tä ihanej tä matche olhämet tä ofwel amhohen. Häpkhit'ak oyok, “Owohiyela täjtso”, wet nech'e äp oyok, “Oleche tä ot'uhläk owoye.”

¹⁹ Tsi Cristo Jesús tä häpe Dios Lhäs, häp lham tä olhamel, Silvano lhäy'e Timoteo lhäy'e olham, oyente lhämeta amejen. Häpkhit'a elh tä nikalelhäja, mat häpe Dios laka Hin'o tä kalelhäj wet äp matche.

²⁰ Tsi lham häpe t'at tä Dios lhämtes tä pajche ifwel p'ante, lhaimattejchehen. Häp tä tamenej, tä y'awunit Dios wet y'opejkwe, “Häp tä isej Cristo Jesús, Amén.”

²¹ Dios tatshupi n'amehen wet hit'untej n'amhiche lham Cristo,

²² wet iti n'amejen letetnek tä kalelhäj tä n'amel Lhawuk t'at häp lham. Wet itihiche lhahusey laka Espíritu tä T'amajchet, tä häpe lhip tä ichunkat n'amehen tä tälhe m'ak tä hiw'enla n'amhohen chik nichäte lewhäy.

²³ Dios nitäfwelej ohusek wet ihanej m'ak tä tamenej tä n'am hut atapehen tä otpil. Häp tä n'am t'uhläk yachajo tä olän amel atichunhayaj.

²⁴ Häpkhit'ak olhamel ot'uhläk olhayen niyateyayej amel achayaj, tsi pajche atkhajayhen t'at tä lewo achayaja. Mat ot'uhläk otch'ot amehen yämthilek akäjyaj i'amejen.