MATHI 5 - OTSAO BAIBEL (BSI)

Haxhua ma Hwon-Anokya

¹ Khünaknu othom ngünlaxle Jisu haxhua tuita to dongle thung. Ija pongma wangshembu chix hato ngui.

² Hwom hama hwon-anole chixe ile akax:

Otsingtsing Mohiman

³ “Chasa ma zasa changpule awankyabu, hwom mohiman; Zangkangting a hwom kux changle!

⁴ “Mongmale sopkyabu, mohiman; Zange hwom joxüi!

⁵ “Puinaikyabu mohiman; Zang kaxtsaobu hwome ataküi!

⁶ “Zang mongtex mwot mokse tsukyabu mohiman; Zange hwom to chingchaüi!

⁷ “Mix to chingchakyabu mohiman; Zange hwom to chingchaüi!

⁸ “Kün mong tsaothakyabu mohiman; hwome Zang ngün ang kopüi!

⁹ “Tumüi mwot mokkyabu mohiman; hwom ang Zang susabu le nyaküi!

¹⁰ “Jowanpa mwottho ma sikngün apongkyabu mohiman; Zangkangting a hwom kux changpu!

¹¹ “Otue khünaknue ku khoma hünzom to ajaole sikngün faüi hex, ilaxle hünzom füi alünle kaxma pangnu akaxüi hex; izuma hünzom mohiman.

¹² Mongmüilax; chemthüikoxle zangkangting to hünzom ang hingho tüihule. Hünzom thotokya ajebu tochu hwome ile wüi zothuppu.

Hum üntoxle Zangngai

¹³ “Khünaknu zongto hünzom a hum tuita changle; ikoxle hum angkya tikya jangmax dao thüikoxle chem makhange ija atikle laxüi? Hum angkya otik pao füima ija chem mwot ma lax angchu münmüi; ija a homtho to awütüi ilaxle khünake cha füi nak angkya lanwüi.

¹⁴ “Chaxwannu hanpakma hünzom a zangngai tuita changle; haxhua ma zingle tüikya tingnu pyen ang müntho.

¹⁵ Owaechu wüntik tuita atsoplaxle khong füi akhuple münthom; ikoxle wüntik a thomnui ma danüi; ikoxtix ijae homkha zang angaiüi.

¹⁶ Ija lailaile nang zangngaie khünaknu to nyan ang laxkox; ikoxtix hünzom mwot müikya ngün ang koplaxle hwome zangkangting tokya Apa mün achuaküi.

Wanlom bama Anokya

¹⁷ “Ku a Mosa Wanlom hia ajebu kax füi afanle mok ang nguipule taxthüt; ku a ibu füi afanle mok ang chichangle ibu kotok to angai angkya hanpakma nguipu.

¹⁸ Idaile kue hünzom ang otsingtsingma akaxpu; ding hia hax mamax-maxba tamchu ibu pangnu angaile machang tanto Wanlom funtachu muato kaile leüi münchang.

¹⁹ Idaile owawae Wanlom ibu kha angkya ahiküsa ngaxchu chilaxle jang awüt thüiningle tamchu khünak hama ile mok ang apuale chifa thüiningle, zangkangting to chix ang pangnu füi ahikyale nyaküi. Ikoxle opange Wanlom ibu toüi hex tamchu mix hama ile mok ang apuaüi hex; zangkangting to akhokya ang chix changüi.

²⁰ Idaile kue hünzom ang thüipu, hünzom mongong a farisibu hia Wanlom nwotmixbu füi süchongle chichang thüiningle hünzom otuechu zangkangting to ngui ang müntho angkya changle.

Mongtsik Bama Anokya

²¹ “Nange mix mik taxamüt; owae ile moküi hex, chixe kaxfün thangnak apongüi, le thüikya kax kaitokya khünakbu füi akaxkya hünzome atatdaoa.

²² Ikoxchu athax kue thüipu, owawae matüi manao füi mongtsikle jangchang, chix a kaxfün nui to apüi angkya changle. Matüi manao ang ‘nang chilaxli’, le thüikya khünak a nguawangbu chitong ma apüiüi; tamchu matüi manao ang ‘mwot to chihüikya angapa’, le nyakkya khünak a omalum wünkham to le angkya thangma ma tüile.

²³ Idaile tö-tsap ma Zang ang tö kox ang thüi pongma, matüi manao zongto chichangle thaikya mwot oli tuita mongto texle jangatak thüiba,

²⁴ tsap ding ma nang hingho toxlaxle momle paolax ilaxle ija khünak füi muamüi le koplax. Chat laxle tix nange Zang ang tö laxkox.

²⁵ “Wanlom ma thaikya bama owawae nang khwa to apüile jangchangba, lomba to tüi pongma wüi nang mütkopkya khünak füi muamüi ang azonglax; ile chichang thüiningle chixe zangwün khwa to apüilaxle nang kaxfün mix chak to danüi; kaxfün mixe nang süpahi chak to danüi; ifüima nang a kun ma hakle thom angkya laiüi.

²⁶ Kue hünzom ang otsingtsing ma akaxpu, nange tsangthom komle makox tanto ikha angkya nang chemle lai angchu chithoüi.

Chinunchakkai bama Anokya

²⁷ “Chinunchakkai taxtüi le thüikya hünzome atatdaoa;

²⁸ Ikoxle athax kue thüipu: owae sheko tuita to mikzalole huüi hex, ija ma wüi chixe she füi mong ma chinunchakkai daoa.

²⁹ Ija khoma nang tsaxchi mike nang thai ang jangtomba, ija lokle awütdao; nang tsangtsa komle haolum to awütkya füi, nang angkya mik tuita amütkya wüi nang zongma amüikya changüi.

³⁰ Nang tsaxchi chae nang thai ang jangtomba, ija dütle awütdao; nang tsangtsa komle haolum to awütkya füi, cha tuita maxkya wüi nang zongma amüikya changpu.

Fan-jankya bama Anokya

³¹ “Ijachu wüi akaxdaoa, owawae ma kakonu apao angkya jangchang thüiningle chixe fan-lai zale laxkox.

³² Ikoxle athax kue hünzom ang thüipu: Chinunchakkai khomale wüi chichangba, owawae mama-mama khoma ma kakonu fan ang jangtomba, chixe she a tuita chinunchakkai mixcha ang achangpu; ilaxle janle ngopongma owae she laxüi hex, chixe she füi chinunchakkaipu.

Tsao Saxkya bama Anokya

³³ “Kaitokya khünakbu füi akaxkya hünzome atatdaoa: ‘Nange othai to tsao taxsax, Jowanpa füi tsao saxdaokya nange mokkox.’

³⁴ Ikoxchu kue hünzom ang thüipu: Tsao ojao taxsax; zangkangting mün lünlechu taxsax, chemthüikoxle ikha a Zang ngwotnui changle.

³⁵ Chaxwannu münlün laxlechu taxsax, chemthüikoxle ikhachu chix chiting nui changle; Jerusalem mün machu taxsax, chemthüikoxle ikhachu chongwang pongwün tingnu changle.

³⁶ Nang khang münlün laxlechu taxsax, chemthüikoxle nange khopa tuita ngaxchu anak ang chichangba atsyet ang müntho.

³⁷ Idaile, jangchangba changpule chichangba münchangle thüikya tok to kaile hünzome tsaosax le akaxkya pangnuli ochax tokhange hüikyakya wüi changle.

Olüix Khomkya bama Anokya

³⁸ “Hünzome ile akaxkyachu atatdaoa: Mik lüix ma mik, wa lüix ma wa.

³⁹ Ikoxle kue hünzom ang thüipu: thaikya mix owawa tochu hünzome olüix taxkhom. Owawae nang tsaxchi namya ma jangfit thüiningle, chix hato nongchi chuwüi thale ahokox.

⁴⁰ Owawae nang khwa to paolaxle nang nyipong janglax thüiningle, chix ang nang nyinu chuwüi laxkox.

⁴¹ Tamchu süpahibue hwom hün hünlaxle nang mai tuita pao ang jangatsangba, ija hün nange mai anyi hünle paotoxkox.

⁴² Owawae nang ma lita jangju, chix ang laxkox; ilaxle owawae tam twon angle ju pongma ija kox ang nang taxakhex.

Zan to Mongkünkya

⁴³ “Hünzome ile akaxkyachu atatdaoa: Ma zuikhui to mongkün kox ikoxle ma zanpa thua anukox.

⁴⁴ Ikoxle kue hünzom ang thüipu: Ma zan to mongkün kox ilaxlechu ma zongto chichangle tüikya bama zangjopkox.

⁴⁵ Ikoxletix hünzom a zangkangting tokya Apa susabu ang achang ang tsuaküi; chemthüikoxle chixe chix zanghan füi chimüikya hia müikya khünaknu nok to tomwüi nyan ang tomle; tamchu omüi mokkya hia oma mokkya pangnu ang zangwat tomwüi fale.

⁴⁶ Ma to akünkün to jangkün thüikoxle, Zange nang ang chem hingho faüi? Itukux nang süisai mixbuechu mokpu.

⁴⁷ Hünzome matüi manao tata ang salam le jangthüiba, ija khünake mix to nüile chem mokdao? Ile nang songsari khünakbue ngaxchu akaxpu.

⁴⁸ Ijadaile chemle zangkangting tokya hünzom Hopa okhoguile tüipuix, ija ningle hünzom chuwüi okhongui angkya changle.