MATHI 15 - OTSAO BAIBEL (BSI)

Putong hwom bama Apuakya

¹ Farisi hia wanlom nwotmixbu Jerusalem tokya nguilaxle Jisu ma atüi,

² “Nang wangshembue bangkya pupa wanlom büthüikoxle chitopu? Hwome chak wanlom ma tüikya ningle chiatsux homle fong saxle!”

³ Chixe lan: “Hünzome a bangkya pupa wanlom toüima Zang kax to chem ang chiapa?

⁴ Chemthüikoxle Zange akaxle: ‘Hünnu hia hünpa thua zalax; ikoxle owae manu mapa thuakzomle changüi hex, chix a zi ang tomkox!’

⁵ Manu mapa to fongse tsyenchu Zang kux changpu, ija daile manu mapa thua zango angkya münchang le hünzome wüi anwot-ano tüi;

⁶ ile hünzome twonle hüikya wanlom khoma hexle Zang kaxtom mix a oba ang achang awüt tüi.

⁷ Hünzom a künkux-mongkwombu changle; hünzom hanpakma Isaia-e ile ajekya a sule wüi ajepu:

⁸ “‘Ibu khünak tun zaza ma, ku hato hüile; hwome le füi ku achuakle; ikoxle hwom mongtsang a, ku füi ochu towüi.

⁹ Ikoxlechu ku kax ningle, khünake zingkya wanlom kax, apua koxkya khoma; hwome ku shwomkya ma, lap chemchu müntüi!’”

Khünak tuita Chitsaokya ang achangkya Olom

¹⁰ Ifüima Jisu-e khünaknu chix hato nyaklaxle hwom ang thüi: “Apalax, tamchu tsingle koplax;

¹¹ Wikha makhange dongkyae chichangle khünak tuita a ija makhange laikyae tix chitsaokya ang achangle.”

¹² Ifüima chix wangshembu chix hato hüilaxle thüi: “Ija nang kaxe farisibu to tüle kakle le nange tsingchami?”

¹³ Ikoxchu Jisu-e lanle thüi: “Zangkangting tokya Apae chiküikya pün pangwüi file awütüi.

¹⁴ Hwom bama taxaban ngo; hwom a miksut lomzun mix miksutbu changle; otue miksut tuitae ata miksut mix lomzunle changüihex, hokhi pangnyi wüi tswomkha to dütüi.”

¹⁵ Pitar-e akax: “ija kax kwom hama apuale fahüi.”

¹⁶ Jisu-e hwom ang thüi: “Mix khuak-khuak ma hünzomechu wüi matsing hexnyi?

¹⁷ Wikha makhange chempang wok to jupuix ibu a tsangtsa angkya laile paoüi.

¹⁸ Ikoxle chempang wikha makhange alaipuix, ija a kün-mong tokya laipu ilaxle ijae khünak tuita chitsaokya ang achangle.

¹⁹ Chemthüikoxle künmong tokhange iningle mongtex chimüikyabu laile: mix mik amütkya; chinunchakkai; ahuxkya; atsekya; ahaikya; iningkyabu.

²⁰ Khünak tuita chitsaokya ang achangkya a ijabu changle, ikoxle chak chiatsux homle saxkya khoma hexle khünak chitsaokya ang münchang.”

Mixnu Tuitae Mongongkya

²¹ Jisu-e ikha danle toxlaxle Tair hia Sidon alople pao.

²² Ikha tokya Kanan cha tuitae chix hato hüilaxle thüi: “Dawid Hosa, ku to chingcha hüi. Ku sacha ma haxshix chasa wanglaxle tüle ziama ma tüile.”

²³ Ikoxlechu Jisu-e she kax to kaxfa tuita chilan. Chix wangshembu hüilaxle chix shwomle akax: “She achadao; chemthüikoxle she kem füifüima azuile akhong aham ngole.”

²⁴ Jisu-e lan: “Ku a samle ngokya chun Israel khünaknu hato nguipu.”

²⁵ Ijama she hüi üntoxle chix chitong ma akhuxle shwomle akax: “Alixachong ku to chingcha fa!”

²⁶ Jisu-e she kax to lan: “Naosom ang kox ang kopkya süt hi ang thokle kox angkya oli changcha?”

²⁷ She-e lan: “Alixachong, ija a changpu, ikoxlechu hie ngaxchu hopunu tsap angkya saxfun dütkya tswonle saxpu.”

²⁸ Jisu-e she kax to lan: “Nang a mongong tüle chongkya mixcha tuita changle! Nange lomkya nang ang mokle faüi.” Ijama wüi thuile ija mixcha sasün kak müi.

Jisu-e Khünaknubu Kaklak Amüi

²⁹ Ikha danle toxlaxle Jisu Galili Shinthuk-titung kakax fole lelaxle haxhua to dongle thung.

³⁰ Chix hato khünaknu othom-othom huanuma ngui. Hwome cha faikya mix, mikduak mix, faishokle kakkya mix, kaxuxkya mix tamchu mama küjo-küjekya kaklak füikya khünakbu apüilaxle chix pomtho ma dan. Jisu-e ibu khünaknu kaklak amüile fa.

³¹ Kaxux mixe akax ang tho, faishokle ngokya mix müi, chafai mix aham, mikduak mix mike ngün; ijabu ngünlaxle Israel Zang achuakle khünaknu abüt.

Jisu-e Hajat Ali Khünaknu Tuxkya

³² Jisu-e chix hato wangshembu nyaklaxle thüi: “Kue ibu khünaknu to tüle chingchale; chemthüikoxle ku füi tomle ngokya hwom nyix azom jao sütüna, ikoxle athax hwom ang sütfun tuita müntüi. Hwom lomba to woknuake maxüi tüile, kue hwom ang süt chiasüt homle apaose münthüt.”

³³ Wangshembue atüi: “Jangchangba ibibi khünake sax ang, iningkya faokha to keme ojong tokya süt okhongui le ataküi?”

³⁴ Jisu-e atüi: “Hünzom ma ankhao obi tüipu?” Hwome lan: “Ankhao anüt ilaxle nyaxsabu hidaole tüile.”

³⁵ Jisu-e khünaknu pangnu haxsha ma thung ang tsan

³⁶ Ifüima chixe ankhao anüt hia nyaxsabu chix chak ma kop, Zang ang münchong fa, ijabu akhix ilaxle wangshembu chak to kox, ikoxle wangshembue ibu khünaknu ang ahanle kox.

³⁷ Hwome pangnue wüi wokfwot müile sax. Hwome atale toxkyabu ofüima wangshembue sang anüt tswonle afox.

³⁸ Mixnu naosa chixe homtoxle ija fongsüt ma womkya khünak hajat ali tukux tüikya.

³⁹ Ifüima Jisu-e khünaknu chat ang tom. Chix a wangshembu kop laxle khua ma ngale Magadon chaxwan to pao.