Yeremiya 14 - Emakhuwa Bible

Etala etokotoko

¹ Masu Yeremiya aakhenlaawe wa Yave mwaha wa etala ti ala:

² “oYuda onlalamika ni isidadesaya simporora; amakaaya aniilalamikela yuuramenleene vathi ni okhuwelaxiwa ongweela oYerusaleemu.

³ Maneethi anaaruma arumeiyaaya orika maahi; awosa anoorowa mmattankhini, mene khaamphwanyamo. Vano awosa anghokolowa ehikunxe maahi oopororeene ni ehoonaka yooweera aniikhuneela muru.

⁴ Etthaya yohuumelela niwoko khayaarumpe epula; anamalima aapororaxa yiikhuneelaka mmuru.

⁵ Mpakatho naahe mutuphini onimuhiya mwaaxaana ooyariwa vaanaano niwoko khaawowo malaxi.

⁶ Abuuru a ntuphini ampwaherera weemela mmattumuxani oowuumelela emumulaka ntoko akhwatte; maithwaaya anaasaasaxa malaxi, mene khaawowo.”

⁷ Ii! Yave! Naari sootthekasahu sinikhalelaka onamoona, dyoontte, munikhavihere moosivelani wa Nsinananyu. Vano ohiroromeleyawahu wootepa; nohootthekelani.

⁸ Ii! Oweherera wa oYixrayeli ni Mvuluxaaya mweehuhuni yoovalaveliha, heeni munkhalaanyu ntoko namarwa mweelaponi, ntoko namukwaha omviriha ohiyu mmoha paahi?

⁹ Heeni munkhalaanyu ntoko mutthu ovariwe wootutuxereya, ntoko nakhotto ohingwera ovuluxa? Nyuwo muri variyariwahu, Yave, ni hiyo ti awinyu; muhinihiye!

¹⁰ Vano Yave oneera ha mwaha wa muloko ola: “Awosa ansivela oxoraxora; awosa khaangwehaweha weettawaya. Tivawo Yave ohingwaakhulelaawe; Owo vano onimuupuwelela soonanarasaya ni onimwaattaruxa niwoko na sootthekasaya.”

¹¹ Vano Yave aakeerela: “Muhivekelele weetteleya nnene wa muloko ola.

¹² Naari etthukaka, Miyo nkirwa kiwiiwa okhuwelawaya; naari epakaka sooveleela soohisa ni sa etrigu, nkirwa kiwaakhulela. Ohiyanawaya, kinimwaaphwata ni ekatana, etala ni nihooxo.”

Okhoottiwa wa maprofeeti oowootha

¹³ Mene miyo kaamweerela: “Ii! Yave onlamula sootheene, maprofeeti ampwaherera waaleela atthu: ‘Nyuwosa khamurwa moona ekatana hata ohaawa etala. Miyo kinimoovahani murettele woohimala vanipuroni nna.’ ”

¹⁴ Vano Yave aakeerela: “Maprofeeti anthalihera soowootha mwa Nsinanaka. Miyo nkaaruminghe, hata nkaakhalinghe naari nkuulumme ni yaawo. Awosa anoothaliherani nyoonelo soowootha, sootthoma soohimuteko, ni masu a mmurumwaya.

¹⁵ Tivawo Yave oneeraawe ha mwaha wa maprofeeti anthalihera masu a maprofeeti mwa Nsinanaka: Miyo nkaaruminghe, hata hiiho awosa aneera: ‘Kheewowo ekatana naari etala eneera etave elapo ela.’ Vano maprofeeti yaaweene animwiiviwa ni ekatana ni etala.

¹⁶ Ni wa yaawo anaathaliheraaya anoovonyerasiwa mmiseweni sa oYerusaleemu niwoko na ekatana ni etala. Khawowo aneera ahale weera aavithe naari axaaraaya, anamwane asilopwana hoye hoye asithiyana. Miyo kinimwaamoroxela erisa awosa amphwanelaaya.

¹⁷ “Mwaaleele ha: ‘Maithwaaka esareyeke maithori ohiyu ni othana woohihiyerera, niwoko mwanaka oowiikosoopa, mulokwaaka, oovulalaxa, oomaniwa moota woowoopiha.

¹⁸ Miyo karowa ntuphini, kingwoona yaawo yiiviwe ni ekatana; miyo kavolowa musidade, kimmoona noomala a etala. Maprofeeti ni asaserdoti* aarowa elapo ahisuwenlaaya.’ ”

Muloko ondyoonttelela ikharari

¹⁹ Nyuwo moomuhiya Yuda moota woomalela? Nyuwo moomuramusa Siyoni? Heeni munihasunlaanyu moota wooweera khaningweratho olama? Naaweherera murettele, mene khanoonneru. Naaweherera ehuhu ya olama, mene oriwo otteenguwa paahi.

²⁰ Ii! Yave, nohoonelela sootakhalasahu ni nthowa na makholowaahu; vekhaikhai, nohootthekelani.

²¹ Mwaha wa Nsinananyu muhiniramuse; muhiveihe ehicaanyu ya emwene yoovuwaxa. Muupuwelele wiiraanawanyu ni hiyo ni muhimalihe.

²² Khoowowo hata mmoha wa miluku soohimuteko sa miloko ongwera orupiha epula. Erimu muneenaaya kheengwera orupiha epula. Ti Nyuwo paahi, Yave Mulukwaahu mungwera. Tivawo owehererawahu oraaya mwa Nyuwo, niwoko ti Nyuwo mumpaka sootheehe seiyo.