Hoxeya 11 - Emakhuwa Bible

Osivelawawe Muluku oYixrayeli

¹ “Yixrayeli aaraawe mmiravo, Miyo kaamusivela, ni wExipitu kaamwiitthana mwanaka.

² Vaheera Miyo kaawiitthanaxaaka aYixrayeli, awosa ti yaakirakamelasaaya. Awosa yaahaapakela sooveleela aBahali*, ehiseraka erubani* icaambulo.

³ Vano, ti Miyo kaaxuttihale weetta awEfrayimi kiweerelaka eta eta; vaheera awosa khayaasuwenle weera ti Miyo kaalamihale.

⁴ Miyo kaaweettiha ni mikhoyi sa murima wooreera, ni sa osivela; kaavenxa muxikomwaya murindi woolemela, kinuurama weera kaacihe.

⁵ Awosa anoohokoleela wExipitu ni awAsiriya animwaalamula niwoko na okhoottawaya orukunxa murima.

⁶ Ikatana sinooceremela mmasidadenimwaya, sinimwaaphwata anampattika a maselaaya ni sinoomalamaliha soovaanelasaya.

⁷ Mulokwaaka woolakelaxa okihiya Miyo. Anoomwiitthanaru Bahali*, owo khanaavuwiha.

⁸ Moota heeni kineeraaka koohiyeeni Efrayimi? Yixrayeli, moota heeni kineeraaka kiwinnyerereni mmatatani mwa akina? Moota heeni kineeraaka koopakeeni ntoko kaampankaaka Adema? Moota heeni kineeraaka koopakeleni yeele kaampakenlaaka Zeboyimi? Murimaaka khoonoona mathanlelo; ikhararisaka sootannyereya.

⁹ Nkikwanihera isarasaka soowuupa, hata nkihokoleelatho omphwata Efrayimi, niwoko Miyo ti Muluku nkihiyono mutthu. Miyo ti Ootteela eriyaraanyu. Nkirwa musarani.

¹⁰ Awosa eniimutthare Yave; Owo anoope murika ntoko mwatto. Owo oopaka murika, anamwanaawe eniirwe ethukumelaka, ekhumaka mpatta ninkhuma nsuwa.

¹¹ Eniirweele ethukumelaka wExipitu, evavaka ntoko ipalame, ekhumaka wAsiriya ntoko ikhunda; Miyo kinimwaatekiha mmatthokonimwaya,” onghima Yave.

¹² wEfrayimi wookirica ni soowootha, empa ya oYixrayeli ni soolokottha ni Yuda onimvaanya Muluku, aani Ootteela oororomeleya.