Ezekiyeli 39 - Emakhuwa Bible

Ophwatiwa wa anakhotto a Gogi

¹ “Mwaana a mutthu, munthaliherele Gogi otthuna wa Muluku ni mweere: ‘Yave onlamula sootheene, oneera ha: Ii! Gogi, mutokweenexa a oMeseki ni oTubali, koowiittani.

² Kinimoorukureerihani, koopurulekeni; Miyo kinimooruuhani kookhumihakani omwiinanoni wa ottuttuwani, koorumihelekeni mmanyaakoni sa oYixrayeli.

³ Vano, kinimwintaka muura ori muntatanimwanyu noothiyana, kimoroxeke nyuupasanyu siri muntatanimwanyu noolopwana.

⁴ Nyuwo vamoha ni anakhottwaanyu ootheene ni miloko sineera sikhale ni nyuwo munoomorela mmanyaakoni sa oYixrayeli. Kinoopakiha weera erutthwaanyu eciwe ni moota wootheene wa marepo mpakatho axinama a ntuphini.

⁵ Nyuwo munoomorela vanlakalakani, niwoko Miyo kohuuluma, onghima Yave onlamula sootheene.

⁶ Kinoomurumihela mooro Magoge ni yaawo ankhala oolipeene muxerexere ephareiya, ni awosa anoosuwela weera Miyo ti Yave.

⁷ Kinoosuweliha Nsinanaka Nootteela eriyari ya mulokwaaka aYixrayeli. Nkihiyatho nihiirihiwaka Nsinanaka, ni miloko sinoosuwela weera Miyo ti Yave, Ootteela a oYixrayeli.

⁸ Nneera niphiyaka! Vekhaikhai enimweereya, onghima Yave onlamula sootheene. Nna ti nihuku kaahimalaaka.

⁹ Vano, yaawo eniikhale musidadeni sa oYixrayeli, anookhuma, evareleke muteko ikapwitthi ntoko yoopattihera ni ehiseke – ixikudu* ikhaani ni itokweene, nyuura ni nyuupa, ikopo sa mukhottoni ni mavaka. Anoovarela muteko ntoko yoopattihera mweehuhuni ya iyaakha ithannapiili.

¹⁰ Khootthuneya wa yaawo waasa ikhuuni ntuphini, naari othikila moothakoni, niwoko awosa anoovarela muteko ikapwitthi ntoko yoopattihera. Awosa animwaahuhula yaawo yaahuhunle, yaakuxeke yaawo yaakunxe, onghima Yave onlamula sootheene.

¹¹ Nihuku nno, kinoomvaha Gogi nihiye oYixrayeli, mureyareyani na yaawo amvira erowaka mpatta ninkhuma nsuwa wookela ophareiyani. Nno nnoowala ephiro ya anamweetta, niwoko Gogi ni mikuttulasawe sootheene sa anakhotto anoovitheliwawo. Tivawo oneeraaya wiitthaneliwewo oHamoni–Gogi.

¹² Mweehuhuni ya nyeeri mithannamiili muloko wa oYixrayeli onimwaavitha weera elapo etteelihiwe.

¹³ Muloko wootheene wa mulaponi onimwaavitha, ni vanihukuni kineeraaka kivuwihiwe nnimwaakhalela nihuku noowuupuwelela, onghima Yave onlamula sootheene.

¹⁴ Anoothanliwa asilopwana weera eviravire mulaponi ni yaavithe yaawo eneera ehale vatthayani. Awosa animwaasa mittembo iyo wa nyeeri mithannamiili. Hiiho, elapo enootteelihiwa.

¹⁵ Yaaviraviraka mulaponi, ni mmoha a yaawosa oona nikhuva na mutthu, aheleke ekanyero muxerexeremwaya mpaka anamathipa eneeraaya evithele mureyareyani na oHamoni–Gogi.

¹⁶ Enookhalawotho esidade eneera yiitthaneliwe nsina na “Hamona.” Hiiho, awosa anootteeliha elapo.’

¹⁷ Mwaana a mutthu, Yave onlamula sootheene, oneera ha: Mwiitthane moota wootheene wa ipalame ni axinama ootheene a ntuphini: ‘Ekhumase mmapuroni moothemwene yaarukureenre ni ethukumanele yooveleela kinoorehererelasaakani, yooveleela etokotoko mmanyaakoni sa oYixrayeli. Wu, nyuwosa munookhuurawo enama ni munoowura ephome.

¹⁸ Munookhuura enama ya aweri ni munoowura ephome ya asitokweene a mulaponi ekhalaka ntoko anapunci a ikhondoolo, eputtiputthi, ipuri ni imombe ilopwana – ootheene awo ereene axinama ooneneva a oBaxani.

¹⁹ Yooveleela kinoorehererelasaakaniwo, nyuwosa munookhuura makhura mpaka woohurukani ni munoowura ephome mpaka woohapalani.

²⁰ Vameesaniwaka nyuwosa munookhuura enama ya ekavalu* ni anamweettihaaya, enama ya atthu ooweraxa ni ya anakhotto moota moota,’ onghima Yave onlamula sootheene.

²¹ Kinimoonihera ovuwawaka eriyari ya miloko, ni miloko sootheene sinimoona nttaruxo kineeraaka kiruuhe ni ntata kineeraaka kiwiikaatherase.

²² Okhuma nihuku nno woorowa ohoolo, aYixrayeli anoosuwela weera Miyo ti Yave, Mulukwaaya.

²³ Hiiho, miloko sinoosuwela weera aYixrayeli arongheliwe wootthukiwani elapo ekina niwoko na sootakhalasaya, yeenre ehiroromeleya wa Miyo. Tivawo kaahulungwaaka kinawinnyerera mmatatani mwa amwiittanaaya, ni awosa ootheene ahiiviwa ni ekatana.

²⁴ Kohaapakela yaawosa, kittharihaka ohitteelawaya ni mwaha wa sootthekasaya, kinaahuluwa.

²⁵ Tivawo oneeraawe ha Yave onlamula sootheene: Vano kinoomuhokoloxa Yakobe wootthukiwani elapo ekina ni kinoomorela ikharari muloko wootheene wa oYixrayeli, kaakhaleleke nthiti mwa Nsinanaka Nootteela.

²⁶ Awosa anoottiwala wuulihiheya muru yaarinaaya, ni ohiroromeleya wootheene akoonihenraaya yaakhalaaya oolipeene mulaponimwaya ahikhalaka oowoopopiha.

²⁷ Miyo kaahokoloxaka mmilokoni ni kaathukumanyihaka eriyari ya ilapo sa amwiittanaaya, Miyo kinimwiixoonihera ootteela mwa yaawosa vamaithoni wa miloko sincipale.

²⁸ Hiiho, awosa anoosuwela weera Miyo ti Yave, Mulukwaaya, niwoko kaarimwaarumihelaru wootthukiwani elapo ekina eriyari ya miloko, Miyo kinimwaathukumanyiha mulaponimwaya, kihimuhiyakaru ottuli naari mmoha a yaawosa.

²⁹ Nkaahuluwatho, niwoko kinooyeehera Munepaaka muloko wa oYixrayeli, onghima Yave onlamula sootheene.”