Filifai 1 - Iduna

¹ Yo siule tobohiyakweyao Filifai againe moya'aimi Yesu Keliso buye wave'atutamo'aimi amanadi. Iya Folo kadu Timoti buye Yesu Keliso ana agetoga yami leta a'etoladina be wana'itana. Ime ama'iselu alusiuleyemi kadu Yaubada yana yo'o adi to'itave'avina lakahidiyao be toleme buye yadi lusiule.

² Yaubada Tamada kadu Kaiwabu Yesu Keliso hinanuwadogemi kadu ase'asemi hinakiveniwalovina.

Folo tovetumagana Filifai againe fa'idiya givesiule.

³ Keke gavana fa'ina tu tova tova ganuwa-nunauyemi againe, Yaubada againe gavesivesiule omi fa'imiya.

⁴ Tova sa'eyana sa'eyana omi moya'aimi fa'imiya gave'ove'o'ola againe, yaku wavemwamwala gave'ove'o'ola tova moya'aina.

⁵ Boi tuwaina Yesu Keliso againe wamidivetumagana tu wanunauwena tova adamoya Yesu Keliso yana Venuwa'ata Yamumuna ana faisewa againe waveluvelugaku fa'ina, omi fa'imiya gavesivesiule.

⁶ Ada ganuwave'avina vaita Yaubada ahe givebutu nuwahinagemi gi'ihagihagiyena amanadi ginanunauwena ginanunauwena tu Yesu Keliso ginayewa'ela ana toveya ginaluyabuna.

⁷ Gilubodana be medede amine omi fa'imiya ganuwanuwa, fa'ina tova moya'aina gatalatalanuwayemi. Kadu omi moya'aimi aku vehimeya Yaubada yana nuwadoga againe giveleku-ma ana faisewa againe waveluvelugaku. Venuwa'ata Yamumuna Keliso fa'ine kaliva matadiya galulugolegolena ana toveya o ka'i yogoyogoniku deliya gamimiyami ana toveya, au tova moya'aina waveluvelugaku.

⁸ Yaubada gihalamaneku tu gagahegahe yaku talanuwa agaimiya inubana ma Yesu Keliso ginuwenuwemi amine meda iya ganuwenuwemi.

^9-10 Tu yaku ve'o'ola omi fa'imiya hidede amine, nuwanuwaku yami nuwanuwa hawahawahegana ginatubutubuga. E, yami wanuwahuya kadu yami wa'itahalamana yami nuwanuwa hawahawahegana ginatubutubuga ginatubutubuga tu againe wanawahivemavemauga be higa gavaimi giluboda-mo'ena, medema wananuwave'uve'una be wanamuliyena. Au hidede amine Keliso ginayewa'ela ana toveya omi yegayegamiyao kadu keke tamo yami wakoyona wanamiyami.

¹¹ Kadu nuwanuwa tunutunugina guwana tulina tulina Yesu Keliso againe give'inuba-ma agaidiya wanamaga be kaliva guwai-mina hina'itani-yo Yaubada hinahawavekaiwabuyena be hinahawadavadavana.

Folo yogoyogonina deliya gimiyami nonogana Venuwa'ata Yamumuna kaliva agaidiya gimaduga-mo'a.

¹² Tu tobohiyakweyao, nuwanuwaku wanahalamanena vita iya ganuhagana-ma keke Venuwa'ata Yamumuna yana madu gidahawatani. Au aku vitai-nadi againe Venuwa'ata Yamumuna gimaduga-mo'a.

¹³ Venuwa'ata Yamumuna yana madu hidede amine. Yaku miya deliya inubana kaliva moya'aidi agaidiya gimahalina. Iya Keliso ana vetumagana fa'ina bulava kainumula againe yogoyogoniku gamimiyami ma badi tolugaviya Loma Tokaiwabu lakahina yana manuwa lakahina ana tolugolagola moya'aidi kadu mali kaliva moya'aidi hihalamanena.

¹⁴ Kadu iya bulava kainumula againe yogoyogoniku gamimiyami fa'ina, Kaiwabu tobohiyadeyao tufoidi moya'aidi yadi asevatu giveledi be ase'aseboudiyao Kaiwabu bonana ana laumamala againe hitutuveguveguladi keke yadi wamatauta.

¹⁵ Wona velemona kaliva tufoidi aku egana lakahina fa'ina higaga'uma'uma kadu hivekwavekwageyeku. Nuwanuwadi adi egana ginalakata fa'ina Keliso hilulumamalena, tu tufoidi nuwadi yamumuna fa'ina hilulumamalena.

¹⁶ Badi nuwadi yamumuna ma yadi nuwanuwa iya agaikuya hisena fa'ina Keliso hilulumamalena, ada ahe hihalamanena iya Venuwa'ata Yamumuna galugolegolena fa'ina deliya hiseku.

¹⁷ Badi higa'uma'uma ma keke yadi wa'asehawahega tu nuwanuwadi taudiyao adi egana hinakilakahina fa'ina, Keliso hilulumamalena. Hinuwanuwa vaita medede amine iya aimo deliya gamimiyami tu kadu vita agaikuya hinakivetubugini.

¹⁸ Ka'i nuwadi koyona o ka'i nuwadi yamumuna, ka'i velemodi o keke velemodi, medema gaitoma kabi'ona. Gaitoma lakahina ma Keliso ana laumamala ginanauna. Ada medema fa'ina gavemwamwala.

Ka'i wayawaiku ganamiyami, Keliso yawaina iya yawaiku.

¹⁹ Wona velemona ganavemwamwala, fa'ina gahalamanena yami ve'o'ola againe kadu Yesu Keliso Alu'aluwana yana veluga againe aku aiyauga gananuhagana.

²⁰ Nuwanuwaku lakahina ada hidedemi Yaubada againe galuluve'avina vaita keke-mo'a koyona ganafaisewani-yo ganawowomumu. Au nuwanuwaku boi tova moya'aina ga'ase'asevatu amine, meda tova adamoya gana'asevatu-mo'a be higa yaku dewa moya'aina againe Keliso ana egana ganakilakahina. E, ka'i wayawaiku ganamiyami o ka'i gana'alika, nuwanuwaku kaliva hina'itaku-yo Keliso ana egana hinakilakahina.

²¹ Iya'eku ma ka'i wayawaiku ganamiyami, au Keliso yawaina iya yawaiku. Ka'i hinaluve'alikaku, au yaku alika againe Keliso ana egana ana kailakata ginanauna ada iya yamumu lakahi-mo'ena gananuhagana.

²² Atu aimo wayawaiku hidei babiya ganamiyami againe faisewa yamumuna waguwana Keliso fa'ine akufaiweya gana'abina. Fa'ina ka'i wayawaiku ganamiyami, medema gilubodana. Ka'i gana'alika, kadu medema gilubodana. Au eda yamumuna luhei tu hadema giluboda-mo'ena be againe ganahawahegeku ma keke gadahalamaneni.

^23-24 Yaku nuwanuwa hive'alulautaina. Nuwanuwaku lakahina hida babi ganahegena be Keliso buye anamiyami. Medema giluboda-mo'ena. Atu omi ami veluga fa'ina wayawaiku ganamiyami nuwanuwai-nadi nuwanuwa nagona gayakahina-ma gitubuhegena.

²⁵ Hidedemi ganuwave'avina fa'ina, gahalamanena wayawaiku ganamiyami. E, hidei babiya iya aimo omi buye kanamiyami be higa yaku velugeya yami vetumagana againe wanafifaiwala wanafaiwalahegahega kadu wanavemwavemwamwala.

²⁶ Ada au aimo deliya ganahobu tu omi agaimiya ganayewa'ela ana toveya, aku lugolagola fa'ina nuwami ginayamumu-mo'a ada Yesu Keliso ana egana wanakilakahina.

Yadi wa'asevatu Keliso fa'ine hinalulugaviya.

²⁷ Tu gavadi iya agaikuya ginalakayemu, medema gaitoma kabi'ona. Gaitoma lakahina ma gavaimi gavaimi Keliso yana Venuwa'ata Yamumuna ana tomuliya gilubodami, medemi wanahuluhuluva. Ada au ka'i gana'ela gana'itami o ka'i valeyami iya lauveya gananogalina, au ganahalamanena omi yami inuba sa'eyana wamidimidi toyogina kadu yami wanuwanuwa sa'eyana yami vetumagana Venuwa'ata Yamumuna againe give'inuba-ma fa'ina walulugaviya.

²⁸ Nuwanuwaku valeyami gananogalina higa badi yami vetumagana fa'ina hivenibainemi-ma keke ma'ita wadamatausedi. Ka'i hidede amine keke-mo'a wanamatausedi, au hinahalamanena higa vaita omi wanafaiwalahegedi tu badi hinabwavi. Fa'ina badi hinabwavi ma Yaubada Tauna ginavehawaledi, ada au gina'ivehamumudi tu omi ginakibababalemi.

²⁹ Au hidede amine ginalakayemu fa'ina, Yaubada ginuwadogemi be ami vehimeya hagihagidi luhei givelemi. Sa'eyana ma Keliso againe wanavetumagana. Tu keke vetumaganagaga, au kadu Bana ana vetumagana fa'ina vita tulina tulina wananuhagadi.

³⁰ Tova adamoya omi'iyao kadu iya'eku yada lugaviya au sa'eyana. Tuwaina yaku lugaviya Keliso fa'ine wa'itana, ada tova adamoya aimo galulugaviya-ma valeyaku wanogalina. Iya amine meda omi Keliso fa'ine walulugaviya.