NUMERI 6 - BIVHILI KHETHWA Mafhungo Madifha

Ndayo dza vhanaziri

¹ Muṋe washu a laya Mushe

² uri a laye Vhaisraele nga ndayo hedzi a ri, “Munna kana musadzi ane a vhuya a ana uri u ḓo vha munaziri a ḓikumedza Yahavee,

³ u fanela u ḓiilisa na halwa. A songo nwa tshinwiwa tshifhio na tshifhio tsho itwaho nga nḓirivhe kana a ḽa nḓirivhe kana mpale wa nḓirivhe.

⁴ Zwenezwo a tshi kha ḓi vha munaziri, a songo ḽa tshithu tsho itwaho nga munḓirivhe, naho tsho itwa nga mbeu kana makanda a nḓirivhe.

⁵ “Zwenezwo a tshee o vhoxwa nga muano wa munaziri, a songo vhuya a vheula mavhudzi awe kana a palula ṱhoho. O vhofhiwa nga mulayo wonoyo tshifhinga tshoṱhe tsha musi o ḓikumedza Yahavee, nga a litshe mavhudzi awe na ndebvu dzawe zwi aluwe.

^6-7 Mavhudzi awe ndi tshiga tsha u ḓikumedza hawe Mudzimu, zwenezwo a songo ḓishata tshika nga u sendela tsini ha tshitumbu, naho tshi tsha khotsi awe kana mme awe kana murathu wawe kana khaladzi awe.

⁸ Zwenezwo a tshi kha ḓi vha munaziri, o kumedzwa Yahavee.

⁹ Arali mavhudzi a munaziri e a kumedzwa Mudzimu o shatwa tshika nge a vha tsini na muthu we a sokou tshenuwa o fa kathihi fhedzi, o fanela u lindela hu vhuye hu fhele maḓuvha maṱanu na mavhili, ndi hone a tshi ḓo vha o kumululwa, a konou vheula mavhudzi awe na ndebvu dzawe.

¹⁰ Nga ḓuvha ḽa vhuṱanu na vhuraru a ḓise maivha mavhili kana zwiivha zwivhili ha tshifhe henefho muṋangoni wa dennde ya u ṱangana na Mudzimu.

¹¹ Tshifhe u ḓo ṋekedza ḽithihi ḽa vha nduvho ya tshipfumelo, ḽiṅwe ḽa vha nduvho i fhiswaho, uri hu itwe maitele a u mu kumulula nge a kwama tshitumbu. Nga ḓuvha ḽeneḽo uyo munna u ḓo dovha a kumedza mavhudzi awe

¹² a dovha a ḓikumedza Muṋe washu a dovholola aḽa maḓuvha e a vha o fulufhedzisa u vha munaziri. Aḽa maḓuvha a u ranga ha tsha vhaliwa, nge a shatwa tshika e munaziri. U ḓo ḓisa ngwana ya ṅwaha muthihi ya vha nduvho ya tshipfumelo.

Nduvho dza musi vhunaziri ho fhela

¹³ “Musi munaziri a tshi ṱhaphudza muano wawe, u ḓo ita maitele enea: U ḓo iswa muṋangoni wa dennde ya u ṱangana na Muṋe washu

¹⁴ a swikisa ha Muṋe washu zwifuwo zwiraru zwi si na luvhadzi: ngwana ya thutha ya ṅwaha muthihi ya vha ya tshiṱhavhelo tshi fhiswaho, ngwana ya phwidzi ya ṅwaha muthihi ya vha nduvho ya tshipfumelo, thutha ya vha nduvho ya u konana na Muṋe washu.

¹⁵ U ḓo dovha a ṋekedza na mufaro wa vhurotho vhu si na mbilisa: mikonde midenya ya vhukhopfu ho vangiwaho zwigaku zwo fhomiwaho nga mapfura a muolivi, khathihi na nduvho dzi ṱoḓeaho dza ṱhotshe na waini.

¹⁶ Tshifhe u ḓo dzhia zwoṱhe hezwo a zwi swikisa ha Muṋe washu, a ṋekedza nduvho ya tshipfumelo na nduvho i fhiswaho.

¹⁷ U ḓo ṋekedza Muṋe washu tshiṱhavhelo tsha thutha ya nduvho ya u konana na Mudzimu, a i ṋekedza na mufaro wa vhurotho vhu si na mbilisa, a swikisa na nduvho ya ṱhotshe na waini.

¹⁸ Munaziri u ḓo vheula mavhudzi awe henefho muṋangoni wa dennde ya u ṱangana na Muṋe washu, a a longa muliloni une wa khou fhisa nduvho ya u konana na Mudzimu.

¹⁹ “Zwino musi voho ḽa thutha ḽi tshi khou bikiwa, tshifhe u ḓo ḽi dzhia a ḽi vhea khathihi na mukonde wa vhurotho na gaku ḽithihi ḽi no bva kha mufaro, a zwi vhea zwanḓani zwa munaziri.

²⁰ Tshifhe u ḓo konou zwi ṋekedza phanḓa ha Muṋe washu ya vha nduvho i imiselwaho nṱha. Ndi zwikhethwa, ndi zwa tshifhe, khathihi na voho ḽo imiselwaho nṱha na tshizwa tsho ṋekedzwaho. Hó no fhela izwo munaziri a nga ḓi nwa waini.

²¹ Hedzo ndi dzone ndayo dza vhanaziri, hone arali munaziri a fulufhedzisa Muṋe washu nduvho ine ya fhira zwe a anela zwone, o fanela u khunyeledza na zwenezwiḽa zwe a fulufhedzisa.”

Tshifhe a tshi shudufhadza vhathu

²² Muṋe washu a laya Mushe

²³ uri a vhudze Aroni na vhana vhawe uri vha bule maipfi haano musi vha tshi shudufhadza Vhaisraele, vha ri,

²⁴ “Muṋe washu nga a u shudufhadze a u londole;

²⁵ Muṋe washu nga a u sedze nga vhuthu a u khathutshele;

²⁶ Muṋe washu nga a u takalele a u fhe mulalo.”

²⁷ Muṋe washu a ri, “Bulani dzina ḽanga nga u ralo ni tshi shudufhadza Vhaisraele, Nṋe ndi ḓo vha shudufhadza.”