NUMERI 5 - BIVHILI KHETHWA Mafhungo Madifha

Vhathu vho kumalaho

¹ Muṋe washu a amba na Mushe a ri,

² “Laya Vhaisraele uri afho mishashani vha thathe vhoṱhe vha re na vhulwadze ha lukanda vhu kumadzaho kana vha bvuḓaho vhulwa muvhilini na vhoṱhe vhe vha kumala nga u kwama tshitumbu.

³ Vhathu havho vhoṱhe vho kumalaho, munna kana musadzi, nga vha bviselwe nnḓa, uri vha si kumadze mishasha hune nda dzula hone na vhathu vhanga.”

⁴ Vhaisraele vha thetshelesa, vha thatha avho vhathu afho mishashani nga he Muṋe washu a vhudza Mushe.

U lifha mulandu

⁵ Muṋe washu a vhudza Mushe

⁶ uri a laye Vhaisraele ndayo hedzi: Arali munna kana musadzi a khakhela muṅwe nga tshifhio na tshifhio, ha vha u shandukela Muṋe washu, onoyo muthu u na mulandu,

⁷ o fanela u bula vhutshinyi hawe, a lifhe mulandu wawe woṱhe, a inge nga tshipiḓa tshithihi kha zwiṱanu, a lifhele we a mu khakhela.

⁸ Huno arali uyo muthu o fa, a si na shaka ḽa tsini ḽine ḽa nga lifhelwa uyo mulandu, mulifho nga u ṋewe Muṋe washu u vhe wa tshifhe. Mulifho uyo u ingwa kha thutha i ṱhavhelwaho u pfumelela uyo muthu a re na mulandu.

⁹ Na zwiṅwe zwoṱhe zwine Vhaisraele vha bvisa vha zwi ṋekedza Yahavee ndi zwa onoyo tshifhe ane a zwi ṱanganedza.

¹⁰ Tshifhe muṅwe na muṅwe u dzhia nduvho dzine dza swikiswa khae dza vha dzawe.

Milandu ya vhasadzi vha re na vhanna vha lulindo

¹¹ Muṋe washu a laya Mushe

^12-14 uri a laye Vhaisraele ndayo hedzi a ri, “Zwi nga itea uri munna a humbulele musadzi wawe uri ha fulufhedzei, o ḓishata tshika nga u dzheniswa nḓuni nga muṅwe munna. Huno munna wawe a nga kha ḓi vha a si na ngoho, ngauri musadzi wawe a nga kha ḓi vha o zwi ita tshiphirini, hu si na ṱhanzi, á songo farwa a tshi khou zwi ita. Nahone zwi nga kha ḓi itea uri munna a vhe na vivho a sokou humbulela musadzi wawe vhuvhi, naho a songo ḓishata tshika.

¹⁵ Munna uyo nga a ise musadzi wawe ha tshifhe. A ise na nduvho i ṱoḓeaho ya khilogiramu nthihi ya bali, hone a songo i shela mapfura kana a ṋuṋedza zwioro khayo, ngauri nduvho iyo ya thoro ndi ya lulindo lwa munna, i itelwa uri ngoho i vhonale.

¹⁶ “Tshifhe u ḓo ḓisa musadzi uyo a mu imisa phanḓa ha Muṋe washu,

¹⁷ tshifhe a konou shela maḓi makhethwa sambeloni ḽa vumba, a dzhia mavu a re henefho denndeni ya u ṱangana na Muṋe washu, a a longa maḓini.

¹⁸ Tshifhe a ṱharamudze mavhudzi a uyo musadzi, a vhee nduvho ya vhukhopfu zwanḓani zwawe, a konou fara sambelo ḽiḽa ḽi re na maḓi a no ḓisa zwi vhavhaho na mafhanza.

¹⁹ Ndi hone tshifhe a tshi ḓo ita uri musadzi uyo a tende muano une wa buliwa nga tshifhe u no ri, ‘Arali u songo ita vhupombwe, ú songo pambuwa nḓilani, ú songo ḓishata tshika u tshi kha ḓi vha na munna wau, ngavhe maḓi haya a no ḓisa zwi vhavhaho na mafhanza a sa u huvhadzi.

²⁰ Hone arali wo ita vhupombwe u tshi kha ḓi vha na munna wau, wa ḓishata tshika nga u dzheniswa nḓuni nga munna a si wau,

²¹ ngavhe Muṋe washu a tshi ita uri vhathu vha hau vha teketelane nga dzina ḽau. Ngavhe a tshi ita uri mbumbelo yau i hwetekane, thumbu yau i kukumuwe.

²² Ngavhe maḓi haya a u teketela a tshi dzhena thumbuni yau a i kukumusa, mbumbelo yau ya hwetekana.’ Musadzi u ḓo fhindula a ri, ‘Amen, nga zwi ralo.’

²³ “Ndi hone tshifhe a tshi ḓo ṅwala mafhanza ayo kha gwati a zwi kuvhela sambeloni ḽi re na maḓi a no ḓisa zwi vhavhaho.

²⁴ Hu ḓo ri tshifhe a sa athu nwisa uyo musadzi ayo maḓi ane a nga ita uri a pfe vhuṱungu nga maanḓa,

²⁵ tshifhe u ḓo dzhia nduvho ya vhukhopfu ha vivho zwanḓani zwa uyo musadzi, a i imisa a i kumedza Muṋe washu, a i ḓisa aḽiṱarini.

²⁶ Tshifhe a konou ṱusa iyo nduvho ya thoro i si gathi ya vha nduvho ya tshihumbudzo, a i fhisa kha aḽiṱari, a fhedza nga u nwisa uyo musadzi ayo maḓi.

²⁷ Arali o ita vhupombwe, maḓi a ḓo ita uri a pfe vhuṱungu nga maanḓa, thumbu yawe i ḓo kukumuwa, mbumbelo yawe ya hwetekana. Vhathu vha hawe vha ḓo teketelana nga dzina ḽawe.

²⁸ Hone arali a si na mulandu a nga si huvhale, nahone u ḓo ḓi beba vhana.

^29-30 “Hoyu ndi wone mulayo wa milandu ya munna wa vivho, a tshi humbulela musadzi wawe vhupombwe. Musadzi u ḓo imiswa phanḓa ha Muṋe washu, tshifhe a tevhedza maitele eneo.

³¹ Munna wawe u ḓo vha a si na mulandu, hone musadzi ene, arali e na mulandu, u ḓo tambula.”