MIRERO 9 - BIVHILI KHETHWA Mafhungo Madifha

Vhuṱali vhu tshi vhidzela vhathu vhuṱambo

¹ Vhuṱali, ene mufumakadzi wa mupfumi, ho ḓifhaṱela nnḓu yaho, ha i tika nga phuphu ṱhanu na mbili dza matombo,

² ha ṱhavha kholomo dzaho, ha ṱuḓa waini yaho, ha ḓeka ḓafula ḽaho,

³ ha ruma vhasidzana u yo vhidza vhathu, vha ime miḓini hune vha vhonwa nga vhoṱhe vha ri, “Vhuṱali vhu ri,

⁴ ‘A si na nzhele nga a ḓe!’ Kha a si na ṱhalukanyo vhu ri,

⁵ ‘Iḓani ni ḽe vhuswa hanga, ni nwe waini ye nda i ṱuḓa.

⁶ Ṱutshelani vhutsilu ni tshile, ni tou longondo nḓilani ya ṱhalukanyo.’ ”

⁷ Ane a laya munyefuli u a ḓinyadzisa, ane a kaidza muvhi u ḓivhidzela maṱamba.

⁸ U songo kaidza munyefuli, a nga ḓo u vhenga, kaidza muṱali, u ḓo u funa.

⁹ Laya muṱali, ndi hone a tshi ḓo ṱalifhesa, funza a fulufhedzeaho, ndi hone a tshi ḓo engedza pfunzo yawe.

¹⁰ Tshisima tsha vhuṱali ndi u ofha Muṋe washu, u ḓivha Mudzimu, Ene Mukhethwa, ndi yone ṱhalukanyo.

¹¹ Ndi nṋe vhuṱali ane nda andisa maḓuvha au, nda u ṋea ndalamo.

¹² Arali wo ṱalifha wo ṱalifhela iwe muṋe, zwi ḓi nga arali wa nyefula, u ḓo zwi konḓelela u woṱhe.

Vhutsilu vhu tshi kungela vhathu vhutshinyini

¹³ Vhutsilu vhu nga musadzi wa luambo, ha shoni, ha ḓivhi tshithu.

¹⁴ U dzula muṋangoni wa nnḓu yawe, u dzula miḓini hune a vhonwa nga vhathu vhoṱhe,

¹⁵ a vhidzelela vhafhiri vha nḓila vho livhaho kha zwavho, a ri,

¹⁶ “A sa ḓivhi tshithu nga a pambutshele ngeno!” A tshi vhudza a si na ṱhalukanyo u ri,

¹⁷ “Maḓi o tswiwaho ha ḓifhi zwone; vhuswa vhu ḽiwaho muthu o dzumbama vhu takadza hani!”

¹⁸ Hone vhakungiwa a vha ḓivhi uri henefho ngomu ho dzula mimuya ya vho faho, vhaeni vhawe vha fhasi-fhasi dindini.