MIRERO 7 - BIVHILI KHETHWA Mafhungo Madifha

Musadzi a sa fulufhedzei ndi khombo

¹ Ṅwananga, tevhedza zwine nda amba, zwine nda u vhudza u songo litsha u zwi ita;

² ita zwine nda u vhudza, ndi hone u tshi ḓo tshila; pfunzo yanga i vhulunge unga tshanga ya iṱo ḽau;

³ itou zwi vhofhelela kha minwe yau, u zwi ṅwale mbiluni yau.

⁴ Amba na Vhuṱali u ri, “U khaladzi anga.” Ṱhalukanyo u i ite khonani yau vhukumakuma;

⁵ zwi u tsireledza kha musadzi a si wau, wa konou tinya haṋwani ha u ḓifha ha musadzi wa muṅwe.

⁶ Ndo vhuya nda sedza nga fasiṱere ḽa nnḓu yanga,

⁷ nda vhona maitele a vha si na nzhele, nda vhona kha vhaṱhanngana hú na muṅwe a si na ṱhalukanyo.

⁸ O vha a tshi khou tshimbila nga tshiṱaraṱa tshi dzulaho musadzi onoyo, ó fara i fhiraho henefho nḓuni yawe,

⁹ hu nga lufhimavhaeni, nga madekwana, ḽo no sikuwa, hu na swiswi,

¹⁰ musadzi uyo a mbo bva a mu ṱanganedza ó ambara unga phombwe, wa mbilu ya vhumbulu;

¹¹ ndi musadzi a sa fhiri muthu, a sa shoni, a sa dzuli hayani;

¹² u e tshiṱaraṱani, e e hune ha ḓala vhathu, u lalela mafhandeni oṱhe.

¹³ U mbo ḓi kuvhatedza uyo muṱhanngana a mu khisa, a amba nae a sa shoni a ri,

¹⁴ “Ndo vha ndo fanela u ṋekedza midzimu nduvho, ndo vhuya na ṋama ya zwiṱhavhelo,

¹⁵ zwino ndo ḓa u ni ṱanganedza, ndi ṱoḓa inwi, mbilu yanga i tou swa, zwino ndo ni wana!

¹⁶ Ndo adza mmbete wanga nda u fukedza nga lukhaha lwa mivhala lu bvaho Egipita;

¹⁷ mmbete wanga ndo u shasha nga mishonga i no nukhelela u ḓifha, na bindamutshe, na khinamoni;

¹⁸ iḓani ri kuvhatedzane ri pfelele u swika ḽi tshi tsha, ri tou ḓikumedza u ḓiphiṋa nga lufuno;

¹⁹ munna wanga a vhaho, vho fara lwendo lulapfu,

²⁰ vho ṱuwa na tshelede i si na vhukono, vha ḓo vhuya ṅwedzi u tshi fhela.”

²¹ A mbo ḓi mu kunga nga vhufhura, uyo muṱhanngana a tenda u fhurwa nga haṋwani ha u ḓifha,

²² a mbo ḓi mu tevhela na zwenezwo unga phulu i yaho u ṱhavhiwa, muṱhanngana uyo wa tsilu a yo ṱangana na ṱhamu yawe a nga o vhoxwa milenzhe nga geḓane,

²³ a rungwa tshivhindi nga musevhe. O vha a tshi nga tshiṋoni tshi tshi gidimela tshikwekweni, a sa ḓivhi uri u ḓo lifha nga ṱhoho yawe.

²⁴ Zwino-ha vhananga, nthetsheleseni, ni kolongonye nḓevhe ni pfe zwine nda amba.

²⁵ Ni songo litsha uyo musadzi a tshi thuba mbilu yaṋu, ni songo pambutshela nḓilani dzawe;

²⁶ o no wisa vhanna vhanzhi, o vhulaha vha na nungo vha si na mbalo.

²⁷ Nnḓu yawe ndi gondo ḽo livhaho tshaloni, ndi nḓila ya u khauledza i tselaho lufuni.