Taniel 6 - Intas Etipup

Nuarin tas alupas 6.

1 Et ati Taniel a Taraius mika yi uhup irai ilpu atimi alupas um ethi irai ehtaij atimi esjilid. 4 Era asan tas alwai vai yin ara um leh intas alep va nedo apat. 10 Era atijai itai irai Taniel ara um ika et auahas intas alep iyehki aien, eh ati yin an nuarin amen laion iran. 18 Et imiatamaig Taniel a Atua. 24 Eh auahas ilpu atimi edemda vai yin. 25 Et imiahpas Atua a Taraius an tas alep o un.

¹ IS upene irai Taraius mika yi ikni ilpu atimi alupas is wun huntret im twente an nelcau o un, mika eri esjilid ara an nelcau asega o un;

² is lep ikni natimi alupas esjilid is eseij aien, mika ehtiji esjilid ahtaij irai ra sji ehki; is atimi is ethi irai ehtaij a Taniel: mika eri asuptecnaig itai ehele ehtaij a ilpu atimi alupas, va eri jim auahas itai u natimarid.

³ Is esjilid a Taniel irai ohwat atimi alupas esjilid im ilpu atimi alupas, va narapakau upene o un; is aktaktai a natimarid mika yi ati yin mika yi esjilid aien an nelcau asega o un.

⁴ Va nitai inigki eris ahilek tah nedo maumau u Taniel va niji itai an nelcau ahwat atimi alupas esjilid, im ilpu atimi alupas; ja eris eti ecetai tah nitai has ehelen ara; is idim inveijec aien, eris lep eti ecetai tah nedo acalacal o un, ka tah nitai has ehelen.

⁵ Eris ika ara sji ehki, Intupu eti ecetai tah nitai has ehele Taniel akaija, el eta eti ecetai tah nitai akaija vai intas alep u Atua o un.

⁶ Eris asjapicnaig pan ehele natimarid ahwat atimi alupas esjilid erahki, im ilpu atimi alupas, um ika ehelen, Ak Taraius natimarid, namu umoh aiek irai iji mesese.

⁷ Era mun tas jipe a ilpu atimi alupas esjilid asega an nelcau, im ilpu atimi aminjinaig inpece, im ilpu atimi alupas, im ilpu atimi tas alep, im ilpu atimi alupas irai ilpu eucsupo, par asan tas alep u natimarid, um asan tas aktit, um ika, El et ugyi itai tah natimi ehelen tah atua, ka tah natimi, ira adiat inyi dirte, (eri ugyi euc ache, ak natimarid), uhpu ethaig se yin an nuarin amen iran u laion.

⁸ Ak natimarid, namu asaig aktit intas alep inigki aiek, um aged nidam iran, mika yi amen aktit, um idivaig intas alep u nup u Mitya im nup u Persia, et eti lep eche.

⁹ Va nitai inigki is lep aged nidan a Taraius natimarid an nitaasvitai im lep an tas alep.

¹⁰ Is wat ato a Taniel mika is aged nidan a Taraius an nitaasviitai, is apan anliin neom o un aien, um asalgei inmun neom o un an nahaijin inig is ehnan Jerusalem, is eceseij atpuse aien irai iji adiat, um ago nalaigaheni, um ago naaurinig an nuhup u Atua o tin, is idivaig nupyi edo o un.

¹¹ Eris asjapicnaig a ilpu atimi iji ehki, um ecet Taniel, is ago nalaigaheni aien um ugyi itai an nuhup o Atua o un.

¹² Eris apan ara, um tas an nuhup u natimarid vai intas alep u natimarid, um ika; Na mun aged intas alep aiek, um ika, El et ugyi itai tah natimi ehelen tah atua, ka tah natimi ira adiat inyi dirte, (eri ugyi euc ache, ak natimarid), uhpu ethaig se yin an nuarin amen iran u laion, ka oʼo? Is tas a natimarid, um ika, Et inveijec nitai inigki, et idivaig intas alep u nup u Mitya im nup u Persia, ct eti lep eche.

¹³ Eris tas ara an nuhup u natimarid, um ika, Ak natimarid, et eti ecen vai euc a nat naico, Taniel, natimi irai ra sji ehki eris lucsei ra au pece Juta, um eti imiaiji intas alep as aged aiek, ja et eceseij ago nalaigaheni aien irai iji adiat.

¹⁴ Is wat atahaijeg intas iji ehki a natimarid, is ohocred alupas aien vai yin, is merit emda aien par imiatamaig Taniel: is lep imiisjis aien, um yetpan an nete u nagesega, par imiatamaig yin.

¹⁵ Eris asjapicnaig pan ehele natimarid a ilpu atimi iji ehki, um ika ehelen, Ak natimarid, na idim ato nedo o nup u Mitya im nup u Persia aiek, mika et eti lep eche tah intas aktit, ka tah intas alep, et asaig a natimarid.

¹⁶ Is asaig a natimarid mika eri imiapan Taniel ara, um ethaig se yin an nuarin amen iran u laion. Is tas a natimarid ehele Taniel, um ika, Etpu imiatamaig euc a Atua unyum, na aheca o un aiek irai iji adiat.

¹⁷ Eris imiapan inhat is ethi, um ati an neucse nehpanitai an nuarin amen iran u laion; is lep atapnes iran a natimarid an nitai asjaaicnaig o un, im lep irai itai asjaacinaig u ilpu atimi alupas o un; va yi jim eche intas alep ura vai Taniel.

¹⁸ Is apan a natimarid an nimnim atimi o un, um atwakam an nepig iyehki: eris lep eti imiapan niji ohrai itai an nuhup o un: is lep eti umjeg aien.

¹⁹ Is atidai a natimarid an nuhihialeg, um auroauro um apan an nuarin amen iran u laion.

²⁰ Is yetpan an nuarin amen iran u Laion aien, um ahlaig vai Taniel an nohran taig: is tas a natimarid ehele Taniel, um ika, Ak Taniel, naheca u Atua umoh, et emda a Atua unyum, na aheca o un aiek irai iji adiat, par imiatamaig euc va laion, ka oʼo?

²¹ Is ika a Taniel ehele natimarid, Ak natimarid, namu umoh aiek irai iji mesese.

²² Et mun abrai nagelo o un a Atua unyak, um atapnes nipjieucse laion, va eri jim auahas nyak ara: vaig inig nikavaig, is ti nedo has unyak an nuhup o un; kis lep eti ago tah nedo has ainyak an nuhup unyum, ak natimarid.

²³ Is imiacitak alupas vai yin a natimarid, um asaig mika eri ahyausei Taniel ara an nuarin amen iran u laion. Eris ahyausei Taniel an nuarin iyehki, eris lep eti ecetai tah inmocop iran, vaig inig nikavaig, is asgeig irai Atua o un aien.

²⁴ Is tas alep a natimarid mika eri imiapan ilpu atimi iji ehki, eris atijai itai irai Taniel ara, eris erekhaig se ra an nuarin amen iran u laion ara, im ilpu hal ura, im ilpu ehnaa ura; eris esjilid ira ra niji laion, um aces yi asvi niji eduora asega, ja eris par ahlause ara an nuarin amen iran u laion.

²⁵ Is aged nitaasviitai a Taraius imi natimi asega, im nup mai iji pece, im ilpu atimi auoh iji tas, eris amen an nobohtan asega ara, um ika, Etmu amen alupas ehelemia nigpa.

²⁶ Ek asaig intas alep ainyak, mika eri eucjeucjeucaij, um imtitaig,annuhup u Atua u Taniel a nup urai iji uari pece an nelcau unyak: et idim Atua umoh aien, um amen aktit irai iji mesese; eri eti auahas nelcau o un, etpu lep atimarid aien irai iji mesese.

²⁷ Et imiaras um imiatamaig atimi aien, et lep ago niji itai asjaaicnaig aien, im niji itai imiali, an nohatag im nobohtan: is imiatamaig Taniel aien va nemda u laion.

²⁸ Is amen upene a Taniel an nopan atimarid u Taraius, im lep an nopan atimarid u Sairus nup u Persia.