Eksotus 33 - Intas Etipup

Nuarin tas alupas 33.

1 Et ika a Ihova inyi eti atau ira atimi aien et idivaig intas upyi asaig o un. 4 Era tas upoupo natimi vaig. 7 Er atipagki neom atga irai nuarin amen iran u atimi. 9 Et tas ehele Moses a Atua. 12 Et merit a Moses mika yi ecetai natimi alupas u Atua.

¹ IS ika a Ihova ehele Moses, Atga unyum aiek im lep natimi iji igki as iknipagki ra an pece Ijipt aiek, um apan an pece inig kis asaig ainyak ehele Ebraham, im Aisak, im Jekob, um ika, Ekpu alupai ilpu mapomitaij ainyak:

² ekpu abrai Nagelo unyak ainyak mika yi uhup iram aien; ekpu lep ahlo nup u Kenan ainyak, im nup Emor, im nup u Hed, im nup u Piris, im nup u Haivai, im nup u Jibus;

³ et amen alupas nidenedid im hune an pece iyehki: ja inki eti atga an niblamia ainyak; eka atimi ipjin inliinmopomia aijaua: vai ki jim auahas caua ainyak an nefalaig.

⁴ Eris wat atahaijeg intas itap iji igki natimi, eris taigtaig ara: is lep eti yecrei yin tah natimi an padiaig o un.

⁵ Is idim ika a Ihova ehele Moses, Namu tas ehele nup Isreel aiek, um ika, Eka atimi ipjin inliinmopomia aijaua: ekpu auroauro ainyak um apan an niblamia, um auahas caua: va nitai inigki akumu iknipagki niji itai yecrei caua aijaua, mika ki ato ainyak nitai inigki ekpu ago iramia ainyak.

⁶ Eris iknipagki niji itai yecrei ra a nup Isreel an nedoon Horeb.

⁷ Is leh neom atga a Moses, um athai itac acen pan u nuarin amen u atimi, um anvi nidan par ika Neom er asjapicnaig o un. Is wat ahilek Ihova tah natimi, is apau aien an neom er asjapicnaig o un, is eteuc itac u nuarin amen u atimi.

⁸ Is wat apan itac a Moses nalaig u neom atga, eris atidai natimi asega, um aiji irai eucse iyum udig ura, um aes pan Moses, um yetpan napan o un anliin neom atga.

⁹ Is wat apan a Moses anliin neom atga, is asuol se napat, um aiji an neucse neom atga, is lep tas a Ihova ehele Moses.

¹⁰ Eris ecetai napat natimi asega namen vaig an neucse neom atga: eris atidai natimi um ago nalaigaheni irai eucse iyum udig ura.

¹¹ Is tas a Ihova ehele Moses, et idivaig et tas tah natimi ehele etwan. Is lep ahidaig pan yin aien u nuarin amen u atimi: ja is eti udei neom atga a intakuras is ethi, naheca u Moses, nidan Josua, inhal u Nun.

¹² Is ika a Moses ehele Ihova, Na idim asaig ehelek aiek, mika ki atau ira atimi iji igki ainyak: ja na mun eti aniv yin ehelek aiek napu abraig pan yin aiek mika yi ahced nyak. Ja na mun ika aiek. Ek ato nidam ainyak, ekpu lep aiheuc vai euc ainyak.

¹³ El et aiheuc vai nyak aiek, ek ugyi euc ainyak, mika an asuptecnaig ehelek aiek nedo unyum, mika ki ato euc ainyak, va apu aiheuc vai nyak aiek: um lep aktaktai mika era ilpu atimi unyum natimi iji igki.

¹⁴ Is ika a Ihova, Ekpu ahced euc ainyak, um ika an atumop aiek.

¹⁵ Is ika ehelen aien, El et eti ahced nyak aiek, jim imiapan cama eahki.

¹⁶ Uhpu ehvato naiheuc unyum vai nyak, im lep vai ilpu atimi unyum? au nahced cama vaig unyum marom: et idim uco etpu eche namen unyak, im lep u ilpu atimi unyum, ira atimi asega an nobohtan.

¹⁷ Is ika a Ihova ehele Moses, Ekpu lep ago nitai inigki ainyak na mun asaig aiek: ek aiheuc vai euc ainyak, um ato nidam.

¹⁸ Is um ika aien, Ek ugyi euc ainyak, mika an ehvaig ehelek aiek natimi alupas unyum.

¹⁹ Is ika aien, Ekpu ika ainyak yi atga an nuhup unyum inupene asega unyak, ekpu lep anvi nidai Ihova ainyak an nuhup unyum; ekpu lep aiheuc vai ra sji igki ainyak ek ika ainyak ki aiheuc vai ra, um ago nedo upene vai ra sji igki ek ika ainyak ki ago nedo upene vai ra.

²⁰ Is lep ika aien, Et ehka vai euc nalmoi vaig nesganimtak: inyi idim eti alum nyak tah natimi um umoh.

²¹ Is ika a Ihova, Et idim eteuc nuarin inig ubutpotet ehelek, namu aiji ijinies an hehteuc aiek:

²² etu wit ehcohos natimi alupas unyak, ekpu ati euc ainyak an niblan hehteuc meled, um adahpoi euc an nikmak, an nahtaregdei vaig inhehteuc unyak:

²³ ekpu lep atipagki nikmak ainyak, napu almoi incehek aiek: ja uhpu eti almoi nesganimtak.